Ikusi dugu Ertzain-etxea eta Fanderiako bidegorria banatzen dituen zerrendan zehar, tamaina handiko sei makal beltz (Populus nigra) moztu direla. Ingurumenean eragiten duten jarduerek kezkatzen gaituztelako, Udaletxean galdetu dugu, eta baieztatu digute zuhaitz horiek mozteko udal lizentzia behar dela eta ez dela horrelakorik tramitatu. Geure buruari galdetzen diogu ea hori ote den herritarrari transmititzen dioten eredua administrazio publikoarekiko dituen betebeharrei dagokienez.

Geure kezka are handiagoa da ez dakigulako zeintzuk izan diren ale horiek mozteko arrazoiak eta ez dakigulako ale berri batzuk landatzeko edo bestelako neurri konpentsatzaileak hartzeko asmoa ote duten.

Egoera honen aurrean, EGUZKIk honako hau eskatzen du:

–          Udalari eskatzen dio kasu honetan jokatu dezala lizentziarik gabeko jarduerak egiten diren beste kasu batzuetan bezala.

–          Eusko Jaurlaritzari eskatzen dio jakitera eman ditzala ale horiek mozteko arrazoiak eta ale berri batzuk landatzeari edo bestelako neurri konpentsatzaileak hartzeari buruz dituen asmoak.

EGUZKI