Category Archives: albisteak

Zigor handiak ezarri eta atxiloketak agindu ditu Auzitegiak 18/98 auzian

albisteak

Espainiako Auzitegi Nazionalak 46 laguni 527 urteko kartzela ezarriko diela iragarri dute agentziek.

Espainiako Auzitegi Nazionalak 18/98 auzian epaitutako 52 lagunetatik 46 atxilotzeko agindua eman zuen atzo, eta atzo eguerdian bertan hasi ziren Espainiako poliziak eta guardia zibilak agindua betetzen. Edizio hau ixterako orduan, gutxienez 27 auzipetu atxilo eramanak zituzten. Horietako 16 Soto del Realen espetxeratu dituzte. Beste hiru, Iker Beristain, Ana Lizarralde eta Imanol Iparragirre, preso dituzte lehendik. Epaia kaleratu aurretik agindu ditu atxiloketak Auzitegi Nazionalak. Berri agentziek auzitegiko iturriak aipatuz kaleratu dutenez, abenduaren 10ean egingo da publiko sententzia. Hala ere, atzo bertan hasi ziren filtrazioak. 46 auzipetu horientzat 527 urte eta 6 hileko espetxe zigorra ezarriko dela jakinarazi zuten. Iturri horien arabera, auzipetuetako 14ri ETAko buruzagi izatea egotzi eta 196 urte eta 6 hileko zigorra ezarri diete guztira; 17ri erakunde armatuko kide izatea leporatu eta 196 urteko zigorra jarri diete; 13ri ETAri laguntza ematea egotzita 127 urtekoa; biri, beste launa urteko zigorra gehitu diete, delitu ekonomikoak egin dituztela argudiatuta. Epaia kaleratu gabe egon arren, badaezpadako neurri gisa agindu du auzitegiak akusatuak aurrez atxilotzea, sententzia, «laister» kaleratuko dela eta auzipetuek ihes egiteko «arrisku handia» dagoela argudiatuta.

Auzitegiak ez du epaitu guztiak atxilotzeko agindua eman. 52 lagunetik sei ez dituela atxilotuko jakinarazi du: Maite Mendiburu, Oiakue Azpiri, Marta Perez, David Soto, Jaime Iribarren eta Jose Ramon Antxia aske utziko dituzte, oraingoz. Berri agentziek auzitegiko iturriak aipatuz ohartarazi dutenez, halere, horrek ez du esan nahi absolbitu egingo dituztenik.

Gainontzekoentzat, «zigor handiak» egongo direla iragarri zuen eguerdian Alfredo Perez Rubalcaba Espainiako Barne ministroak: «Kolaborazioagatik eta erakunde armatuko kide izateagatik zigor handiak ezarriko dira».

 

18 URTE ALEGRIA ETA ELKORORENTZAT. Berri agentziek filtratu dituzte auzitegiak ezarriko dituen zigorrak. Eta aipagarria da, fiskalak eskatu baino zigor handiagoak ezarri dituela. Epaiak ia ehun urtean gainditzen du fiskalaren zigor eskaera. Xabier Alegriari eta Iñigo Elkorori ezarritakoak dira zigorrik gogorrenak. 18 urteko kartzelatzea agindu du epaimahaiak bakoitzarentzat. «Erakunde terroristako buruzagi» izatea egotzita 14 urteko zigorra jarri dio Xabier Alegriari, eta beste 4koa, bahitutako ondasunak saltzeagatik. Fiskalak 13 urteko zigorra eskatua zuen harentzat. Elkorori, 12 urteko zigorra ezarri dio erakunde armatuko kide izatea egotzita, eta beste seikoa Gizarte Segurantzaren aurkako delituak egitea leporatuta.

Carlos Trenor eta Jose Antonio Etxeberria 17na urtez kartzelan sartzeko agindu du epaimahaiak. 13 urteko zigorra ETAko kide izatea egotzita jarri die, eta beste launakoa delitu ekonomikoak leporatuta.

