Albistea
-
Putre bat etxeko balkoian
2018-08-30
Putrea balkoian. Argazkia etxeko andre Kontxi Acostarena berarena da.
Igande arratsaldez geroztik putre batek Tolosaldeko jende askoren harridura piztu zuen, herrietako eraikinetatik oso gertu egiten zuelako hegan. Astelehen iluntzean, berriz, Ibarrako lehen solairuko etxe bateko balkoian geratu zen.
Etxeko andrea asaldatu egin zen, jakina. Putre batek mendian nahiko zirrara sortzen du; beraz, atera kontuak etxean, balkoian bada ere. Dena dela, andreak behar den bezala jokatzen asmatu zuen: putrea erratzarekin edo uxatzen saiatu ordez, aholkua eskatu eta, ondoren, Foru Aldundiaren basozainei deitu zien.
Putreak hegalak astintzen dituenean, are “zirraragarriagoa” izan daiteke. Argazki hau ere Kontxi Acostarena da.
Lasai egoteko esan zioten eta, goizean putreak balkoian jarraitzen bazuen, berriz ere deitzeko. Gauzak horrela, putreak, babestutako espezie bateko animaliak, gaua balkoian pasatu zuen, harrigarriro. Ez zen guztiz gau lasaia izan, gainera. Izan ere, Ibarra festetan dago eta kuadrillaren bat, putrea jo-puntutzat hartuta, kaletik txanponak eta basoak jaurtitzen ibili omen zen. Horietako batzuek, portzierto, etxeko kristaletan jo zuten. Astearte goizean bai, basozainek putrea jaso eta Arrano Etxera eraman zuten. Hona hemen harrapatu zuteneko unean grabatutako bideo bat:
Arrano Etxean, berriz, deshidratatuta zegoen ale gazte bat dela ikusi zuten. Ez da ezohikoa ale gazteek horrelako arazoak izatea. Baina, esan bezala, deshidratatuta baino ez zegoen. Beraz, denbora pixka bat pasatuko du Arrano Etxean suspertzen eta, gero, berriro ere izango du hegan libre egiteko aukera. Albiste ona izango da, seguru, putrea noraezean ikusi eta harrituta geratu ziren pertsona asko eta askorentzat.
Astelehen gauean gauzak jaurtizen ibili zirenei, berriz, … Aizue, lagunok, badira gauza batzuk mozkortuta ere egin behar ez direnak.
EGUZKI
Putrea balkoian pausatu aurretik, noraezean zebilenean. Argazki hauek Iban Aznarri zor dizkiogu.
Bisita Kontadorea
KANPAINAK
LIBURUAK
