All posts by Barakaldo

Arabako 70 langile batzordek Garoña ixteko eskatu dute

albisteak

Zentral nuklearraren kontrako manifestazioa egingo dute larunbat honetan Gasteizen. Herrialdeko ehun mila langileren babesa dutela dio Garoñarik gabeko Araba ekimenak. En castellano en Gara.

gara 16-10-2007Arabako ikastetxeetako, erakunde publikoetako eta lantokietako 70 bat langile batzordek Garoñako (Burgos, Espainia) zentral nuklearra ixteko eskatu diote gaur Espainiako Gobernuari, eta larunbat honetan manifestazioa egingo dute Gasteizen, “une erabakigarria delako”. Arabako Foru Aldundiari itxieraren aldeko konpromisoak hartzeko galdegin diote, era berean.

Herrialdeko ehun mila langileren babesa dutela adierazi du Garoñarik gabeko Araba ekimenak, eta babes gehiago jasoko dituela espero du. Haiekin bat egin dute ELA, LAB, ESK, CCOO, UGT, Stee-Eilas, CGT, USO, Hiru eta UAGA sindikatuek.

“PSOEk [2004ko] Espainiako hauteskundeetan Garoña ixteko konpromisoa hartu zuen”, adierazi du Alberto Frias Eguzki elkarteko bozeramaile eta aipatutako Arabako ekimeneko kideak gaur, Gasteizen emandako prentsaurreoan. Zentrala bere garaian 25 urterako zabaldu zutela gogoratu du Friasek, eta epea bukatuta dagoela. “Zentrala ixteko azken bultzada eman behar dio gizarteak”.

Garoña itxi dezaten eskatzeko ekimenak indartuko dituzte

albisteak

Manifestazioa egingo du zentral nuklearraren aurkako plataformak urriaren 20an, Gasteizen.

«Une erabakigarria bizi du Garoñako zentral nuklearrak, eta itxiera agintzeko Gobernuak behar duen bultzada ematen saiatuko gara». Hitz horiekin arrazoitu ditu Araba Garoñarik Gabe plataformako bozeramailea Alberto Friasek datozen hiru astetan egingo dituzten ekimenak. Enpresa Batzordeen bidez Arabako langileen atxikimendua lortzen saiatuko da plataforma. «Garoñaren kontrako adierazpenen artean adar hori falta zitzaigun». Sindikatu guztiak arduratuko dira atxikimenduak biltzeaz, plataformaren baitan baitaude.

Espainiako Gobernuak EAEn duen ordezkari Paulino Luesmarekin biltzeko asmoa dute plataformako ordezkariek datorren astean. Garoñako zentral nuklearraren itxieraren aldeko posta txartelak eramango dizkiote, Arabako gizartearen iritzia izan dezan. Urriaren 20an manifestazioa egingo du Araba Garoñarik Gabe plataformak ekimenei bukaera emateko. Foru Plazan hasiko da, arratsaldeko zazpietan.

Garoñak bizi duen unearen garrantzia azpimarratu zuen Friasek ekimenen berri emateko prentsaurrekoan. «Datorren urteko martxoan Espainiako hauteskunde orokorrak izango dira, hau da, hilabete gutxi gelditzen zaizkie legegintzaldi hasieran agindutakoa betetzeko», gogoratu zuen Friasek. Itxiera azkar egiteko eskatu zuen gainera, zentral nuklear baten itxiera ez baita «egun batetik bestera» egiten. 1.999an hamar urte gehiagorako luzatu zuen Segurtasun Nuklearrerako Batzordeak Garoñako zentralaren ustiapena. Zentrala 2009a baino lehen itxi egin daitekeela argitu zuen Friasek, ordea.

ITXIERAREN EGUTEGIA. Ezker Batuak Garoñaren itxierarako egutegi bat zehazteko eskatu zuen atzo Arabako Biltzar Nagusietan, Araba Garoñarik Gabe plataformak ekimenen berri eman zuen egunean. Espainiako Gobernuak iragarritako itxiera atzeratu dezakeela deritzo Jose Miguel Fernandez EBko bozeramaileak. Hori gerta ez dadin Arabako Foru Aldundiak zer egingo duen galdetuko dio Jose Miguel Fernandezek Arabako Foru Aldundiko Ingurumen Departamenduari.