Zigorrik txikienak bederatzi urtekoak dira. Joxemi Zumalabe Fundazioko kideak dira zigor horiek jaso dituzten gehienak, eta ETAri laguntza ematea egotzi die epaimahaiak. ETAko kide izatea akusatuta zigortu dituzten gehienei, 11na urteko zigorra jarri die Angela Murillo buru duen epaimahaiak.

Teresa Todak, atxiloketen ez-ohiko izaera salatu zuen atzo, atxilotua izan aurretik eta auzitegiak ezarri dion hamar urteko zigorra oraindik ezagutzen ez zuenean. «Operazio mediatikotzat» jo zituen atxiloketak, eta ihes egiteko arriskua argudiatu izana aitzakiatzat jo zuen. «Argi dago ez dagoela ihes egiteko arriskurik, 16 hilabeteetan eskatu diguten guztietan egon garelako Madrilen». Epaiketak iraun dituen 16 hilabeteez ari zen. Halaber, auzipetuek mobilizaziorako deia egina dutela gogorarazi zuen, eta «aske daudenei» manifestatzeko eta ordubeteko lanuztea egiteko eskatu zien.

ATXILOKETA SORTA. Alberto Frias izan zen atxilotu zuten lehenetarikoa. Gasteizen atxilotu zuten, eguerdiko ordubiak baino lehen, kide den Eguzki elkarte ekologistaren egoitzan. Ordu bertsuan atxilotu zuten Elena Beloki Espainiako Poliziek Hernanin, Urbieta kalean. Jexuxmari Zalakain ere, atxilotu zuten lehenetarikoa izan zen.

Soto del Real espetxean neska-laguna bisitatu ondoren atxilotu zuten Txema Matanzas, eguerdi aldean. Berri agentziek zabaldu zutenez, 18:00ak inguruan sartu zuten espetxe berean.

Xabier Balanzategi 15:00ak aldera detenitu zuten, Bilbon, lan egiten duen abokatuen bulegoan. Kalekoz jantzitako zortzi bat polizia bulegora joanda eraman zuten.

Ordu bertsuan detenitu zuten Mikel Korta Ordizian, etxean. Zortzi guardia zibil inguru etxera joan, atera arazi, auto batean sartu, eta emazteari esan ziotenez, Intxaurrondora eraman zuten. Hain juxtu, adin gabeko semeari egoera azaltzen ari zitzaion Korta, guardia zibilek atea jo zutenean.

Joxe Mari Olarra Villabonan atxilotu zuten 15:10ean, etxean. Guardia zibilek detenitu zuten. Esposatu, eta autoan sartuta eraman zuten. «Gora Euskal Herria askatuta!» oihu eginda agurtu zituen bertan zirenak.

Nekane Txapartegiren bila ere joan ziren Villabonako etxera guardia zibilak. Baina lanean Bilbon zenez, ez zuten etxean aurkitu. Arratsaldean, Villabonan bertan atxilotu zuten Mikel Egibar. Lagunekin herriko plazan zegoela detenitu zuten, eta tentsio uneak sortu ziren.

Olatz Egiguren, Joxe Garcia Mijangos eta Patxi Gundin Bilboko Santutxu auzoan detenitu zituzten. 15:45ean hartu zuten Egiguren. Gurasoen etxean zegoen eta guardia zibilak zain zituen atarian. Atea jo, eta Egigurenentzat abisua zutela esan zuten guardia zibilek. Etxean zirenak atarira jeitsi ziren eta atxilotu egin zuten auzipetua. Salveko kuartelera eraman zuten.

Gurasoen etxeko atarian atxilotu zuten Garcia Mijangos ere Espainiako poliziek. Zain zituen poliziak, eta gurasoak agurtzeko aukera izan zuen auzipetuak. Indautxura eraman zuten atxilotuta. Neska lagunari, arropa polizia etxera eramateko aukera eman zioten, eta Soto del Realeko kartzelara eramango dutela jakinarazi.

Gundinen senideei ere, Soto del Realera eramango dutela esan zieten. Santutxuko Zabalbide kalean detenitu zuten, etxeko atari ondoan. Aurrez, poliziak gurasoen etxera joanak ziren, bai eta lan egiten duen eskolara ere. Baina lanetik aterea zen ordurako, eta etxe ondoan detenitu zuten.

