Eguzkik Ulia-Jaizkibel itsas babesgunea errebindikatuko du datorren igandean, hilaren 28an, Zurriolako pasealekuan paratuko duen erakusketa baten bidez. Errebindikazioa Nazio Batuen Erakundeak aurki egin behar duen goi-bileraren lorratzean dator; izan ere, Nazio Batuen Erakundeak ozeanoei buruzko goi-bilera egingo du ekainaren 5 eta 9 bitartean, New Yorken.
2015ean Parisen egin zen klima-aldaketari buruzko goi-bileraren kasuan bezala, egun horietan, Eguzkikook, mundu zabaleko gainerako ekologistekin batera, New Yorken har daitezkeen konpromisoei adi egongo gara. Baina, “global pentsatu, lokal jokatu” filosofia beti gogoan, ez diogu horregatik gure gertuko inguruari begirik kenduko, eta, horren ondorioz, hemen ere konpromiso zehatzak hartu egin behar direla errebindikatuko dugu. Eta hartu beharreko konpromiso zehatz horietako bat da Ulia-Jaizkibel itsas babesgunea deklaratzea, argi eta garbi.
Proposamen zientifikoa
Ozeana Fundazioak eta Euskadiko Biologoen Elkargo Ofizialak 2010ean aurkeztu zuten Donostia eta Biarritz bitartean korridore ekologiko bat eratzeko proposamen zientifikoa, Natura 2000 Sarearen barruan. Proposamenak aurreikusten du 13.000 hektarea inguruko itsas babesgune bat deklaratzea Jaizkibelgo eta Uliako kostan. Inguru hori oso aberatsa da. Oceanak eta EBEOk mila espezie baino gehiago atzeman dituzte bertan. Horietatik 50 inguru babestuta daude, identifikatu dituzten habitetatik 12 babestuta dauden bezala. Horrez gain, Kantauri itsasoan parekorik ez duten forma geologikoak ere aurkitu dituzte. Gobernu frantsesak Lapurdiko kostaldean dagoeneko hainbat itsas babesgune deklaratu dituela kontuan izanda, 27.000 hektarea inguruko babesgune-sarea osatuko litzateke Donostia eta Biarritz bitartean. “Atlantiko europarreko itsas korridorerik garrantzitsuenetakoa izango litzateke, baita aniztasun handienetakoa ere”.
Proposamena ongi hartu dute Eusko Legebiltzarrak, Eusko Jaurlaritzak, Gipuzkoako Foru Aldundiak, Donostiako, Oreretako, Pasaiako eta Lezoko udalek, Euskal Eurohiria Garatzeko Mugaz Gaindiko Agentziak… eta elkarte ekologista eta naturzale guztiek, jakina. Beraz, itxuraz behintzat, adostasun zabala dago. Alabaina, dagoeneko 2017an gaude, eta ez dirudi propoamenak aurrera egiten duenik.
Egin gure partea
Nazio Batuen Erakundearen Batzar Nagusiko presidente Peter Thompsonek zera esan du: “New Yorkeko goi-bileran, gizateria ozeanoen egoerari buelta ematen hasiko den unearen lekuko izango gara”. Horretarako, baina, konpromiso zehatzak hartu beharko dira, maila guztietan. Bada, Ulia-Jaizkibel itsas babesgunea deklaratzea egoerari buelta emateko ahalegin horretan gure partea egiteko prest gaudela adierazteko modu bikaina litzateke.
Eguzki, 2017ko maiatza
