Daily Archives: 2015-10-07

Zabalgarbi da gas gehien isurtzen duen EAEko bosgarren enpresa

albisteak

zabalgarbi 2015 urriaIturria: Berria.

Ekologistak Martxan-en ustez, aitortu baino CO2 isuri gehiago egin ditu errauste plantak. Kontsekuente izateko eskatu dio Eusko Jaurlaritzari.

Zabalgarbiko errauste plantak 223.000 tona hondakin baino gehiago erre zituen 2014. urtean, eta errausketa prozesuan 235.000 tona CO2 isuri zituen. Datu horiek aztertuta, Ekologistak Martxan elkarte ekologistak ohartarazi du Zabalgarbi Arabako, Bizkaiko eta Gipuzkoako enpresa kutsatzaileenen artean dagoela. Areago, zehaztu du berotegi efektuko gas gehien isurtzen duen bosgarren enpresa dela.

Ekologistak Martxan-ek bi iturrietatik eskuratu ditu aipatu datuak: PRT Isurien Espainiako Errolda eta Zabalgarbiko Ingurumen Zaintzarako Programa. Ordea, isuriak are handiagoak izan zirela salatu du. Hain zuzen ere, datu horietan ez dituzte zenbatzen gai organikoetatik eratorritako hondakinen isuriak: egurra, landareak… Erretako hondakin horien isuriak zenbatuz gero, 375.000 tona CO2 isuri direla zenbatetsi du elkarte ekologistak; horren %58 hondakinen errausketen ondoriozkoa izan zen, eta %42 gas naturala erabiltzearen ondorioz.

Edonola ere, datu ofizialak baliatuta, Ekologistak Martxan-ek jakinarazi du soilik lau enpresak isurtzen dutela CO2 gehiago Araba, Bizkai eta Gipuzkoan: Muskizko Petronorren findegiak, Abantoko ziklo konbinatuko zentralak, Galindoko Ur Araztegiak (Sestao) eta Añorgako Cementos Rezolak.

Eskaria Eusko Jaurlaritzari

Berotegi efektuko gasen isurketa murrizteko konpromisoa hartzea «atzeraezina» dela ohartarazi du elkarte ekologistak. Hartara, egoerak eskatzen dituen erronkekin «kontsekuente» izatea galdegin dio Eusko Jaurlaritzari, eta eskura duena egin dezala. Hau da, enpresa zein erakundeei eska diezaiela isuriak murrizteko neurriak abiarazteko, eta hori lortzeko plan errealak lantzeko.

Ekologistak Martxan-ek zenbait iradokizun egin ditu, Zabalgarbiko kasua aztertuta. Hondakin organikoen bilketa selektiboaren bitartez aipatu CO2 isuriak urritzeko aukera dagoela oroitarazi du, eta gaineratu du gai organiko horiekin konposta egin daitekeela. Konpostatze prozesuan CO2 isurtzen dela aitortu arren, isuri «mantsoagoa» dela azaldu dute, eta azkenean CO2aren zati bat lurrean geratzen dela. Erraustearen kasuan, aldiz, zuzenean atmosferara isurtzen da.

Zabalgarbik errausten duen hondakinaren ia herena organikoa da; %31,3, hain zuzen ere. Zabalgarbiko jatorri organiko erregai horretatik gehiena hiri hondakinetatik hartzen du.

 

2025ean itsasoan hiru kilo arraineko kilo bat plastiko izango dela ohartarazi dute Txilen

albisteak

zabor uhartea 2015 urriaIturria: Berria.

Ocean Conservancy gobernuz kanpoko erakundeak ohartarazi du itsas ekosistemen kontaminazioa hartzen ari den tamainaz. Gaiari heltzeko proiektu orokor bat lantzen ari da Ocean Conservancy.
Ozeanoetara botatzen ari garen plastiko mordoa eten beharra dago”, adierazi du Andreas Merkl Ocean Conservavancy gobernuz kanpoko erakundeko kideak. Hori dela eta, Merklek azaldu du hondakinen kudeaketarako plan orokor bat garatzen ari direla Asiako hainbat lurraldeetan. “Industria, gobernu eta ezarle pribatuen lana koordinatuko ditu ekinbideak”. Proposamenaren helburua da finantza, erakunde eta legezko baldintzak sortzea, ezarle pribatuek Asia Barea eskualdean “ozeano inteligenteak” eta hondakinen kudeaketarako sistemak garatzeko. 

Industria eta zientziaren mundua batzen dituen Trash Free Seas elkarteak hartuko du bere gain enpresa handiak, GKEak eta instituzio publikoak koordinatzeko ardura. “Proiektua martxan jartzeko 2,4 milioi dolar beharko ditugu, eta espero dugu horrela itsasoan dagoen plastiko olatua murriztea”.

Ocean Conservancyk proiektua aurkeztu du Valparaisoko (Txile)Our Ocean (Gure ozeanoa) konferentzian. Astelehen eta asteartean ospatu da bilkura. Bertan gizarte, politika eta akademia munduko 400 lagunek baino gehiago parte hartu dute, besteak beste, John Kerry AEBetako Estatu idazkaria. Bilkuraren helburu nagusia da erabakiak hartzea legez kanpoko arrantzari, itsasoen plastiko kutsadurari, ozeanoen azidotzeari eta aldaketa klimatikoari aurre egiteko. “Ez ditugu diskurtsoak nahi, biodibertsitatea zaintzeko konspromisoak nahi ditugu”, adierazi du Herald Muñpz Txileko Atzerri ministroak.

Zabor uharteak

Ozeano Barean, gutxienez Iberiar penintsularen tamaina duen zabor uhartea dago. Askotariko zaborra pilatzen da, baina plastikoa da gehiena, plastikozko askotariko objektuak, polimeroak. Eta hori da larriena, askoren iritziz. Plastikoa ez da biodegradagarria. Ez da desagertzen. Txikitu bai, xehatu, birrindu. Baina, mikroskopioaren azpian jartzeko moduko laginak bihurtuagatik, ez dira desagertzen.

Eguzkiak eta urak urteak eta urteak behar izaten dituzte, esaterako, plastikozko botila bat birrintzeko. Baina objektuak, azkenean, planktonaren tankera hartuko du. Hori da zabor orban erraldoia, plastikozko partikulak, milioika eta milioika.

Duela urte batzuk ere jakinarazi dute Ozeano Atlantikan beste zabor uharte bat badagoela. Oraindik ez dakizkite neurri zehatzak, baina uste dute Texasko estatuaren bikoitza izan daitekela. Plastikozko partikulen pilaketa mardulenean kilometro koadroko 200.000 pieza atzeman dituzte, gehienak zentimetroko diametrokoak baino txikiagoak.

Plastikozko planktonak osatutako uhartetzar hauek oso arriskutsuak dira, benetako elikagaiekin nahasten dituztelako arrainek. Hala, zaborra arrainen eta haiek jaten dituzten ugaztun handien elikagai katean sartzen ari dela dela uste dute adituek.

Kontuan izan behar da gehiegizko arrantza, ozeanoen azidotzea, klima aldaketa eta ozeanoen plastiko kutsadura azken 50 urtetan sortu diren arazoak direla.