Ruben Nieto, 16:00ak inguruan detenitu zuten Bilbon, neska-lagunak lan egiten duen LABen egoitzatik atera zenean. Kalekoz jantzitako poliziek atzeman zuten, eta esposatu gabe sartu zuten autora. Juan Pablo Diegez ere Bilbon atxilotu zuten.

Iñaki OShea etxean atxilotu zuten, Barakaldon. Baita Iker Casanova ere. Pablo Gorostiaga eta Isidro Murga Laudion detenitu zituzten. Guardia Zibilak etxean atxilotu zituen Mario Zubiaga, Juan Mari Mendizabal eta Manu Intxauspe. Durangon lehena, Elgoibarren bigarrena eta Oiartzunen hirugarrena.

 

ALEGRIA, LEZOKO ELKARTEAN. Natale Landa Arrasatetik eraman zuten, Joxean Etxeberria Errenteriatik, Xabi Otero Aoizetik. Xabier Alegriaren bila Lezoko elkarte batetara joan ziren 17:00ak aldera kalekoz jantzitako guardia zibilak. Bertatik atera arazi, eta bere gauzen bila joaten utzi zioten gero. Autora sartzera zihoanean maleteroaren kontra jo zuen istripuz, eta zauria egin sudurrean.

Gara-ren Donostiako erredakzioan atxilotu zuten Sabino Ormazabal 18:30ak jotzear zirela. Kalekoz jantzitako poliziak egoitzan sartu eta eraman egin zuten, lankide eta senideen agurren artean.

Bestalde, Javier Salutregi eta Elena Beloki, Espainiako Gobernuak Donostian duen ordezkaritzara eraman zituzten arratsaldean. Handik atera zituzten 17:45ean polizien autoetan.

19:15ean atxilotu zuten Fernando Olalde, Joxemi Zumalabe Fundazioaren egoitzan. Carlos Trenor, Olatz Altuna eta Mikel Aznar auzipetuak ere bertan ziren, baina poliziek ez zituzten atxilotu. Poliziek ez zuten Olalde atxilotzeko agindu judizialik, eta Joxe Mari Elosua abokatuarekin eztabaida luzea izan ondoren, abokatuari atxilotuarekin polizien furgonetan joaten utzi zioten. Aurrez, manifestazioa egin zuten fundazioak egoitza duen Donostiako Egia auzoan, atxiloketak salatzeko.

Bilbon, iluntzean auzia salatzeko manifestazioan egon zen Miriam Campos auzipetua ere. Ez ziren, oraindik, hura atxilotzera joan.

 

 

 

manIFesTazIoa

Bilbo. 18/98ko auzipetuek manifestazio nazionalerako deia egin dute. Bilbon izango da manifestazioa bihar, 12:00etan, Euskal Herriaren eskubideen alde, egitasmo politiko guztiei aukera demokratikoa lelopean. «Erasoaren» aurrean «herri gisa» erantzuteko deia egin dute.

 

 

 

Kepa Landa: «Ez dugu arrazoizko epairik espero»

Kepa Landa 18/98 auziko akusatuen abokatuetako batek argi dauka Auzitegi Nazionalaren epaiak ez duela justiziarekin zerikusirik. «Ez dugu espero epaia arrazoizkoa izatea, ezta arrazoitua ere», adierazi zuen atzo arratsaldean Kepa Landa abokatuak Radio Euskadiko Graffiti irratsaioan. Kepa Landaren ustez, epaimahaiak ez ohizko bidea erabili du atxiloketak agindu dituelako epaia jakinarazi baino lehenago. «Esan ziguten auzipetuei data bat jakinaraziko zietela Auzitegi Nazionalera joan zitezen».

Kepa Landaren ustez, «Auzitegi Nazionala eskandalu publiko bat eragiten ari da atxiloketa hauen bitartez».

 

 

 

aTxILoKeTaK

“18/98 auziko” 46 lagun atxilotzeko agindu du Espainiako Auzitegi Nazionalak. Izenen alboan, beltzez, fiskalak egindako zigor eskaera dago. Eta letra gorrian Auzitegi Nazionalak ezarritako zigorra.

 

Enpresak

  • Juan Pablo Dieguez: 7* 11
  • Bixente Askasibar: 9 13
  • Bigarren Ibarra: 9 13
  • Iker Beristain: 7** 12
  • Joxe Garcia Mijangos: 9* 11
  • Inma Berriozabal: 7 12
  • Joxean Diaz Urrutia: 7 11
  • Joxean Etxeberria: 13* 17,5

 

JOXEMI ZUMALABE

  • Mikel Aznar: 7 9
  • Iñaki OShea: 7* 10
  • Sabino Ormazabal: 7* 9
  • Mikel Zuluaga: 7 9
  • Olatz Altuna: 7 9
  • Fernando Olalde: 7* 10
  • Alberto Frias: 7* 9
  • Mario Zubiaga: 7* 9

EKIN

  • Imanol Iparragirre: 9** 11
  • Patxi Gundin: 9* 11
  • Txema Matanzas: 9* 14
  • Ruben Nieto: 9* 14
  • Ana Lizarralde: 9** 11
  • Olatz Egiguren: 9* 13
  • Paul Asensio: 9 11
  • Juan Mari Mendizabal: 9* 13
  • Xabier Balanzategi: 9* 11
  • Natale Landa: 9* 11
  • Xabier Arregi: 9 11
  • Iker Casanova: 9* 11

 

XAKI

  • Mikel Egibar: 9* 13
  • Nekane Txapartegi: 9 11
  • Mikel Korta: 9* 11
  • Joxe Mari Olarra: 9* 13
  • Elena Beloki: 9* 13
  • Miriam Campos: 9 11

 

ORAIN

  • Carlos Trenor: 11 17
  • Xabier Alegria: 13* 18
  • Manuel Intxauspe: 11* 13
  • Isidro Murga: 19* 10
  • Patxi Murga: 19 10
  • Xabi Otero: 4* 4
  • Javier Salutregi: 7* 12
  • Teresa Toda: 7 10
  • Jose Luis Elkoro: 19 18
  • Iñaki Zapiain: 4 4
  • Jexuxmari Zalakain: 19* 9
  • Pablo Gorostiaga: 11* 13

 

ez dago atxilotze agindurik

EKIN

  • Oiakue Azpiri: 7 ?
  • Marta Perez: 7 ?
  • Jaime Iribarren: 9 ?
  • David Soto: 9 ?

 

XAKI

  • Jose Ramon Antxia: 9 ?

 

ORAIN

  • Maite Mendiburu: 11 ?

 

* Atxilotu dute

**Espetxean dago beste auzi batengatik

Haize Energiaren Lurralde Sektore Planeko egitasmoak gelditzeko eskatu du Eguzkik

albisteak

Plana berrikusi behar dela dio Alberto Friasek eta hori gertatu bitartean proiektu berriak gelditu behar direla.

Arkamuko, Perriaingo, Iturrietako mendietako, Kolometako eta Gazumeko haize parkeak gelditzeko eskatu dio Eguzkik Eusko Jaurlaritzako Industria Sailari. EAEko Haize Energiaren Lurralde Sektore Planak aurreikusi zituen haize zentral berri horien lanak esleitzeko epea abenduan hasiko dela jakinarazi du talde ekologistak, eta hori atzeratzeko eskatu du. Plana «zaharkituta» dagoela esan du Eguzkik. Horren aurrean egitasmo horiek gelditzeko beharra azaldu du, plana berrikusten den bitartean.

Industria Sailak esleitu nahi dituen bost haize zentralen kokapenaren aurkako arrazoiak hiru modutan arrazoitu zituen Alberto Frias Eguzkiko bozeramaileak, betiere EAEko haize energiaren ereduaren kontra dagoela agerian utziz, ez haize energiaren kontra. Arkamun, Perriainen, Kolometan eta Iturrietako mendietan egin nahi dituzten haize parkeak Natura 2000 Europako sare ekologikoaren barrenean daude, eta gune horiek babestuta daude. «Badirudi saiatzen ari direla esku batek egindakoaren berri ez izatea beste eskuak». EAEko azaleraren %20 Natura 2000 sarearen barrenean dagoela gogoratu zuen Friasek, eta haize parkeak gainerako %80an egiteko eskatu zuen. Gazumeko haize parkea oso txikia denez, besteen ondoan «garrantzigabea» dela esan zuen Friasek.

