Auzitegi Gorenak berretsi egin ditu AHTren aurkako ekintzaileei jarritako zigorrak. Okzitaniako Tolosan 2011n Yolanda Barcinari tarta aurpegira bota zioten. Auzitegi Nazionalak Julio Villanueva, Ibon Garcia eta Gorka Ovejerori bina urteko espetxe zigorra ezarri zien, Mikel Alvarezi urtebetekoa eta 900 euro banako isuna lauroi.
Hemen ekintzaren bideoa:
Informazio gehiago: Gorka Ovejero Ganboa tartalarietako batekin elkarrizketa Reyes Ilintxetak.
Fraisseren heriotza salatzeko afixa (argazkia: Le Nouvel Observateur).
Iturria: Argia.
Okzitaniako Testeteko paduran urtegi bat eraikitzearen aurka protestan ari zela, jendarmeek jaurtitako granada batek Remi Fraisse ekologista hil zuen igandean. Bideo batek gertakarien aurreko eguneko istiluak erakusten ditu.
Gertakariak krisi politikoa eragin du Frantziako Estatuan Le Mondek argitaratu duenez. Proiektua bertan behera geratu da momentuz Naizen arabera eta protesta ugari izan dira, baita Euskal Herrian ere –Bizi! mugimenduak deituta elkarretaratzea egin zuten Baionan asteartean–.
Behean ikus daitekeen ia ordu erdiko bideoa Fraisseren heriotza baino lehen grabatu zuen militante ekologista batek eta larunbatean Testeten izandako istiluak nolakoak izan ziren erakusten dute.
Joan den asteburuan, Polizia frantsesa Okzitaniako Sivens-eko urtegi proiektuaren kontra ari zinenei oldartu zitzaien eta Remi Fraisse gaztea hil zuen. Hilketa hau dela eta, Eguzkikook, ezer baino lehen, senide eta lagunei haien saminarekin bat gatozela adierazi nahi diegu.
Halaber, polizi jazarpena oraingoan ere hiltzeko moduko bitartekoekin egin dela salatu nahi dugu. Alferrik dator orain Bernard Cazeneuve Barne ministro frantsesa esaka istiluen kontrako material jakin baten erabilera bertan behera utziko duela. Triste antzean egin baditu ere, adierazpenok, Remiri, behintzat, ez diote jada ezertarako balio. Gainera, beldur gara ez ote dituen egin gaztearen heriotzak herritarren artean sortu duen haserrea baretze aldera. Guk sinetsi nahi genioke, benetan, baina gure herrian ere horrelako egoerak ezagutu ditugu, eskarmentatuta gaude, eta horregatik, horrelako adierazpenon aurrean, sinesgogorrak izan beharrean gara, ezinbestez. Izan ere, ez al da egia orain dela ez gehiegi gurean antzeko adierazpenak entzun ditugula? Eta, hala ere, oraindik ez da gomazko piloten gaineko debekurik ezarri.
Hasi bezala bukatuko dugu: senide eta lagunei gure elkartasuna. Beti arte, Remi.
Euskal Herria. 2014-10-29
Portesta de Bizi y CADE ante la subprefectura de Baiona
Iturria: Argia.
Remi Fraisse ekologistaren heriotza nola gertatu zen argitzen ari da. France Inforen webgunean irakur daitekeenez, jendarmeek jaurtitako granada batek hil zuela dioen tesia indartzen ari da.
“TNT arrastoak aurkitu ditugu biktimaren arropen artean”, adierazi du Claude Dérens Okzitaniako Albi hiriko prokuradoreak.
Astelehenetik zen jakina 21 urteko gaztea, Testeteko (Okzitania) paduran urtegi bat eraikitzearen aurka antolatutako protestan parte hartzen ari zela, leherketa baten erruz hil zela.
Baina ikertzaileek nolako lehergailua izan den jakin nahi zuten. TNT arrastoak daudela jakinda, eta jendarmeek lehergailu mota hori erabiltzen dutela, hilketaren arduraduna segurtasun indarretako kidea dela baieztatu liteke.
Heriotza salatzeko elkarretaratzea Baionan
Bizi! mugimenduak Remi Fraisseren heriotza salatzeko elkarretaratzea deitu zuen asteartean Baionako suprefekturaren aitzinean.
Mugimendu altermundialistako kide Mattin Ihidopek Info7 irratian azaldu du “bortizkeriarik gabeko erresistentzia” egiten ari zirela Testeteko protesta. “Indarkeria basati hori nahi dugu salatu, ez da posible hildako bat gehiago ukaitea, proiektu hori gelditu behar da”.
