Oso isurketa ikusgarria Amezketan

Amezketa errekako urak gorriz tindaturik jaitsi ziren atzo, argazkian ikus daitekeen bezala. Antza denez, kolore ikusgarri hori Aralar paper-fabrikak eginiko isurketa baten ondorio izan zen.

Tolosaldeko Atariak informatu zuenez, Urako teknikariak lanean ari ziren “kutsadura areagotu ez dadin”; Ertzaintzak, berriz, “animalia guztiak onik daudela” esan zuen (https://ataria.eus/amezketa/1501234243110-kolore-gorriz-bustia-esnatu-da-amezketako-erreka)..

Tira, animalia guztiak “onik” bazeuden, Ertzaintzak esan bezala, isurketak kalterik egin ez zuen seinale, baina isurketak kalterik egin ez bazuen, zergatik ari ziren Urako teknikariak lanean kutsadura ez areagotzeko? Ez da oso mesfidatia izan behar ondorioztatzeko isurketa ez zela inola ere inokuoa izan, instalazio industrialetan “istripuz” sarriegi gertatzen diren gainerako isurketak inokuoak ez diren bezala.

Beraz, segimendua egin beharko da, baldin eta isurketaren ondorioei benetako neurria hartu nahi badiegu.

Eguzki, 2017ko uztaila

Egunotan Donostian barrena zirkulatzen ikus dezakegu bizkarrean Illunbeko zezenketen publizitatea daraman autobus bat. Eguzkiren iritziz, lotsaren udal autobusa da.

Izan ere, lotsagarria da Udalak autobus bat uztea (diru trukean bada ere) animalien eskubideak modurik ankerrenean urratzen dituen ikuskizun bat sustatzeko. Alde horretatik, behintzat, garbi dago gure agintarien etika herren dabilela.

Baina are lotsagarriagoa da kontuan izanda Espainako Gobernuak betoa jarri diola 10.000 donostiarrek zezenketei buruz eskatutako galdeketari. Izan ere, Udalak ez du fundamentuzko ezer ere egin beto honen aurrean, eta, gainera, udal ondarea uzten jarraitzen du (oraingoan autobus bat) publizitatzeko hainbat donostiarrek batere gogoko ez duten ikuskizun hori, ez behintzat udal instalazioetan.

Beraz, Udalaren hipokresia salatu beharrean gaude, batetik, donostiarrok zezenketei buruz dugun iritzia galdeketa baten bidez jakin nahi duela esaten duelako, baina, bestetik, Estatuak galdeketa horri jarritako betoaren aurrean ezer egiten ez duelako eta, gainera, ikuskizun odoltsu hori sustatzeko ondarea uzten jarraitzen duelako.

487 zenbakia duen autobusa lotsaren udal autobusa da.

Honako hauen ezpalekoa da: