Albistea

• Ehunka arrain hilik Urumean, izokinak barne

  2023-08-24
  Partekatu - Compartelo

  
  

  Ibai eta errekak oso egoera larrian daudela kontuan izanik, prebentzio-neurriak eta zaintza zorrozteko eskatzen du Eguzkik

  Ehunka arrain, amuarrain eta izokinak, gehienak neurri txikikoak, hilik agertu dira aste honetan Urumean, Hernaniko Karabel zubi inguruan. Partikular batek abisatuta, Aldundiko Basozaintza Zerbitzuarekin eta Urarekin jarri gara harremanetan.

  Urumea, Euskal Herriko ibai eta erreka gehienak bezala, muturreko egoeran dago. Batetik, ur gutxi; bestetik, bero itogarria. Horrek arrainen biziraupen-aukerak muga-mugan ipintzen ditu, batez ere kanalizatuta edo/eta zabalduta dauden zatietan, non ertzeetan itzala egingo duen landarerik ere asktotan ez dagoen.

  Gauzak horrela, ibaiko urak oxigeno kopuru txikia du eta edozein isurketak edo bestelako gorabeherak hil ala biziko atakan jartzen ditu arrainak. Baita beste egoera batean oharkabean pasatu zitekeen edozein isurketak edo gorabeherak ere. Oso litekeena da kasu honetan hori gertatu izana.

  Pena da, denbora luzean egindako lana bat-batean galtzeko arriskua baitago. Aste honetan Urumean galdutako arraien artean izokinak daude; atera kontuak.

  Berriz ere esan beharra dugu: ez da Urumea bakarrik egoera larrian dagoena, Euskal Herriko ibai eta erreka gehienak baizik. Beraz, prebentzio-neurriak eta zaintza zorroztea tokatzen da.

  EGUZKI Talde Ekologista eta Antinuklearra, 2023ko abuztuan

   

  
  

  Partekatu - Compartelo