Aldarrikapen ekitaldia jai-giroan antolatu duten arren, poliziak manifestarien kontra kargatu du. (Arg: Niooz)
Iturria: ARGIA
Poliziarekin istiluak izan dituzte milaka manifestarik igande goizaldean, Testeteko (Okzitania) paduran urtegi bat eraikitzearen aurka antolatutako protestan.
21 urteko gazte bat hil da bertan poliziak jaurtitako gasaren ondorioz, lekukoek adierazi dutenez.
Aldarrikapen ekitaldia jai-giroan antolatu duten arren, poliziak manifestarien kontra kargatu du.
Jendarmeek gaztea bihotzekoak jota hil dela esan dute, eta gorpua istiluak gertatu eta ordu batzuetara aurkitu dutela.
Datozen egunetarako hainbat mobilizazio antolatu dituzte Frantziar Estatuan gertaera salatzeko.
Iturria: Gara.
Iruñerri, Sakana, Lizarralde eta Goierriko jendea Nafarroako eta Lakuako gobernuengana zuzendu zen, «biek egiten dutelako gauza bera, belarriak tapatu». Donostian osatutako marea gorriarekin, isiltasuna puskatu zuten. Gipuzkoako Foru Aldundiari ere dei egin zioten, autopista elektrikoaren «kontra azaldu bai baina ez delako dituen tresnak erabiltzen ari». Herritarrek aurka daudela erakutsi dutela eta orain politikariek mugitu behar dutela adierazi zuten
33 udalerriren ordezkari, Lizarralde, Iruñerri, Sakana eta Goierriko jendea bildu zen Donostian goi tentsioko linearen aurkako manifestua aurkezteko. Dokumentu hori 200 kolektibo eta 200 hautetsik baino gehiagok sinatu dute, indar politiko guztietakoek.
Arropa gorria jantzita hurbildu zen Donostiara familia, bikotekide eta lagun talde ugari, marea gorria osatzeko asmoz. Hala, aldarrikapena ikusgarri egin eta instituzioei proiektua gelditzeko mugi daitezela eskatu zieten.
Donostiako udaletxearen parean elkartu ziren, bakoitza kartel batekin, defendatu nahi duen herriaren edo dorrearen izenarekin. Ezkio-Itsasotik Deikaztelura 247 dorrerekin osatu nahi du Red Electrica de Españak 400.000 voltioko autopista elektrikoa, eta sinbolikoki 247 pertsonak dorre bana hartu dute. 247 lurkideak dira. Han ikus zitekeen, «autopista elektrikorik ez» etengabeko oihuen artean hainbat herri, kontzeju eta dorre izen: Oteitza, Zirauki, Muru Astrain, Segura, Larraia, 66. dorrea… «Herriak maite ditugulako, defendemos lo que amamos» zen deialdiaren lema.
Bertsotan hasi zuten ekitaldia, «kapitaletik ezezkoaren aldarri» eginez eta «segiko dugu egurra ematen, sekula santan ez segitzeko nahi duten dena egiten» baieztatuz. Gero, Mutiloako alkatea, Iñaki Ugalde, Deikaztelukoa, Inma Hermoso, Doniantsu Mendioroz Muruastraingo herritarra eta Pablo Lorente, lurkideen bertze ordezkari bat, igo ziren taulara Friasekin batera.
«Red Electrica de España enpresak proiektua aurkeztu eta hiru urteren buruan Estatuko administrazioak gaia bideratzen jarraitzen du, herritar gehienen borondatearen aurka eginez», adierazi zuten. Eta Nafarroako eta Lakuako gobernuek ez dietela herritarren aldarrikapenei erantzun salatu zuten.
Gero eta biziago
Hiru urteotan gero eta biziagoa izan da proiektuaren kontrako aldarrikapena: 2011ko abenduan 470 hautetsi bildu ziren Berriozarren; handik urtebetera Altsasuko adierazpena sinatu zuten osasun, kultura, hezkuntza eta kirol alorreko 417 pertsona ezagunek, eta iaz herri galdeketak egin zituzten proiektuak eragina duen 40 herrietan, eta erroldatuen %62,61ek aurka bozkatu zutela ikusita 14.000 alegazio aurkeztu zituzten Estatuko Gobernuak Nafarroan eta Gipuzkoan dituen ordezkaritzetan. Ez diete oraindik erantzun.
Irurtzungo gazte batek, Ikerrek, GARAri agertu zionez, «proiektu txikitzaile ugarik mehatxatzen dute» Sakana: erraustegia, AHT, goi tentsioa, frackinga… Azaldu zuenez, gauza aunitz dira eta ez dago hainbertze jende, horregatik ez da erraza sentsibilizatzea eta mugitzea. Baina atzo Donostiara etorri zen jendea ikusita kontent ziren.
