Albistea
-
Gipuzkoako Aldundiak egurzale pribatuen patrikak diru publikoz betetzen jarraitzen du.
2017-06-20
Urteroko ohitura jarraituz, Gipuzkoako Aldundiak bere ustez gure herrialdeko basoak zaintzeko, hobetzeko eta ugaritzeko beharrezkoak diren diru-laguntzak onartu berriak ditu, 2.800.000 euro denera, %40 gehiago iazkoarekin alderatuz.
Kopurua handia bada ere, ez ginateke harritu beharko gure dirua horretan ere inbertitzea. Azken finean, europar legeek babesten dituzten 11 baso-mota mehatxatu ditugu Gipuzkoan, eta Europar Batzordera bidali zen azken ebaluaketak argitu duenez, gure pagadiak, hariztiak eta beste baso guzti horiek kontserbazio-egoera ekologiko txarrean daude, bestela esanda, hobetu beharrean daude.
Ezin ahaztu Europako legeek natura zaintzeko eskumena duen Administrazioa (Aldundia) egoera hori hobetzera behartzen dutela, eta 2020rako 11 baso-mota mehatxatu horien erdiak behintzat egoera egokian egon beharko dutela. Honaino dena bere bidetik.
Diruen xedapenak zehazten dituenean hasten da gure harridura: baso-ekosistemen zaintza eta hobekuntzarako egingo diren inbertsioei laguntzeko 134.000 € soilik, 2017rako diru-laguntza osoaren %5-a baino gutxiago. Nahikoa ote? Ala legeak betetzearen gainetik, bururatzen zaila egiten zaigun goi-mailako helbururen bat lortu nahi ote dute? Esaterako, sektore honetan lan egiten duten enpresak, egurzaleen lobbya, saritzea?
Zuhaitzen banaketa Gipuzkoan. Iturria:Gipuzkoako BBNN
Ez dira zehaztasunez irakurri behar diru-laguntza horien xehetasunak galdera erantzuteko, eta zinez, aho bete hortz utzi gaitu: diruaren erdia, 1.392.000 € hain zuzen, 40 urte baino gehiagoko Intsinis pinudi zaharrak moztu eta saltzera bideratu nahi dira; alegia, bioaniztasun handieneko pinudiak erauztera. Eta aparteko sari publikoarekin, nahi izanez gero bere ordez eukaliptoa jartzea ere libre izango delarik!
Pistak egiteko, pinuak landatzeko, itxiturak jartzeko (edo kentzeko), lehen urteko hutsak birjartzeko, sasiak garbitzeko, plagizidak modu indiskriminatuan edo neurrigabe zabaltzeko, ongarritzeko edota 12 urteetan zehar kimatzeko nahikoa ez nonbait eta, orain pinuak mozteko ere diru-laguntza publikoa, alajaina! Merkeak ateratzen zaizkigu ditxosozko pinu horiek!
Gure baso naturalentzako izan behar zuten diru-laguntzak egurgintzako enpresen eta pinudi jabe handien poltsikora bidean jarri ditu Aldundiak berriro, egurgintza-eredu intentsiboa sustatuz. Honi deitzen dio gaur Aldundian agintzen duen Gobernuak PNV-PSE basoen kudeaketa jasangarria, ondo baino hobeto dakiten arren pinu plantazioen ustiaketa intentsiboaz eta basoetako natur ondarearen suntsiketa masiboaz ari direla.
Naturkon, 2017ko ekainean.
ALDUNDIAREN DIRU LAGUNTZAK
2017
%
2016
%
Egurgintza intentsiboa
2.666.000
95,2
1.866.000
93,3
Azpiegiturak, obrak
137.000
137.000
Landaketak
315.000
315.000
Nekazal/basogintza
63.000
63.000
Suteak, hondamendiak
609.000
609.000
Teknologiak + Makineria
150.000
742.000
Pinudi zaharrak botatzeagatik
1.392.000
49,7
Baso naturalak
134.000
4,8
134.000
6,7
Ingurumen balioa
83.000
83.000
Ingurumen zerbitzuak
51.000
51.000
DENERA
2.800.000
2.000.000
Naturkon osatzen dugu:
Bisita Kontadorea
KANPAINAK
LIBURUAK
