Albistea

• Zapelatz bat Zumarragan legez kanpoko zepo batean harrapatuta aurkitu dutela salatu du Eguzkik

  2019-03-03
  Partekatu - Compartelo

  
  

  

  Zapelatza harrapatuta, hegan egin ezinean.

  Atzo, martxoaren 2an, Zumarragako depositotik gora ari ziren mendizale batzuek zapelatz bat (Buteo buteo) legez kanpoko zepo batean harrapatuta aurkitu zuten. Ikus bideoa: https://youtu.be/tt6Fmze2tbY

  Zapetatza, zepoarekin batera, Zumarragako Ertzain Etxera eraman zuten eta, handik, Igeldoko Arrano Etxera.

  Argi utzi behar da, batetik, zapelatza espezie babestua dela, gainerako harrapariak bezala, eta, bestetik, zepo horiek erabiltzea (ikus honako bideo honetan nolako zepoaz ari garen: https://youtu.be/b7IBvBoSe68) zeharo legez kanpokoa dela.

  

  Zepoa. Hau erabiltzea guztiz legez kanpokoa, eraz uler daitezkeen arrazoiengatik.

  Benetan larritzat jotzen dugu gertatutakoa. Kontuan izan  zepo horretan zapelatza bezalaxe, beste basa faunako edozein animalia (asko legez babestuak ) edo etxekotutako animalia bat ( txakurren bat esaterako) edo are pertsona bat ere eror zitekeela. Hau da, ezin da inola ere erabilera zuritu eta bai bere arriskua azpimarratu, zapaltzen duen edonor harrapatu baitezake.  Zoritxarrez, zepoen erabilera uste baina zabalduagoa dago.

  Uste dugu gaia Ingurumen Fiskaltzak berez aztertzeko modukoa dela eta, hala ez bada, geuk aurkeztuko dugu salaketa.

  Bukatzeko, tirokatutako edo zauritutako animaliaren bat aurkituz gero,deitu  112ra. Hori da zuzenena. Hala ere, edozer dela ere Eguzkira jo nahiago baduzue, hona hemen gure telefonoa: 688662532.

  Eguzki, 2019ko martxoaren 3an

  
  

  Partekatu - Compartelo