Euskal Herri ekologistarekiko konpromisoa berritu du Eguzkik

albisteak

1987ko ekainean sortu zen Eguzki talde ekologista, eta atzo urteurrena ospatu zuten, Altsasun
urteurrena

Duela hogei urte sortu zen Eguzki talde ekologista. 1987an, «hamaika arazo» zuen Euskal Herriak ingurumenari dagokionez. 2007an ere, arazoak hamaika dira, Eguzkiren ustez. Hori dela eta, «Euskal Herri libre, burujabe eta ekologistaren alde» duela 20 urte hartu zuten konpromisoa «inoiz baino beharrezkoagoa» ikusten dute. «Eguzkik Euskal Herriarekin duen konpromisoa berritzen du, gure lurraren alde lan egiteko, eta gure herriko pertsona kontziente orori Euskal Herria ekologiatik eraikitzeko gonbita egiten dio».

Eguzki Iruñean sortu zen, duela hogei urte. Eta, Nafarroatik atera gabe, Altsasun irudikatu zuten atzo konpromiso horren berritzea. Eguzki erakundearen egungo eta aspaldiko dozenaka kide bildu ziren Altsasura, urteurrena ospatzera. Eguerdian ekitaldi publikoa egin zuten, eta ondoren herri bazkaria egin zuten, frontoian, non 20 urte horietako borrokak jasotzen duen bideoa ikusi baitzuten.

GARAIPEN HANDIAK ETA TXIKIAK. Eguzkik dio 20 urteren buruan ez datorrela esku-hutsik. «Garaipen handiak lortu izan dira, Lemoizkoa adibidez, bai eta garaipen xumeagoak ere, hala nola gure herri askotako proiektuak gelditzea. Hala ere, gure lurraren kontrako erasoa etengabea da, sistematikoa, geldiezina, eta lanean jarraitzen ez badugu, orain arte egindakoak ez du ezertarako balio izango».

«Euskal Hiria» izena du, Eguzkiren ustez, Euskal Herrian pentsamolde bakarra ezartzeko asmoa. «Euskal Hiria kontzeptu horren azpian, edozein planteamendu ekologista nahiz izaera propioko Euskal Herri baten defentsaren aurkako proiektua ezkutatzen da. Interkonektaturiko hiri erraldoi horrek bere zerbitzura jartzen du lurraldea, eta sakrifikatzen du, eta berarekin dakar hirigintza basatiari lotutako era guztietako azpiegituren ugaltzea. Gainera, hori guztia marketin berde batez hornitzen dute, jasanezina dena iraunkor gisa saldu nahi diguna».

Hogei urtean eginiko lana trinkoa izan dela uste du Eguzkik. «Ekologiaren arazoa gizarteratzea eta euskal gizartean ingurumenaren aldeko jarrera gero eta handiagoa sortzea lortu da. Arazoei aurre egiteko hainbat koordinakunderen jaiotza ikusi izan dugu (Sakana eta Leitzarango autobideen kontrakoak, Garoñakoa, Superportukoa eta Itoizkoa, besteak beste), eta horietako askotan Eguzkik lan ukaezina egin zuen, sorreran lagunduz, gure egoitzak lagaz edo gure lan ahalmena haien alde jarriz».

Euskal Herri libre, burujabe eta ekologikoa lortzeko bidea luzea izanen dela uste du Eguzkik. «Merkatarien Europak, ekonomiaren mundializazioak eta bertako zein kanpoko burgesiak errukirik gabeko atzealdea duen kapitalismo baten alde eginiko apustuak proiektu eutsiezinak ekartzen jarraitzen baitute».

