Albistea
-
Ataungo Udalak Agauntza erreka zaborretatik babesteko saretak jarri izana txalotu du Eguzkik
2024-11-27
Ezkerrean, Ingurumen zinegotzi Jon Fontenla; eskuinean, berriz, Eguzkiko kide Gorka Alberdi. Biak ala biak barandaren azpian jarritako sareten aurrean.
Ataungo Udalak, Eguzki Talde Ekologistarekin lankidetzan, joan den urriaren amaieran amaitutzat eman zuen Agauntza errekaren ondoko baranden sareta (xafla galbanizatu zulatuak) jartzeko instalazioa. Guztira, 200 metro jarri dira San Martin auzoan, errekastoan gora, elizatik hasita, egunero ikusten ditugun hondakinak, hala nola tabako-paketeen plastikozko bilgarriak, zigarrokinak, snack-bilgarriak, freskagarrien poteak, plastikozko poltsak, paperezko zapiak, etab., gehienetan inolako lotsarik gabe lurrera botatakoak, haizeak errekaren ibilgura eraman ez ditzan eta, ondorioz, itsasora irits ez daitezen.
Ingurumen zinegotzi Jon Fontenlaren hitzetan, “San Martin parkean, zoritxarrez, zabor asko sortzen da. Horregatik, bereziki babestu nahi zen eremu hori, eta espero dugu sareta horiek udalerriko baranda guztietan instalatuta izatea 2025. eta 2026. urteetan”.
Ibaien, erreken eta itsas pasealekuen ondoko barandak ibai-sistemei irekitako ateak direla esango genuke. Hortik iristen dira hondakinak, eta ibaiertzetan pilatzen dira, fauna eta flora eta gure kostaldea kutsatuz. Udalak saretak bezalako gauza sinple bat jarriz lortu duena da, pertsonak babesteko barandak jartzen diren bezala, baranda ere ibai-babesle bihurtzea.
Eguzkik ibaiak eta itsasoak defendatzeko kanpaina bat jarri zuen martxan 2019an, “Itsasoa hemen hasten da” lelopean. Denbora horretan zehar, dozenaka herri batu dira sareetara, eta dagoeneko milaka metro jarri dituzte.
Berri bikain hau aprobetxatu nahi dugu gainerako udalerriei eskatzeko barandak erabiltzeko eta sareta soil bat jarriz ibaiaren eta itsasoaren babesle bihurtzeko, Ataungo Udalak egin duen bezala.
Horregatik, Eguzkik txalotu egin du Udalak prebentzio-neurriak ezarri izana eta etorkizunean ezarriko direnak.
Gogoratu, halaber, hondakinik onena sortzen ez dena dela, eta sortzen ditugun hondakinen aurrean, berresten dugu hondakinen kudeaketa arduratsua eta edukiontzien erabilera azpimarratzen ditugula.
Eguzki, 2024ko azaroa
Bisita Kontadorea
KANPAINAK
LIBURUAK
