Oria ibai-ertzean dauden barandak aprobetxatzeko eta beheko partean saretak jartzeko eskatu dio Eguzkik Tolosako Udalari. Sareta hauek (txapa garbanizatu zulatua) hainbat hondakin uretara erortzea eragotziko lukete, besteak beste, tabako-paketeak, tabakoa biltzen duten plastikoak, zigarrokinak, musukoak, paperezko ahozapiak, plastikozko poltsak, plastikozko eta beirazko botilak, azukre eta snack bilgarriak, etab. Sam, Euskaldun berria, Berazubi eta Napar zubiak barne.
Plastikozko botila baranda azpian, Araba etorbidean.
Plastikozko poltsa baranda azpian, Araba etorbidean.
Batzuetan nahi gabe edo istripuz erortzen zaizkigulako baina gehienetan hondakinak lurrera inolako lotsarik gabe botatzeko ohitura gure artean oraindik oso sustraituta dagoelako, hondakin asko dira, haizeak bultzatuta edo, ibaiko uretan bukatzen dutenak.
Zigarrokinak baranda azpian, Berezubi zubian.
Baita Zumalakarregi pasealekuan eta Elkano kalean atseden-banku gisa erabiltzen diren petriletan ere (azken horretan, 80 metro Berazubiko zubitik). Gune horietan, jai eta ekitaldi egunetan utzi egiten dira eta beirazko botila eta plastikozko edalontzi ugari pilatzen dira.
Prebentzio-neurri horiek hiriguneetan, industrialdeetan eta bidegorrietan jarri dira jada, batez ere Urola bailaran, eta, horrela murriztu egin da haizeak ibai-sistemara eramaten duen hondakin kantitate handi baten iritsiera. Gaur egun, ia 6.000 metro dira Zestoan, Azpeitian, Azkoitian, Zumarragan, Urretxun eta Legazpin daudenak. Horietatik, 1.100 metro falta dira Azkoitiko herrian, eta partida bat horretarako bideratu da jada, eta Udalak jarriko du datozen hilabeteetan. Kanpaina xume hau Urolan hasi genuen eta zorionez gainerako arroetara zabaltzen ari da. Lelo honi erantzuten dio: sortu gabeko hondakina da hondakinik onena, garapen jasangarria bultzatuz eta ingurumenari ahalik eta kalte gutxien eraginez. Gure ibaietan eta, ondorioz, itsasoan sortzen duten arazo handiari dagokionez, zalantzarik gabe, hondakinik onena uretako ekosistemetara iristen ez dena da.
Kanpaina hau zabaltzeko konpromisoari berriro helduz, lanean ari gara Oarsoaldean, Deban eta Orian instalatuak izan daitezen. Izan ere, herri batzuetan gaur egun jarrita ikus ditzakegu. Erraz jartzen dira, eraginkorrak dira eta ez dira Udalentzat batere garestiak
Azpimarratu nahi dugu horrelako neurriak hartzea oso garrantzitsua iruditzen zaigula, ibaiaren eta gure kostaldearen kalitate ekologikoa hobetzeko helburua baitute. Azken hori, berez, oso zigortuta dago zabor kopuru handiarekin.
Era berean, Oria ibaiaren inguruko baranden aurrean dauden birziklatzeko zakarrontziak lekuz aldatzeko eskatu dugu, helburu berarekin: hondakinak ibaira ez iristea.
Gainezka dauden birziklatzeko zakarrontziak Iurre auzoan, Euskaldun berria zubiaren aurrean.
Gainezka dauden birziklatzeko zakarrontziak Iurre auzoan, Euskaldun berria zubiaren aurrean.
Eguzki, 2022ko urtarrilean
