Daily Archives: 2015-08-18

Atsobakarren eraikitzen ari den bidegorri-zatia, pauso berri bat bide onean, Eguzki eta Ekologistak Martxan-en ustez

albisteak

Atsobakarren eraikitzen ari den bidegorri-zatia, pauso berri bat bide onean, Eguzki eta Ekologistak Martxan-en ustez

Zati honek Lasarte-Errekalde foru bidegorria eta Lasarte-Oriako udal bidegorria elkarren artean hurbilduko ditu, nahiz eta oraindik ez dituen guztiz lotuko

Atsobakarreko parkeko ertzean, Lasarte-Oriako udal bidegorria Garaikoetxeatik Urbil aldera luzatzeko lanak hasi dira. Eguzkiko eta Ekologistak Martxaneko kideon ustez, bidegorri-zati hau bide onean emandako pauso berri bat da. Egia da oso zati txikia dela, metro batzuk baino ez, baina garraintzitsua, zati honek laster ahalbidetuko duelako (hala espero dugu, behintzat) udal bidegorria eta Foru Aldundiaren Lasarte-Errekalde bidegorria elkarren artean lotzea.

 Bidegorria obretan

Foru Aldundiaren bidegorria maiatzean ireki zen. Geroztik Lasarte-Oriatik Errekaldera (eta, ondorioz, Donostiara) oinez eta bizikletaz behar bezala joateko aukera dago. Eta alderantziz, jakina. Espero zitekeen bezala, herritarron aldetik harrera bikaina izan du. Hala ere, foru eta udal bidegorriak oraindik lotuta ez daudenez, txirrindulariek ezin dute Lasarteko zentrora eto Lasarteko zentrotik bidegorrira joan modu eroso eta garbian.

Arazo benetan latza da Donostiatik datozen txirrindularientzat, are gehiago ingurua ondo ezagutzen ez badute. Izan ere, bidegorriaren muturrera iritsi eta noraezean geratzen dira. Antzeko zerbait gertatu zaie (eta oraindik gertatzen zaie, nahiz eta gero eta gutxiago, noski), Lasartetik Errekaldera iritsi eta bidegorria Lore Tokiko biribilgunean bukatzen dela ikusten duten erabiltzaileei, baldin eta aldez aurretik ez badakite Eusko Treneko eskaileretan edo igogailuan gora joanda bidegorri-zati berri bat topatuko dutela. Alde horretatik, gure ustez komeniko litzateke udalak eta Foru Aldundia ados jartzea seinalizazioa hobetzeko, bidegorri-zatiak elkarren artean behar bezala lotu bitartean.

 Bidegorria obretan.2 JPG

Nolanahi ere, berriro diogu: Eguzkiko eta Ekologistak Martxaneko kideon ustez,  Atsobakarrekoa bide onean emandako pauso berria da; udal bidegorria foru bidegorriarekin lotzeko oraindik falta den zatiari lehenbailehen heltzea espero dugu, eta, bitartean, seinalizazioa hobetzea edo indartzea komeni dela iradokitzen dugu.

2015eko abuztuaren 11n

P.S. Argazkietan, Atsobakarreko lanak. Orain dela astebete hasi ziren eta abuztua bukatu baino lehen amaituko dira.

Lau Aldundiek usapalen eta galaperren ehiza baimentzen jarraitzen dutela salatu du Eguzkik

albisteak

usapala 2015 uztailaLau aldundiak edo nahi izanez gero, hiru aldundiak (Araba, Bizkaia eta Gipuzkoakoak) eta Nafar Gobernuak, dagozkion ehiza aldien argitarapenen bidez, beste behin ere usapalen eta galeperren ehiza baimendu izana deitoratzen du Eguzkik.

Talde ekologistak salatu nahi du administrazio ezberdinek, erabaki honekin uko egin diotela bioaniztasunari eusteko duten erantzukizunari, ehiztarien interesen mesedean edo, hobeto esan, ehiztarien epe laburreneko interesen mesedean, herri erakundeek kolektibo honekin praktikatu ohi duten klientelismoari jarraituz.

Eguzkik sinetsita dago usapalak eta galeperrak botatzeko debekua berandu baino lehen ezarriko dela. Zoritxarrez, zenbat eta beranduago ezarri, gero eta okerragoa izango da egoera, eta gero eta zailagoa espezie hauek suspertzea.

Usapalen populazioak (Streptopelia turtur) gainbehera latza pairatzen ari dira azken hamardaketan Europan. Hau ikusita, usapalak babestu dituzte herrialde askotan, hala nola Belgikan, Txekian, Danimarkan, Estonian, Finlandian, Alemanian, Hungarian, Irlandan, Letonian, Luxemburgon, Holandan, Eslovakian, Eslovenian edota Suedian. Estatu espainolean bertan ere debekuak egon badaude, hala nola Kanariar Uharteetan eta Kantabrian.

Galeperren egoera (Coturnix coturnix) antzekoa da.

Informazio zehatzagoa nahi izanez gero, jo Eguzkik aurkeztutako debeku-eskaerara:

http://eguzki.org/2015/07/23/eguzkik-usapalen-eta-galeperren-ehiza-debekatzeko-eskaera-egin-du/

Azken emaitza berdina izan bada ere, aldundien jarreran ezberdintasunak egon dira:

Araba.

Idatziz erantzun bat man digun lurralde bakarra da, nahiz eta debeku eskaeraren inguruan ez duen ezertxo ere esan. Egiten dugun beste eskaeraren inguruan berriz, hau da, usapala espezie mehatxatuen katalogoan sartzearena, laburki adierazten digu, Eusko Jaurlaritzara jotzeko. Jakin badakigu Eusko Jaurlaritza dela katalogazio horiek egitearen arduraduna, bai aldundiak izanik ingurune naturala eta bioaniztasuna kudeatzearen arduradunak ( Arabako Aldundia, Arabako lurraldeari dagokionean), logikoa eta egoki erizten diogu berauek mota honetako proposamenak egitea.

Bizkaia.

Es dugu inolako erantzunik jaso.

Gipuzkoa.

Kasurik mingarriena hau dela esan dezakegu. Izan ere, gaia Gipuzkoako Ehiza Kontseilura eraman genuen gipuzkoako natur talde nahiz talde ekologisten babesarekin  eta ia ez zen eztabaidarik ere egon. Eta ez da izango tankera honetako proposamenak egiten diren lehen aldiz delako ez , agian beste batzutan, kasu honetan izan duen natur taldeen babes zabalarekin egin ez bada ere, baina entzun gogorrarenak egiten jarraitzen dute.

Nafarroa.

Administrazio honengandik ere ez dugu inolako erantzunik jaso. Kasu honetan bagenekien gure proposamenak ehiza aldiko araudiarengan ez zuela inongo eraginik izango, proposamena aurkezterako  araua argitaratu baitzegoen ( beste administrazioak baina lehenago egin zuten) baina kasu honetan (Arabakoan eta beste herrialdeetan ez bezala)  espezie babestuen  katalogazioaren arduradunak ere badira eta esan bezala ez dugu erantzunik jaso.

Eguzki, Euskal Herrian  2015eko abuztuan.