Horretaz gain, Arkamun, Perriainen eta Iturrietako mendietan haize errotak jarri nahi dituzten mendien erabilera kontzejuei dagokie. Arabako Foru Aldundiak onartu duen Mendietako Arauaren babesa dute ere mendi horiek, eta erabilera publikoko izendapena dutela gogoratu du Friasek. Hori dela eta, Industria Sailak «beste legedi arazo baten aurrean» dagoela nabarmendu zuen.

ORDUNTE, GOGOAN. Haize zentralak jarri aurretik dituzten oztopoez gain Ordunteko egitasmoarekin gertatutakoa gogora ekarri zuen Friasek, egitasmo berriekin gertatu daitekeena baldintza dezakelako. Planaren barruan egin zituzten lehen haize zentralen artean zegoen, baina atzera bota zuten ingurumen eraginari buruzko azterketa ezkorra izan ostean. Haize energiaren planak berak Arkamuko, Perriaingo eta Iturrietako mendietako haize parkeek Orduntekoa baino ingurumen eragin gehiago izango duela dio Friasek. Hori dela eta, Industria Sailak hartutako erabakia «ausarkeria» dela nabarmendu zuen.

Haize Energiaren Lurralde Sektore plana aurreko EAEko Energia Planaren «zorduna» dela deritzo Friasek. Orain dela hainbat urte haize parke «erraldoiak» egiteko joera zegoen, baina, gaur egun, gogoratu zuen aukera horrek ez duela zertan egokiena izan. Hori dela eta, uste du derrigorrezkoa dela Arabako eta Bizkaiko batzar nagusiek eskatu zuten planaren berrikuspena egitea. «Energia kontsumoaren hazkundea gure mendien industrializazioak ekarriko lukeena baino handiagoa da», jakinarazi zuen.

Haize parke berriek kaltetuko dituzten mendi eta herrietako bizilagun batzuek haien iritzia eman zuten atzo. «Mendi horiek erabil ditzakegu gure arbasoek zaindu zituztelako, eta haize parkeak etorkizuna hipotekatuko dute», adierazi zuen Erroetako bizilagun batek. Perriainen arrano gorria babesteko plana dagoela gogoratu zuen beste bizilagun batek. Hori dela eta, egitasmo berriak gelditu eta egin nahi dutenaren inguruko «gogoeta» egiteko eskatu zien Industria Saileko arduradunei.

 

«Industria Sailak hartutako erabakia ausarkeria da, parke berrien ingurumen eragina oso handia da eta»
alberto frias
EGUZKIKO BOZERAMAILEA

Garoñako zentral nuklearra ixteko nahia berretsi dute ehunka herritarrek Gasteizen

albisteak

Alderdi politiko gehienek babestu dute Araba Garoñarik Gabe ekimenak deitutako manifestazioa.

Jakina izanagatik ez du indarrik galtzen. Arabarren gehienek Garoñako (Burgos, Espainia) zentral nuklearraren itxiera nahi dute. Instituzioak, sindikatuak, gizarte eragileak eta hiritarrak hamaika aldiz agertu dira itxieraren alde azken urteotan. 1.500 lagun inguruk nahi hori berretsi zuten atzo Gasteizko kaleetan, Araba Garoñarik Gabe ekimenak antolatutako manifestazioan.

Herriaren hitza errespetatu, Garoña itxi orain leloa zuen pankartaren atzean sindikatu guztietako eta Arabako alderdi politiko gehienetako ordezkariak bildu ziren, PSE-EE eta PPkoak izan ezik. Garoñako zentralaren itxieraren aldeko mugimenduak ziklo bat bete duela azaldu zuen Alberto Frias Araba Garoñarik Gabe ekimeneko bozeramaileak. «Udalerriak, sindikatuak… gizarteak agerian utzi du bere jarrera; zentrala ixteko erabakia hartu behar du orain Espainiako Gobernuak». Erabaki hori politikoa dela azpimarratu zuen Friasek, ikuspegi teknikotik ez baitago zalantzarik itxieraren inguruan. Energia eskariari aurre egiteko ez dela beharrezkoa nabarmendu zuen. «Arazoa ez da energetikoa, demokratikoa baizik», nabarmendu zuen.

