Albistea
-
Sarakoetxeko erromeria eta Lemoizi buruzko eztabaida sozial ezinbestekoa
2023-09-14
Larunbateko irudietako bat.
Zentral nuklearra zela eta, Lemoizko Sarakoetxe auzoko erromeria aspaldi desagertu zen, halabeharrez. Iaz ahanzturatik erreskatatu zuten (nola edo hala, Ertzaintzak ere bertaratzen ari zirenei kargu hartu zielako). Aurten, berriz, normaltasunez egin ahal izan dute eta, batez ere, datorren urteari begira, perspektibak hobetu dira. Eguzkikooi gustatuko litzaiguke pentsatzea zeharo anormala den egoera bati buelta emateko pausua dela, bere xumean. Izan ere, Basorda inguruan normaltasunik eza izan da nagusi azken mende erdian, eta egoera ez da aldatu azken urteotan, Eusko Jaurlaritzak 2019an zentrala eta inguruko eremuak bere egin bazituen ere.
Lemoizen horrelako kartelak daude.
Erromeria larunbatean ospatu zen, irailak 9, Sarakoetxeko Legunek antolatuta. Hona hemen Roge Blascok pasatu dizkigun irudi batzuk:
Berez, ez zen ospatu ohiko baserrian, auzoko beste batean baizik. Izan ere, ohiko baserria da zentralaren eremuaren barruan geratu zirenetako bat. Lemoizko udal eratu berriak baimena eskatu zion Jaurlaritzari erromeria ohiko baserrian egin ahal izateko, baina Jaurlaritzak erantzun zuen parajea ez dagoela egoera onean, egokitzeko lan batzuk egin behar direla eta lan horiek egiteko astirik ez zegoela. Gauzak horrela, aurten ez baina badirudi datorren urtean Sarakoetxeko erromeria ohiko baserrian egiteko arazorik ez dela egongo.
Arestian esan bezala, Eguzkikooi gustatuko litzaiguke interpretatzea honako hau, bere xumean, pauso bat dela normalizazio-bidean. Alabaina, benetako normalizazioa ez da gertatuko Lemoizko zentralarekin eta inguruko lursailekin zer egin eztabaida sozial baten bitartez argitu ezean. Eta Jaurlaritza, 2019tik zentralaren jabe dena, eztabaida hori espresuki ukatzen ari da.
Zentralari eta inguruko eremuari buruzko eztabaida soziala ezinbestekoa da. Jaurlaritzak baihituta dauka, ordea.
Beti izango da une egokia horrelako eztabaida bati ekiteko, baina gaur egungoak bereziki egokia dirudi. Zergatik? Jaurlaritzak azken urteotan Lemoizerako sustantu duen arrain-haztegi handiaren proiektua bide bazterrean geratu delako, ez dakigu behin betiko, baina bolada luze baterako behintzat bai. Izan ere, hainbat urtez proiektuarekin bueltaka ibili ondoren, interesatuta egon zitekeen inbertitzailerik ezean, Next Generation funts europarretako dirulaguntzak eskatzeari berari uko egin behar izan dio Jaurlaritzak.
Lemoizen, herritarrokiko zor historiko handia dago, baita aukera bikaina ere, bereziki ingurumenaren alorrean.
EGUZKI, 2023ko irailean
Erromerian irakurritako mezua.- Joan den larunbateko erromerian, Bengotxes baserriko seme Valentin Elortegiren mezu bat irakurri zen. Gaztelaniaz dago eta, interesatuta bazaude, osorik aurkituko duzu albiste honen beraren gaztelaniazko bertsioan. Valentinek, lanbidez ingeniaria denak, Lemoizko zentral nuklearrari buruzko tesina bat egin zuen. Lan horretatik abiatuta, Roge Blascok “Basordas, el no-territorio/Lurraldea ez dena” izenburuko bideo/elkarrizketa egin zuen (Central nuclear de Lemoiz. Basordas el no-territorio. Lurraldea ez dena. – YouTube).
Bisita Kontadorea
KANPAINAK
LIBURUAK