Trikiti doinuekin kalejiran hondartza aldera jo zuten, hondarrean triangelu gorri bat marraztera. Globo gorriak libre utziz eman zioten amaiera ekitaldiari eta triangelua talde txikitan desegin zen.
NATURA 2000 SAREA. Alegazioetan esplikatzen denez, proiektua 127 kilometroko autopista elektrikoa da. Natura 2000 sareko hainbat guneri eta horietako espezie babestuei eraginen lieke eta milaka zuhaitz moztu beharko lirateke.
Zestoako Osinbeltz harrobia
Legegintzaldia hasi zenetik, Gipuzkoan errauskailua inposatu nahi ziguten alderdi politikoen diskurtso politikoa nabarmen aldatu da. Legegintzaldi hasieran, hondakinen plan alternatiboa ez zuten bideragarria ikusten. Oker zebiltzan. Ondoren, politika higatzailea bultzatu zuten, atez atekoaren eta bosgarren edukiontziaren arteko eztabaidan sakonduz. Gaur egun, eztabaida hau agortuta dagoela esan dezakegu. Horregatik, azken aldian, beraien diskurtsoa zabortegien kritikara bideratu dute. Gai honetan, zorrotzenetan zorrotzen beraiek direla sinetsarazi nahi digute (zorroztasun hau denboran atzera eginda nabaria da itxurazkoa eta faltsua dela) eta bide batez, errauskailua eraiki izan balitz, zabortegiaren inguruan dauden arazoez ez genukeela hitz egin beharko esaten digute.
Errauskailuari buruzko azkeneko adierazpena faltsua da. Errauskailuak ez dira zabortegiekiko alternatiba, ezinbestean zabortegia behar baitute. Gainera, zabortegi bereziak behar dira hondakin toxikoak eta arriskutsuak kudeatzeko. Bizkaiara begiratu besterik ez dago, bertan urteak baitaramatzate Zabalgarbiko errauskailuan oinarritutako hondakinen politika egiten eta zabortegiek irekita jarraitzen dute. Gainera, zabortegietako batean, Zallan hain juxtu, errauskailuko zepa irregulartasunez jasotzen dute. Zalantzarik gabe, gai honetan lehen aipaturiko alderdi politiko batzuen zorroztasuna Gipuzkoara bakarrik mugatzen delako.
Zabalgarbiko zabortegia
Noski, baieztapen honek ez ditu ekidingo Gipuzkoako hondakin politika berriaren aurkako erasoak. Eraso hauen egileak, Zubietarako aurreikusitako errauskailuko errautsekin eta zeparekin zer egingo zuten argitzera inoiz heldu ez ziren berberak dira. Aztertu zituzten hipotesietako batzuk larriak izan ziren, esaterako, lurralde osoko errepideetan zabaltzearena. Hondakin politika berriaren barruan, hondakin geldoen biltegia dago. Hondakin geldoei dagokionez, duela urte batzuk PSOEk geldotzeari buruzko proposamena egin zuela gogoratu nahiko genuke. Orain, aldundiak biltegiaren kokapena Zestoako Osinbeltz harrobia izango dela zehaztu duenean, erasoaren estrategia azken muturrera eramango dute.
“Bai, bai, baina zuek zein iritzi duzue biltegi honi buruz?” Gure iritzia, duela bi urte bezalakoa da, hondakinen plan berria baloratu genuenean. Orduan, alderdi onak eta txarrak bereizi genituen.
Aurrera pausoa zela genion, bertan behera utzitako harrobia egokitzeko aukera ematen duelako. Hemen geldialdia egingo dugu iradokizun batzuk egiteko: legez, jabeen betebeharra da ustiatutako harrobiaren berreskurapena. Norbaitek azal dezake bistan dagoenaz haratago zergatik dauden bertan behera utzitako horrenbeste harrobi? Norena da erantzukizuna? Gai honetan non dago zorroztasuna?
Bestalde, desabantailei dagokienean, hondakin geldoak degradatutako inguruneak berreskuratzen erabiltzeko beharrezkoa da ehuneko portzentai batean material biodegradagarria edukitzea eta edozein kasutan, lixibiatuen bilketa osotasunean egitea.
Ohartarazi genuen: Gipuzkoan bertan behera utzitako harrobien gehiengoa kareharrizkoa da eta beraz, iragazkorra. Geldotze eta bilketa prozesua onak izatea ezinbestekoa da, metaketa kaltegarria izan ez dadin. Hau da duela bi urte pentsatzen genuena eta orain ere berdin pentsatzen jarraitzen dugu.