 

«Erabakiak hartzeko unea da», aldarrikatu zuen Mikel Mintegi Arabako Ingurumen Saileko Foru diputatuak. «Aldundia hamaika aldiz agertu da itxieraren alde, gizarteak berak egin duen bezala; Espainiako Energia eta Industria Ministerioari dagokio orain erabakia hartzea». Itxiera derrigorrezkoa dela nabarmendu zuen, baina ez bakarrik ikuspegi ekologiko batetik. «Inguruan bizi direnen osasunarekin ere kezkatuta gaude». Pankartatik metro batzuk atzerago Arabako gizartearen ordezkaritza zabalak bere iritzia ere argi utzi zuen.

MANIFESTACIÓN PARA PEDIR CIERRE DE LA CENTRAL NUCLEAR DE SANTA MARÍA DE GAROÑAITXIERAREN ZAIN. Nuklearrik ez, eskerrik asko leloa zuen bandera eskuan oihuka egin zuen 72 urteko Jose Miguel Ortizek manifestazioko bide gehiena. «Orain dela urte asko PSOEri eskatzen genion zentrala ixteko, gero PPri eta orain berriro PSOEri. Ea behingoz kasu egiten diguten!». Zentral nuklearraren kontrako hamaika manifestaziotan egon dela azpimarratu zuen, «ezin izango nituzke zenbatu», eta etorkizunean jarraituko duela aurreratu zuen. «Erronka moduko bat da; Garoña itxita ikusi behar dut hil aurretik!».

«Arriskutsua da, ikuspegi energetikotik ez dugu horren beharrik, herriak eskatzen du…». Hamaika arrazoi eman zituen segundo gutxitan Mikel Fernandez de Retana gazteak zentralaren itxierari buruz galdetutakoan. «Erabakia hartu behar duena zentraletik gertu biziko balitz, baietz erabakia azkar hartu?».

Edadetuak, haurrak, gazteak… Arabako gizartearen bozgorailu bihurtu ziren atzo. «Ea hau egin behar dugun azken aldia den», bukatu zuen Ortizek.

 

«Espainiako Gobernuak Garoña ez ixteko arrazoia ez da energetikoa, demokratikoa baizik»
alberto frias
araba garoñarik gabeko bozeramailea

«Arazoa ez da ekologikoa bakarrik; inguruan bizi direnen osasunarekin kezkatuta gaude»
mikel mintegi
arabako ingurumen diputatua

 

Eragotzi, inposatzeko

albisteak

Errauste plantaren kontrako mugimendua askotarikoa eta siglen gainekoa izan da. Sekulako indarra eman dio horrek. Indar hori mobilizazioen bidez berriz aktibatu behar da.inzineradora ez, Donosti

Ez eragotzi, ez inposatu», idatzi zuen Josu Jon Imazek, baina Gipuzkoako herritarron eta zabor errauste planta bat kosta ahala kosta ezarri nahi diguten alderdien arteko gatazka luzean ere ez dirudi EAJko mitxelin dimitituaren leloak arrakasta handirik lortu duenik. Izan ere, alderdi horiek kudeatzen dituzten mankomunitateen leloa guztiz kontrakoa da: Eragotzi, inposatzeko. San Markoseko mankomunitate intsumituak bere zaborra beste edonon botatzea eragozten ari dira, errauste planta inposatu nahi diotelako. Gogora dezagun, bide batez, inposatu nahi dioten errauste planta haiek kontrolatzen dituzten udalerrietan nahi ez duten berbera dela.

Lehendabizi, EAJk eta PSOEk San Markoseko zabortegia ixtea inposatu dute. Eguna iritsi denean, berriz, haiek berek eragotzi dute itxiera, bertako mankomunitateari ez diotelako zaborra beste edonora eramaten utzi. Zergatik? Errauste planta onartzen ez duelako. Horrela, harri batekin bi txori (edo bi kaio): lehenengo arazoari, San Markoseko kiratsari, beste bat gehitu diote, zaborra nora eraman ez izatea.