Eguzki, Ekologistak Martxan, Talaia eta Txipio Bai talde ekologistek Lemoizen (Bizkaia) ziklo konbinatuko zentral termikoa egiteko asmoa bazter dezala eskatu diote Iberdrolari…

albisteak

Alde batetik, gasaren bitartez funtzionatzen duen ziklo konbinatuko zentral termikoak klima aldaketaren alde egingo lukeelako, gasak isuriz. Bestetik, Lemoizkoa ez delako «beste energia proiektu bat»: «Osagai historikoak eta soziologikoak ditu. Zauri hori ezin da berriro ireki». Talde ekologistek zentrala dagoen lekuan egin beharrekoari buruzko eztabaida publikoa eskatu dute. Haien iritziz, «herritarrek gozatu eta erabili beharko lukete».

Zentrala
Lemoiz zentrala

Iberdrolak ziklo konbinatuko zentral termiko bat egin nahi du Lemoizko zentral nuklearraren hondakinak dauden tokian. Hala baieztatu zuen Ignacio Sanchez Galan Iberdrolako presidenteak aurtengo martxoaren 28an, Bilbon. Esan zuen Lemoiz leku egokia zela ziklo konbinatuko zentral termiko bat egiteko, eta Iberdrolak baliatu egingo duela zentrala lehenespenez eskuratzeko eskubidea.

IBERDROLAK EROSTEKO LEHENTASUNA. Zentral nuklearra Iberdrolarena zen, baina gaur egun Luzapen Nuklearrerako Funtsarena da. Espainiako Industria Ministerioak zentrala saltzeko asmoa du. Iberdrolaren esanetan, berak zentrala erosteko lehentasuna izango luke: Espainiako Industria Ministerioak jasotako eskaintzarik onena berdinduz gero, zentrala berea izango litzateke. Espainiako Gobernuak oraindik ez ditu zehaztu lehiaketaren oinarriak.

Iberdrolak Lemoizen ziklo konbinatuko zentral bat egiteko asmoa ez da berria. Sabin Arana Bizkaiko Foru Aldundiko Lan eta Prestakuntza diputatuak 2004ko uztailaren 26an eman zuen proiektuaren berri, kargua utzi zuen egunean. «Zentrala 800 megawattekoa izango da, baina 1.600 megawattera arte handitu ahal izango da».

Iberdrolak 1.300 milioi jaso ditu 1994tik 2005era, Espainian luzamendu nuklearra indarrean jarri aurretik egindako inbertsioak berreskuratzeko.

Talde ekologistez gain, Batasunak ere aurre egin dio Iberdrolaren asmoari. Aurtengo apirilean Espainiako Gobernuari eta PSOEri eskatu zion bertan behera utz dezatela Iberdrolaren erosteko lehentasuna. Batasunak esan zuen «ahal duen guztia» egingo duela «inposatu» nahi duten edozein proiektu salatzeko eta hari «aurre egiteko».

Behatokiaren sorrera aztertzeko jardunaldia egin dute, Eguzkik eta Nazio Eztabaidaguneak deituta.

Sailkatu gabea

eguzki

Nafarroa Garaia eta Nafarroa Beherea lotzeko 2×2 errepidea. Altsasuko Zangitu eremuan (Nafarroa) egin nahi duten industrialdea. Bastidan (Araba) golf zelaia egiteko proiektua. Barakaldoko Zuloko-Ibarreta (Bizkaia) hezegunearen desagertzea, saltoki handiak eta errepideak egiteko. Lau proiektu, lau errealitate, lau gatazka. Proiektuaren bultzatzaileen (Administrazioa edo enpresak) eta herritarren edo herritarren taldeen arteko lau gatazka.

Lau horiei buruzko informazioa trukatu zuten atzo Nazio Eztabaidaguneak eta Eguzki talde ekologistak atzo Donostian antolatutako jardunaldian, baina beste hainbat ere izan zitezkeen.

Ingurumen gatazka konponbiderako behatoki baterantz izenburua izan zuen atzoko jardunaldiak. Eta bertan parte hartu zutenek agerian utzi zuten behatoki edo antzeko egituraren bat behar dela proiektu jakin batzuek gizartean eta ingurumenean eragiten dituzten gatazkak bideratzeko.

Euskal Herriko Unibertsitatearen (EHU) Donostiako campusean bildu ziren eta bi arazo nabarmendu zituzten: «Alde batetik, informazioa ez da behar bezala ematen; bestetik, herritarrei proiektuei buruz duten iritzia eskatu zaienetan gero ez dela herritarren borondatea errespetatu. Horrek gatazkak eragiten ditu».

