Albistea

• Baldintzak betetzen ez baditu, ez da bidegorria!

  2023-09-21
  Partekatu - Compartelo

  
  

  Idazki honen bidez, Eguzki talde ekologistak arreta jarri nahi du Bizikleta Bideen Lurralde Plan Sektorialeko I.1 ibilbideko GI-636 errepidean Lezoko biribilgunearen eta Errenteriako Kaputxinoen biribilgunearen artean antzeman duen bide-segurtasuneko arazo larri batean. Izan ere, “aldi bereko oinezkoentzako eta bizikletentzako” tarte hori, duela gutxi jarri diren seinaleek dioten bezala, oso estua da eta, hori gutxi balitz, oinezkoen zein bizikleten zirkulazio segurua eragozten duten hainbat elementu daude.

  Baieztapen hori egiteko, honako dokumentazio hau hartu dugu kontuan: Bidegorria diseinatzeko, eraikitzeko, azpiegituratzeko, seinaleztatzeko, balizatzeko, kontserbatzeko eta mantentzeko gomendioen eskuliburua (Madril, Barne Ministerioa, DGT, 2000) batetik, eta Gipuzkoako bizikleta-bideen Lurraldearen Arloko Plana, bestetik.

  Hori dela eta, Ingurumeneko Aholku Batzordeari proposatu diogu Errenteriako Udalari eskatzea Gipuzkoako Foru Aldundira jo dezala “bidegorri” izendapena eta seinaleak kentzeko, zein zabalera handitzeko, argiak jartzeko eta galtzadako sastrakak garbitzeko eta kentzeko, zorua mantentzeko eta pasabidea oztopatzen duten trafiko-seinaleak kentzeko, edo beste aukera bat hartzeko, gai horretan indarrean dauden bide-segurtasuneko arauak eta gomendioak bete ditzan.

  
  

  Partekatu - Compartelo