Category Archives: albisteak

Negozioa egiteaz gain Bastida «garatzea» lortuko dutela diote golf zelaiaren sustatzaileek

Bastidan (Araba) egin nahi den golf zelaiaren eta urbanizazioaren egitasmoaren helburua negozioa egitea dela aitortu du San Gines Labastida sozietate anonimoak. Nolanahi ere, «Bastidaren eta Arabako Errioxaren garapen ekonomikoa eta turistikoa» bultzatu nahi dutela nabarmendu du sozietateak.«Sustatzaileek egitasmoaren etorkizuneko kudeaketan parte hartu nahi dute. Golf zelaia funtzionatzea nahi dute, eta, horretarako, Bastidako suspertze ekonomikoan inplikatuko dira garapen agentzia baten bitartez», esan du egitasmoa bultzatzen duen talde teknikoak.

Golf zelaia La Bastida2003. urtean sortu zen Bastidan 18 zuloko golf zelaia eta 750 txalet inguru egiteko asmoa, eta San Gines Labastida sozietatea eratu zen egitasmoa sustatzeko. Bastidako PPko Udalak begi onez ikusi zuen egitasmoa, Labastida Gestion Municipal elkartea sortu zuen, eta 535.000 metro koadro udal lurzoru eskaini zituen egitasmoan parte hartzeko.

San Gines Labastida elkarteko aholkulari teknikoek agerraldia egin zuten atzo Gasteizen, egingo dituzten urratsak azaltzeko. Halaber, proiektuak eragin duen polemikari aurre egin nahi izan zioten. Izan ere, egitasmoarekin ez dute bat egiten Bastidako herritar ugarik, eta iragan urtean, Torrolate elkartea sortu zuten, «Toloño mendia eta bertako inguruak babestu, interes espekulatiboei aurre egin, eta gutxi batzuk guztiona den ingurunearekin aberastu ez daitezen». Dagoeneko, 3.000 sinadura baino gehiago jaso dituzte egitasmoaren kontra, Arartekoaren babesa eskatu dute, eta agerraldiak egin dituzte Arabako Biltzar Nagusietan eta Eusko Legebiltzarrean auziaren berri emateko.

San Gines Labastida sozietateko aholkulari taldeak, baina, egitasmoa «legezkoa» dela nabarmendu zuen atzo. Egitasmoaren aholkulari juridiko Alfonso Fernandez de Troconizek eta aholkulari taldeko zuzendari Avelino Fernandez de Quincocesek azaldu zutenez, iragan martxoan, Bastidako Udalak herriko Hirigintza Antolamenduko Plan Orokor berri bat onartu zuen, golf zelaia eta urbanizazioa eraikitzeko behar diren hirigintza aldaketak jasotzen dira.

ATZERA BOTA ZUTEN. Bastidako golf zelaia eta urbanizazioaren egitasmoa ahalbidetzeko Udalak iragan urtean aurkeztu zuen plana atzera bota zuen Arabako Foru Aldundiak. Besteak beste, urbanizazioak Natura 2000 Sarean bildutako guneak eta erabilera publikoko mendiak okupatzen zituela adierazi zuen Diputazioak. Bestetik, Eusko Jaurlaritzak ohartarazi du golf zelaiak buruaskiak izan behar direla eta ezin direla urbanizatze prozesuekin lotu.

Baldintza horiek guztiak betetzen dituztela nabarmendu zuten atzo San Gines Labastida sozietateko teknikoek, eta hasierako egitasmoan hainbat aldaketa egin dituztela. Hala, Natura 2000 Sarean dauden lur eremuetan egingo diren 50 txalet inguru baztertu egin dituztela esan zuten, eta azpiegitura pribatua bada ere erabilera publikoa izango duela esan zuten. «Edozein sartu ahal izango da golf zelaian», esan zuen Fernandez de Quincocesek. Bestetik, urbanizazioaren eta golf zelaiaren kudeaketa banatu egingo dituztela ohartarazi zuen: «Etxebizitzak eraiki egingo dira, nahiz eta golf zelaia ez egin; hala aurrez ikusita baitago Errioxako Plan Orokorrean».

Sei edo zazpi hilabeteko epean Jaurlaritzaren eta Arabako Foru Aldundiaren Ingurumen Sailek udal plana legezkoa den ebatzi beharko dute. Administrazioek egitasmoa onartuz gero, bi edo hiru urteko epean golf zelaia zabalduko litzatekeela aurreratu dute sustatzaileek.

Ordizian ez da golf zelaiari buruzko galdeketarik egingo

Ordiziako Udalbatzak (Gipuzkoa) atzera bota zuen joan den astean Oiangu Bizirik elkarteak herri galdeketa egiteko egin zuen eskaera. EAJ-EAk eta PSE-EEk bozkatu zuten kontra; Ezker Batua, berriz, galdeketa egitearen alde agertu zen. Oiangun egiteko asmoa duten golf zelaiaren egitasmoari buruz galdeketa egiteko eskatu zuen elkarteak. Eskaera hori babesteko 1.454 sinadura lortu zituzten ordiziarren artean. Udalak duela bi urte eman zion Oiangu ustiatzeko 40 urteko baimena Ikena SM enpresari. Golf zelaia ez ezik, igerilekua, hotela, jatetxea, eta paint-ball zelaia ere eraiki nahi dituzte. Oiangu Bizirik elkarteak parkea pribatizatzea egotzi dio Udalari.