Iturria: AHT Gelditu Tolosaldea
Atzo gauean, Hernialdeko AHTren lanetan “tximinia” izeneko zulo bat dagoela informatu ginen. Tunelean lanean aurrera egin ahala, ezustean gertatzen den zulo mota omen da eta lur ugari erortzen da bat-batean. Ezustekoa esatean, duen arriskua adierazi nahi dugu; dirudienez, kasu honetan ez da istripurik egon baina horrelako gertaera baten aurrean itzulezineko istripu larriak noiznahi ager daitezke.
Tamalgarria bada ere, horrelako berriak izatea, ohikoa dela esan behar dugu. Behin eta berriz, AHTren lanetan ezbeharrak daude eta kasu hau esaterako, iturrien arabera, “ohikoa” da lan hauetan. Hori dela eta, onartezina deritzogu jendeak egunero AHTren lanetan bere bizia arriskuan jartzea, bai lanean ibiltzeagatik, edota bai lanen inguruan bizitzeagatik.
Honekin guztiarekin batera, Anoetan gertaturiko beste “ohiko ezustekoa” aipatu nahi dugu. Bi erreka agortu dira, hau da, Anoetara zetorren Sorgintxulo eta Asteasu aldera zioan Zumalikardi, eta AHTren lanetako ur-arazgailutik Alkiza errekara eginiko isurketen ondorioz, ehundik gora amuarrain agertu ziren hilik abuztuan. Honi, eta abar luze bat ezar geniezaioke gertatzen ari diren beste hainbat ezbehar direla eta.
Beraz, gera dezatela AHT “ohiko ezustekoak” segituan desager daitezen. Argi eta garbi ikusten da hemen, gu geu lurraren zati garela eta lurra bai ala bai errespetatu eta zaindu behar dugu. Gainera, egoera hobera jo beharrean, okerrera doala dakusagu: momentu honetan Estatu Batuak eta Europar Batasuna hain ezkutuan lantzen ari diren TTIPa sinatu eta martxan jarriz gero, geroz eta zailagoa egingo zaigu hainbat egoera lazgarriri aurre egitea.
Tolosaldeko AHT Gelditu! Elkarlana
Eguzki erakunde ekologista eta antinuklearrak Pasaiako ikatzezko zentral termikoaren irudia izan den tximinea botatzen hasi den egunetan Oarsoaldeko eta Euskal Herriko herritarrak zoriondu nahi ditu, zentralaren eraispen eta kutsadura ezabatzeko lanen barruan.
Urte askotan zehar Iberdrolak sortutako era ezberdinetako ingurumeneko eta osasuneko eragin kaltegarriak jasan izan ditugu, klima aldaketaren lantegi honetatik eratorriak. Beti ere, enpresa multinazional honen interesen menpe izan dira denbora guztian.
Iberdolak muzin egin die erakunde publikoek, herritarrek eta talde ekologistek egindako eskaerei, eta gainera enpresa ixteko eta horrek izango zituen ondorioen ardura leporatzen zieten mehatxu moduan.
Aldiz, lantegia ixteko ardura enpresa berak hartu du, eta kasu honetan enpresari oihal gorria jartzen ziotenak eta herrritarrei eta beste taldei ixtearen ondorioen errua botatzen zizkieten alderdiak ixilik gelditu dira erabat.
Ikatzezko zentral kutsakor hau ixtea posible eta bideragarria zela argi gelditu da, energia eta sistema elektrikoaren hornitzearen bermatze aldetik ikusita. Oraingo honetan enpresak duen estrategiaren ondorioz izan da, herritarren eskubideak eta ingurumenaren babesa eta errespetuaren gainetik enpresaren interesak une oro daudela agerian azalduz. Hala ere, eta berandu bada ere, ez dugu aukera galdu nahi hartutako erabakiari ongietorria emateko. Urrats garrantzitsu hau emanda, agintari publikoek %100ean energia berriztagarriez osatutako eta burujabetza energetikoko agertoki berri baten eraikuntza lehenetsi behar dute. Era berean, Iberdrolaren erabaki hau aprobetxatu behar da eredu energetikoa errotik aldatzeko eta klima aldaketaren eraginaren arintzean urratsak emateko.
| 2014.10.22 | EGUZKI talde ekologista eta antinuklearra |
Urriaren 25ean Donostiako Boulevarden 12:00etan etorri gurekin, Itsaso eta Dikastelu goi-tentsioko línea baztertu arte ez gara geldituko.
Sentitzen dugu baina informazioa erdaraz soilik dago