Horiek horrela, EAJ eta PSOE Beraun eta inguruko herritarrak munizio gisa erabiltzen ari dira errauste planta ametitzen ez dutenen kontra. Herritar horiek, urteetan basamortuan deiadarka aritu direnak, bat-batean lehen mailako manifestari bihurtu dira. «Kasu egin behar zaie», dioskute serio-serio urteetan inolako kasurik egin ez dieten berberek.

San Markoseko mankomunitateko gaur egungo kudeatzaileei xantaia egiten diete EAJk eta PSOEk. «Inposatu nahi dizuegun errauste planta onartu ezean, zuen zaborra beste mankomunitateetan bota dezazuen ez dago elkartasunik», esaten diete. Xelebrea da, benetan, alderdi horiek elkartasun hitzari ematen dioten esanahia: «Ondoko hiru urteetan, gure mankomunitateetan zuen zaborra onartuko dugu, baina ondoren, trukean, Lasartek, Zubietak eta Usurbilek errauste planta eta gure zaborra betiko onartu beharko dituzte». Horrek ez du zerikusirik elkartasunarekin, hori xantaia da. 25 urtez, Txingudiko zaborra onartu du San Markosek, baina hori «txikikeria» bat omen da, orain behintzat inork gogoratu nahi ez duena. Gainera, arrakero kaxkarrenak ere bere egingo ez lituzkeen amarruak darabiltzate: «Dagoeneko Donostialdeko zaborren %50 beste mankomunitateetan botatzen ari dira», diote; praktikan, baina, %20ra ere ez da iritsi.

Panorama biribiltzeko, hor dugu Donostiako alkatea. «Errauste planta ametitu ezin den inposizioa da», esan zuen. Orain, berriz, errausketazale bihurtu da. Paulo Damaskoko bidean nola, hala erori omen da zalditik Elorza auzi honetan. Itsutu duen argia, berriz, Diputaziotik eta Eusko Jaurlaritzatik iritsi da: alkateak eskuartean duen zenbait proiektu izar ez dutela oztopatuko agindu omen diote. Ondorioz, Elorzak errauste plantaren alde bozkatu du; hots, donostiarron %65en kontra. Izan ere, berak enkargatutako inkesta baten arabera, donostiarron %65 errauste plantaren kontra gaude.

Eta hau guztia gertatzen ari den bitartean, gipuzkoarrok jokoz kanpo gaude. Alderdien arteko ika-mikak komunikabideen bidez jarraitu baino ez dugu egiten. Horren erantzuleak, neurri batean behintzat, herri mugimenduak gara, errauste plantaren kontrako estrategia gehienbat politikarien eskuetan utzi dugulako, politikari horiek nahi bezain alternatiboak badira ere.

Errauste plantaren kontrako mugimendua askotarikoa eta siglen gainekoa izan da. Sekulako indarra eman dio horrek. Gure ustez, egoera zein den ikusita, indar hori mobilizazioen bidez berriz aktibatu egin behar da. Demokraziarik eza begi bistakoa den honetan (horra Donostian, Tolosan, Astigarragan, Batzar Nagusietan eta abarretan legez kanpo utzitako zerrendak), auzi hau konpontzeko ezin gara egon hauteskunde-portzentajeei begira. Herritarren protagonismoa eta mobilizazioa berreskuratu egin behar dira, politikarien xantaia eta inposizioaren kontrako txerto eragingarri bakarra delako.

«Kutsatzen duenak ordaintzen du», esan ohi digute. «Orduan —-erantzun behar diegu—-, ordaintzen duenak erabaki dezala». Herritarrok ordaintzen dugu; beraz, zaborrak nola tratatu behar diren erabakitzea herritarroi dagokigu. Eta herritarrok «errausketarik ez» behin baino gehiagotan esan dugu, argi bezain ozen.