Gatazka, «herri mugimenduek eta administrazioek proiektu zehatzari buruzko interes edo iritzi kontrajarriak dituztelako» edo «proiektu horietan guztietan erabakiak hartzeko moduagatik».

Gatazka horiek konpontzeko eta herritarrek parte hartzeko dituzten aukerak izan ziren jardunaldiaren oinarria: herri galdeketak, parte hartzeko nukleoak edo epaitegiak.

Epaitegiei dagokienez, ondorioztatu zuten oso prozesu luzeak izaten direla eta epaitegiek salatzailearen aldeko epaia eman arren epaia ematerako proiektuak oso aurreratuak edo bukatuta egoten direla. Eta epaitegietako bidea, luzea izateaz gain, oso garestia ere badela. Hala ere, jardunaldian onartu zuten batzuetan epaitegietako bidea ez dela modu egokian erabili zenbait proiekturi aurre egiteko.

 

TRESNA ERAGINKORRIK EZ. Parte-hartzaileen esanetan, herritarrek parte hartzeko tresnak badaude. Herri galdeketak edo parte hartzeko nukleoak, esaterako. Baina Nazio Eztabaidaguneak eta Eguzkik nabarmendu dute parte hartzeko tresnak horiek ez dutela erabakitzeko ahalmenik, eta bertan erabakitakoa ez dela aintzat hartzen. «Ez dira erabakitzeko guneak eta horrek gatazkak areagotzen ditu».

Atzoko jardunaldian ingurumen gatazkak bideratzeko behatokiak izan beharko lituzkeen oinarriei buruz hitz egin zuten. Parte-hartzaileek nabarmendu zuten behatokiak, proiektuei buruzko informazioa gizarteratzeaz gain, erabakiak hartzeko ahalmena izan beharko lukeela, «erabakiak hartu arren erabakiak sinbolikoak ez izateko».

«Hori gatazkan dauden aldeek adostu beharko lukete», Nazio Eztabaidagunearen eta Eguzkiren iritziz. Erabaki sinbolikoetatik haratago, eraginkorra izango litzatekeen egitura bat nahi dute

Nazio Eztabaidaguneak lurraren erabilera demokratikoari buruzko jardunaldia egin zuen iaz. Orduan agerian geratu zen herritarren informazio jasotzeko, iritzia emateko eta erabakitzeko eskubidea. Atzo ere oinarri hori errespetatu egin behar dela esan zuten.

Atzokoa izan zen ingurumen gatazkak konpontzeko behatokiari buruzko lehen eztabaida publikoa. Nazio Eztabaidaguneak eta Eguzki talde ekologistak bat egin dute horrelako egitura baten premian, eta gorpuzteko bidea abiatu dute.

Negozioa egiteaz gain Bastida «garatzea» lortuko dutela diote golf zelaiaren sustatzaileek

albisteak

Bastidan (Araba) egin nahi den golf zelaiaren eta urbanizazioaren egitasmoaren helburua negozioa egitea dela aitortu du San Gines Labastida sozietate anonimoak. Nolanahi ere, «Bastidaren eta Arabako Errioxaren garapen ekonomikoa eta turistikoa» bultzatu nahi dutela nabarmendu du sozietateak.«Sustatzaileek egitasmoaren etorkizuneko kudeaketan parte hartu nahi dute. Golf zelaia funtzionatzea nahi dute, eta, horretarako, Bastidako suspertze ekonomikoan inplikatuko dira garapen agentzia baten bitartez», esan du egitasmoa bultzatzen duen talde teknikoak.

Golf zelaia La Bastida2003. urtean sortu zen Bastidan 18 zuloko golf zelaia eta 750 txalet inguru egiteko asmoa, eta San Gines Labastida sozietatea eratu zen egitasmoa sustatzeko. Bastidako PPko Udalak begi onez ikusi zuen egitasmoa, Labastida Gestion Municipal elkartea sortu zuen, eta 535.000 metro koadro udal lurzoru eskaini zituen egitasmoan parte hartzeko.

