Herritar talde batek Lasarte-Errekalde bidegorri berriaren herri-inaugurazioa egin genuen larunbatean, ekainaren 13an. Goizeko 11etan Lasarteko Eusko Treneko geltokitik oinez zein bizikletaz atera eta gutxi gorabehera ordu erdi bat geroago iritsi ginen Errekaldekora. Han, giro onean, sagardo trago bat hartu eta, zinta bat moztuta, “inauguratu” genuen bidegorri berria.
Gure helburua izan zen poza agertzea bidegorri berriagatik eta, aldi berean, hemendik aurrera bide beretik pauso gehiago eman behar direla aldarrikatzea. Larunbateko ekintzarekin gaia legegintzaldi berriaren 0 minututik beretik mahai gainean ipini nahi izan dugu.