Arabako 70 langile batzordek Garoña ixteko eskatu dute

albisteak

Zentral nuklearraren kontrako manifestazioa egingo dute larunbat honetan Gasteizen. Herrialdeko ehun mila langileren babesa dutela dio Garoñarik gabeko Araba ekimenak. En castellano en Gara.

gara 16-10-2007Arabako ikastetxeetako, erakunde publikoetako eta lantokietako 70 bat langile batzordek Garoñako (Burgos, Espainia) zentral nuklearra ixteko eskatu diote gaur Espainiako Gobernuari, eta larunbat honetan manifestazioa egingo dute Gasteizen, “une erabakigarria delako”. Arabako Foru Aldundiari itxieraren aldeko konpromisoak hartzeko galdegin diote, era berean.

Herrialdeko ehun mila langileren babesa dutela adierazi du Garoñarik gabeko Araba ekimenak, eta babes gehiago jasoko dituela espero du. Haiekin bat egin dute ELA, LAB, ESK, CCOO, UGT, Stee-Eilas, CGT, USO, Hiru eta UAGA sindikatuek.

“PSOEk [2004ko] Espainiako hauteskundeetan Garoña ixteko konpromisoa hartu zuen”, adierazi du Alberto Frias Eguzki elkarteko bozeramaile eta aipatutako Arabako ekimeneko kideak gaur, Gasteizen emandako prentsaurreoan. Zentrala bere garaian 25 urterako zabaldu zutela gogoratu du Friasek, eta epea bukatuta dagoela. “Zentrala ixteko azken bultzada eman behar dio gizarteak”.

Garoña itxi dezaten eskatzeko ekimenak indartuko dituzte

albisteak

Manifestazioa egingo du zentral nuklearraren aurkako plataformak urriaren 20an, Gasteizen.

«Une erabakigarria bizi du Garoñako zentral nuklearrak, eta itxiera agintzeko Gobernuak behar duen bultzada ematen saiatuko gara». Hitz horiekin arrazoitu ditu Araba Garoñarik Gabe plataformako bozeramailea Alberto Friasek datozen hiru astetan egingo dituzten ekimenak. Enpresa Batzordeen bidez Arabako langileen atxikimendua lortzen saiatuko da plataforma. «Garoñaren kontrako adierazpenen artean adar hori falta zitzaigun». Sindikatu guztiak arduratuko dira atxikimenduak biltzeaz, plataformaren baitan baitaude.

Espainiako Gobernuak EAEn duen ordezkari Paulino Luesmarekin biltzeko asmoa dute plataformako ordezkariek datorren astean. Garoñako zentral nuklearraren itxieraren aldeko posta txartelak eramango dizkiote, Arabako gizartearen iritzia izan dezan. Urriaren 20an manifestazioa egingo du Araba Garoñarik Gabe plataformak ekimenei bukaera emateko. Foru Plazan hasiko da, arratsaldeko zazpietan.

Garoñak bizi duen unearen garrantzia azpimarratu zuen Friasek ekimenen berri emateko prentsaurrekoan. «Datorren urteko martxoan Espainiako hauteskunde orokorrak izango dira, hau da, hilabete gutxi gelditzen zaizkie legegintzaldi hasieran agindutakoa betetzeko», gogoratu zuen Friasek. Itxiera azkar egiteko eskatu zuen gainera, zentral nuklear baten itxiera ez baita «egun batetik bestera» egiten. 1.999an hamar urte gehiagorako luzatu zuen Segurtasun Nuklearrerako Batzordeak Garoñako zentralaren ustiapena. Zentrala 2009a baino lehen itxi egin daitekeela argitu zuen Friasek, ordea.

ITXIERAREN EGUTEGIA. Ezker Batuak Garoñaren itxierarako egutegi bat zehazteko eskatu zuen atzo Arabako Biltzar Nagusietan, Araba Garoñarik Gabe plataformak ekimenen berri eman zuen egunean. Espainiako Gobernuak iragarritako itxiera atzeratu dezakeela deritzo Jose Miguel Fernandez EBko bozeramaileak. Hori gerta ez dadin Arabako Foru Aldundiak zer egingo duen galdetuko dio Jose Miguel Fernandezek Arabako Foru Aldundiko Ingurumen Departamenduari.