San Gines Labastida elkarteko aholkulari teknikoek agerraldia egin zuten atzo Gasteizen, egingo dituzten urratsak azaltzeko. Halaber, proiektuak eragin duen polemikari aurre egin nahi izan zioten. Izan ere, egitasmoarekin ez dute bat egiten Bastidako herritar ugarik, eta iragan urtean, Torrolate elkartea sortu zuten, «Toloño mendia eta bertako inguruak babestu, interes espekulatiboei aurre egin, eta gutxi batzuk guztiona den ingurunearekin aberastu ez daitezen». Dagoeneko, 3.000 sinadura baino gehiago jaso dituzte egitasmoaren kontra, Arartekoaren babesa eskatu dute, eta agerraldiak egin dituzte Arabako Biltzar Nagusietan eta Eusko Legebiltzarrean auziaren berri emateko.

San Gines Labastida sozietateko aholkulari taldeak, baina, egitasmoa «legezkoa» dela nabarmendu zuen atzo. Egitasmoaren aholkulari juridiko Alfonso Fernandez de Troconizek eta aholkulari taldeko zuzendari Avelino Fernandez de Quincocesek azaldu zutenez, iragan martxoan, Bastidako Udalak herriko Hirigintza Antolamenduko Plan Orokor berri bat onartu zuen, golf zelaia eta urbanizazioa eraikitzeko behar diren hirigintza aldaketak jasotzen dira.

ATZERA BOTA ZUTEN. Bastidako golf zelaia eta urbanizazioaren egitasmoa ahalbidetzeko Udalak iragan urtean aurkeztu zuen plana atzera bota zuen Arabako Foru Aldundiak. Besteak beste, urbanizazioak Natura 2000 Sarean bildutako guneak eta erabilera publikoko mendiak okupatzen zituela adierazi zuen Diputazioak. Bestetik, Eusko Jaurlaritzak ohartarazi du golf zelaiak buruaskiak izan behar direla eta ezin direla urbanizatze prozesuekin lotu.

Baldintza horiek guztiak betetzen dituztela nabarmendu zuten atzo San Gines Labastida sozietateko teknikoek, eta hasierako egitasmoan hainbat aldaketa egin dituztela. Hala, Natura 2000 Sarean dauden lur eremuetan egingo diren 50 txalet inguru baztertu egin dituztela esan zuten, eta azpiegitura pribatua bada ere erabilera publikoa izango duela esan zuten. «Edozein sartu ahal izango da golf zelaian», esan zuen Fernandez de Quincocesek. Bestetik, urbanizazioaren eta golf zelaiaren kudeaketa banatu egingo dituztela ohartarazi zuen: «Etxebizitzak eraiki egingo dira, nahiz eta golf zelaia ez egin; hala aurrez ikusita baitago Errioxako Plan Orokorrean».

Sei edo zazpi hilabeteko epean Jaurlaritzaren eta Arabako Foru Aldundiaren Ingurumen Sailek udal plana legezkoa den ebatzi beharko dute. Administrazioek egitasmoa onartuz gero, bi edo hiru urteko epean golf zelaia zabalduko litzatekeela aurreratu dute sustatzaileek.

Ordizian ez da golf zelaiari buruzko galdeketarik egingo

Ordiziako Udalbatzak (Gipuzkoa) atzera bota zuen joan den astean Oiangu Bizirik elkarteak herri galdeketa egiteko egin zuen eskaera. EAJ-EAk eta PSE-EEk bozkatu zuten kontra; Ezker Batua, berriz, galdeketa egitearen alde agertu zen. Oiangun egiteko asmoa duten golf zelaiaren egitasmoari buruz galdeketa egiteko eskatu zuen elkarteak. Eskaera hori babesteko 1.454 sinadura lortu zituzten ordiziarren artean. Udalak duela bi urte eman zion Oiangu ustiatzeko 40 urteko baimena Ikena SM enpresari. Golf zelaia ez ezik, igerilekua, hotela, jatetxea, eta paint-ball zelaia ere eraiki nahi dituzte. Oiangu Bizirik elkarteak parkea pribatizatzea egotzi dio Udalari.