Baztango ERDIZ BIZIRIK plataformak Euskal Herri osoan alegazioak sinatzeko eta biltzeko deialdia egin du, hain zuzen ere Erdizko mendi-lurretan (Aldude-Kintoako mendialdean) Magnesitas de Navarra enpresak harrobi-meategi berria zabaltzeko duen egitasmoa Nafar Gobernuak bertan behera utzi dezala eskatzeko. Izan ere, Nafarroako Gobernuak berriki meategi proiektua “Udalerriz Gaindiko Eragina duen Plan” (UGEP) bezala tramitatzea erabaki du, Baztango Udalaren eta tokiko erakundeen autonomia eta erabaki ahalmena ezabatuz.
Magnesitas de Navarra (MAGNA) enpresaren meategi proiektuak Aldudeko mendien natur-ondare bikainean eta Baztango abeltzaintzan, tokiko ekonomian, ingurugiroan nahiz herritarren osasunean eragin ikaragarriak izango lituzke.

EAJk Lurralde Antolaketaren Legea aldatu nahi du Eusko Jaurlaritzak “estrategikotzat” jotzen dituen proiektuak inposatu ahal izateko, gaur egun tokian tokiko instituzioek, batik-bat udalek, duten eskumenen gainetik. Dagoneko Tapia Legea deritzaion aldaketa-saio honen helburua begibistakoa da eta ondorio latzak izan ditzake, bai ingurumenean bai beste alorretan ere. Horregatik hainbat sektore salatzen ari dira.