Jaurlaritzak Ingurumen Planaren emaitzak desitxuratu egin dituela salatu du Eguzkik

Kyotoko Protokoloa betetzeko asko falta izateaz gain ingurumena «larri» dagoela esan du Eguzkik. Gainera, talde ekologistak ohartarazi du Eusko Jaurlaritzako Ingurumen Sailak datuak «desitxuratu» nahi izan dituela, 2002-2006 EAEko Ingurumeneko Esparru Programaren interpretazio positiboa zabaltzeko.

Eusko Jaurlaritzako Ingurumen sailburu Esther Larrañagak iragan astean emaniko datuak jaso eta berriz aztertu ditu Eguzkik. Atzo azterketa horren ondorioak jendaurrean aurkeztu zituen. Taldeko bozeramaile Alberto Friasek adierazi zuenez, ingurumenari lotutako gai ororekin «alegiazko errealitatea» osatzen ari da Jaurlaritza, eta irudi horrek benetako datuekin eta eguneroko jarduerarekin ez duela bat egiten ohartarazi zuen.

KONTRAESANAK ATZEMAN DITUZTE. Izan ere, Alberto Friasen aburuz, «zeharo kontrajarriak» dira 2002-2006 Ingurumeneko Esparru Programaren datuak eta sailburuak horien inguruan eginiko balorazioa. Ingurumenaren kalitatea hobetu egin dela adierazi zuen Esther Larrañaga Ingurumen Sailburuak iragan astean Eusko Legebiltzarrean egin zuen agerraldian, eta ekonomiaren hazkundeak ez dituela handitu ingurumenari eginiko kalteak.

Aldiz, Friasen hitzetan, ingurumenaren eta baliabide naturalen adierazle nagusi guztiak negatiboak dira; alegia, uraren, energiaren eta baliabide materialen kontsumoa eta lurraren artifizializazioa. Hortaz, Eguzkiko kidearen esanetan, Araba, Bizkaia eta Gipuzkoa «herrialde zikinak, xahutzaileak eta zaratatsuak» dira. Eusko Jaurlaritzak planean zehaztutako helburu bakar bat ere ez duela bete zehaztu zuen.

Hala, hiri hondakinen kopurua urtetik urtera handitu egin dela nabarmendu zuen Friasek, eta 1998. urtean herritar bakoitzeko 491 kilo hondakin sortzen zirela eta 2005. urtean, berriz, 560 kilo. Industriak eragindako hondakin arriskutsuen kopurua ere igo egin dela adierazi zuen Eguzkiko kideak. Nekazaritza eremuan, berriz, nekazaritza ekologikoari zuzentzen zaion lur eremua Espainiako beste erkidegoetan baina askoz txikiagoa dela esan zuen.

Energiaren arloan, Friasek azpimarratu zuen energiaren kontsumoa %39 igo dela azken urteotan, eta energia berriztagarrien ekarpena %86 igo bada ere, kontsumo osoaren %4,4 bakarrik dela. Halaber, biztanle bakoitzak duen baliabide materialen beharra 79 tonatik 96 tonara igaro da 1990. urtetik 2004. urtera.

ADIERAZLE LARRIENAK. Nolanahi ere, Eguzki taldearen irudiko, ingurugiroaren egoera larriaren erakusle nagusiak berotegi efektua eragiten duten gasen emisioak handitzea eta lurraldearen artifizializazioa dira. Izan ere, 1990 eta 2005 urteen bitartean, gas isurtzea %24 igo zen. Gainera, Araban, Bizkaian eta Gipuzkoan berotegi efektua duten CO2 gasen isurtzea 12,2 tonakoa da biztanle bakoitzeko. Ordea, Espainiako bataz bestekoa 10 tonakoa da, eta Europako Batasunekoa 11 tonakoa. Bestetik, Eguzkik egin azalpenaren arabera, etxebizitzak egiteko lurzoruaren okupazioa %33,5 igo da 1994. urtetik, jarduera ekonomikoek okupatutako lurzorua %51,2 igo da, eta garraio azpiegiturei zuzendutakoa %9,5.

«Eusko Jaurlaritzak planean zehaztutako helburu bat ere ez du bete, eta ingurumena egoera larrian dago» «Gaur egun, Araba, Bizkaia eta Gipuzkoa herrialde zikinak, xahutzaileak eta zaratatsuak dira» Alberto Frias Eguzkiko bozeramailea.

