All posts by Barakaldo

Ez dira Gabon sari bat ematen ari, aspaldiko zor bat kitatzen baizik (Lasarte-Oriako eta Usurbilgo ur zikinak biltzeko kolektore bat eraikiko dute)

Cristina Narbona Ingurugiro ministroak orain dela gutxi (abenduaren 22an) iragarri duenaren arabera, 2008an Lasarte-Oriako eta Usurbilgo ur zikinak biltzeko kolektore bat eraikiko dute.
Colector Donostialdea, 2008Cristina Narbona Ingurugiro ministroak orain dela gutxi (abenduaren 22an) iragarri duenaren arabera, 2008an Lasarte-Oriako eta Usurbilgo ur zikinak biltzeko kolektore bat eraikiko dute. Kolektore horrek, 27 milioi euroko aurrekontua duenak, ur zikin horiek Loiolako araztegira eramatea ahalbidetuko du.

Albistea pozik hartu dugu Eguzkikook eta Lasarte-Oriak eta Usurbilek, Oriara egiten dituzten isuri kutsakorren bukaera gertuago ikusten dugulako. Alabaina, epeak beteko ote dituzten duda egiten dugu. Izan ere, Gipuzkoako ur zikinen saneamendu planek eperik ez betetzea dute ezaugarri nagusietako bat (beste bat, berriz, akats larriak izatea da).

Horren adibidea da Oriako ur zikinen egoera tamalgarria. Alegiatik behera (Tolosa, Ibarra, Villabona, Andoain…) ur zikin guztiak zuzen-zuzenean ibaira botatzen dituzte, inolako tratamendurik gabe. Adunan araztegi bat eraikitzeko asmoa dute, baina 2012a arte ez omen da martxan hasiko, betiere atzerapen berririk ez badago, jakina.

Lasarte-Oriako eta Usurbilgo ur zikinak, berriz, kolektore batean bildu eta Loiolako araztegira bidaltzeko asmoa dute. Hain justu, kolektore horren eraikuntza da Narbonak 2008rako iragarri berri duena. Beraz, kolektore horri esker, Europako araudiaren arabera beranduenez 2001erako tratatu behar zituzten bi herriotako ur zikinak 2010etik aurrera tratatu ahal izango dituzte Loiolako araztegian. Tratatu ahal izango dituztela esan dugu, baina tratatu ahal izango dituzte… edo ez, Loiolako araztegia behar bezala ez dabilelako. Izan ere, inauguratu zutenetik bi urte pasatu diren arren, akatsak direla-eta oraindik urruti dago Urumea bailarako ur zikin guztiak tratatzetik. Zehatz-mehatz, Martutenekoak, Astigarragakoak, Hernanikoak eta Urnietakoak zuzen-zuzenean itsasora doaz, depuratu gabe.

Hau da, Lasarte-Oriako eta Usurbilgo ur zikinak bilduko dituen kolektorea behingoz eraikitzen hasiko direlako, pozik gaude, baina garbi gera bedi: Narbonak iragarri dituen 27 milioi euroko inbertsio hori ez da Gabon sari edo Gabon opari gisa ulertu behar, Gipuzkoako saneamenduarekin aspalditik duten zorra kitatzeko bidean urrats txiki gisa baizik.

Juan Mari Beldarrain. Eguzkiko kidea

Zenbait eragilek deialdi bateratua egin dute presoak Euskal Herrira ekartzearen alde

Donostiako Artzain Onean itxialdian diren Etxerat-eko kideekin izan dira Lokarri, ESAIT, Sortzen-Ikasbatuaz, Emun, Gazte Independentistak, Bai Euskal Herriari, Eguzki eta Elkartzeneko ordezkariak.
Eragileak Euskal presoekin 27-12-2007

Donostiako Artzain Onaren katedralean itxialdian jarraitzen dute Etxerat-eko kideek, euskal preso politikoen egoera larriaz ohartarazteko asmoz, eta atzo sindikatuena bezala, gaur beste gizarte eragile batzuen bisita jaso dute.

Zehazki, Lokarri, ESAIT, Sortzen-Ikasbatuaz, Emun, Gazte Independentsitak, Bai Euskal Herriari, Eguzki eta Elkartzeneko ordezkariak batzartu dira gaur Etxerat-eko kideekin. Haien azalpenak jaso eta gero, bihar egingo diren manifestazioetan eta hilaren 31rako antolatu dituzten elkarretaratzeetan parte hartzeko deia egin dute erakunde horiek guztiek. Lau eskaera zehatz egin dituzte: gaixorik dauden euskal preso politikoak kaleratzeko, zigorrak bete dituztenak aske uzteko, euskal preso guztiak Euskal Herrira ekartzeko, eta presoen zein haien senideek heriotzak eragozteko.

Merkatariak lege egitasmoarekin kexu

Eusko Jaurlaritzaren lege proiektuak saltoki handiak sortzerakoan ez duela ia mugarik jartzen salatu dute.

Prentsaurrekoa, merkataritza, 20-12-2007Arabako, Bizkaiko eta Gipuzkoako merkataritza jarduerak arautzen dituen legearen erreformaren aurka agertu dira hainbat gizarte eragile. Haien irudiko, «banaketa enpresa handien neurrira eginda dago». Horiek horrela, proiektuaurreari hainbat aldaketa egitea eskatzen dute edo orain arteko legearen luzamendua.

ELA, LAB, UGT eta CCOO langile sindikatuak, EHNE nekazarien sindikatua, EKA kontsumitzaileen elkartea, Eguzki talde ekologista eta 70 herritako merkatarien elkarteak dira kexu direnak. Lege horrek lurzoruaren birkalifikazioak errazten dituela salatu dute. Amador Biteri Dendartean Gipuzkoako merkatarien elkarteko kidearen hitzetan, hirien kanpoko aldean nahi beste merkataritza gune zabaltzeko aukera emango du lege berriak. «Nola da posible Larrabetzu bezalako herri batean legeak bost merkataritza gune zabaltzeko aukera ematea?», galdetu zuen. Izan ere, legeak ez dio mugarik jartzen merkataritza guneen kopuruari, eskualde batzuetan biztanleriaren arabera ezarritakoa ez bada. Era berean, esparru handi horiei hiriguneko lekurik onenak ematera behartuko ditu udalak.

ELAko Aintzane Orbegozok, azkenik, legearen aldaketak langileentzat ere ondorio txarrak izango dituela salatu zuen, «saltoki handietako lan baldintzak askoz okerragoak direlako».