Hirigintza eredua salatuko dute Lurraren Egunean

Lurraren Eguna ospatuko dute mundu osoan larunbatean, hilaren 21ean eta, Euskal Herriko dozenaka eragilek osatutako Lurra Deialdiak, Bakion egingo dutela iragarri zuen atzo, Bilbon eginiko agerraldian.
Lurraren Eguna ospatuko dute mundu osoan larunbatean, hilaren 21ean eta, Euskal Herriko dozenaka eragilek osatutako Lurra Deialdiak, Bakion egingo dutela iragarri zuen atzo, Bilbon eginiko agerraldian. Aurtengo gai nagusia etxebizitza izango dela iragarri zuten, izan ere, «gizartearena ez ezik, lurrarentzat ere arazoa» delako. Horregatik, hain zuzen ere, Hirigintza Basatiak eta Espekulazioak Kaltetutako Herrien asanbladaren esku utzi dute Lurraren Eguna antolatzea.

Alberto Frias Eguzkiko kideak esan zuenez, Hego Euskal Herriko erakundeek darabilten etxebizitza politikak «ez dio jendearen beharrari erantzuten, espekulazioarekin aberasten direnei baizik». Horren harira, herri ugarietan egin asmo dituzten etxebizitza kopuru «neurrigabeak» zerrendatu zituen, «Getxon 8.700, Bakion 1.900, Lezon 1.200, Lutxanan 2.800, Orion 500, Lezaman 734 eta 800 Bastidan». Udalerri batzuetan, gainera, egun dauden etxeen kopurua biderkatu dutela nabarmendu zuen.

Adibide gisa aipatutako proiektu horiek ingurumena kaltetuko dutela salatu zuen Friasek eta, «kasu askotan, kulturan ere eragina izango» dutela gaineratu zuen. Onartezina da, azaldu zuenez, biztanleria behera egin duen bitartean etxebizitza kopurua %27 handitu izana. Azkenik, Espainiako kostaldeetan antzeman dituzten iruzurren parekoak «etxe ondoan» ditugula ohartarazi zuen.

EKIMEN BERRIA. Goizeko 11:30etik aurrera hasiko dira ospatzen larunbatean Lurraren Eguna Bakion. Ibilaldia egingo dute herrian zehar, eraikuntza proiektuak ezagutarazteko. Ekitaldi nagusia, baina, eguerdiko 13:30ean egingo dute, herriko pilotalekuan. Bertan, «hirigintza basatia maila guztietan, epaitegietan, erakundeetan eta kalean» salatzeko ekimen berria aurkeztuko dutela iragarri zuten. Bestetik, hitzaldiak, herri bazkaria eta kontzertuak izango dira herrian.

Erraustegiaren kontrako manifestazioa deitu dute martxoaren 3rako, Donostian

Erraustegiaren kontrako hainbat eragilek manifestazioa deitu dute datorren martxoaren 3rako. Donostian izango da arratsaldeko 17.00etan, Anoeta futbol zelaiaren ondoan, “Alternatibak badaudelako errausketarik ez, ez Zubietan eta ez inon. Galdetu herriari errausketa nahi duen ala ez” lemapean.CCOO, ELA, EHNE, ESK, LAB, STEE, Ezker Batua Berdeak, Aralar, Batasuna, Zutik, Eguzki, Ekologistak Martxan eta Greenpeacek erraustegiaren kontra hitza hartzeko deia luzatu diote euskal gizarteari larunbatean Donostian egingo den manifestazioa baliatuz.

Donostian egindako agerraldian, Gipuzkoako Aldundian eta mankomunitateetan dauden politikari “arduratsuak” hauteskundeekin “kezkati” daudela esan dute, baina haien helburu bakarra erraustegia jartzea dela.

“Badakite zaborrari irtenbidea bilatzeko modu alternatiboak, askoz ere azkarragoak eta merkeagoak direla, baina ez dute nahi euren kontrolpean ez dagoen inork martxan jartzerik. Badakite jendeak ez duela erraustegirik nahi, baina ez dira ausartzen herri galdeketa egitera, Gipuzkoan hori egin den leku guztietan ezezkoa gertatu baita”, esan dute.

Europako Parlamentuak erraustegiaren aurka erakutsitako jarrera era gogoan izan dute manifestazioaren deitzaileek: “Duela gutxi onartutako direktiban, zaborra gutxitzeari, berrerabiltzeari eta birziklatzeari lehentasuna eman dio berriro ere Europak”, gogorarazi dute, baita erraustegiak dakartzan ondorioez ohartarazi ere.

Politikariek Plan Alternatiboaren aurrean erakutsitako utzikeria salatu dute, baina herritarrek “politikarien aurretik goazela demostratuko dugu berriro ere”.

Hartara, datorren larunbatean Donostiako Anoeta futbol zelaitik abiatuko den manifestazioan parte-hartzeko deia egin dute.

FRACKING: apustu arriskutsua

Fracking-aren inguruko hitzaldia eta solasaldia.

fracking gatika1 hitzaldia

FRACKING EZ BIZKAIA Plataformak teknika hau zertan datzan azalduko du eta baita honek dauzkan inpaktua negatiboak bai ingurumenean eta baita giza osasunean. Horretaz gain, Bizkaiko Lurralde Historikoan aurreikusita dauden proiektu eta baimenen inguruko ikuspegi zabala emango du. Hitzordua: Ostailak 25,astelehena, arratsaldeko 19:00etan Gatikako Gaztetxoko aretoan.