Iturria: Sopelako Udala.

Sopelako Udalak fracking-arekin lotutako lehenengo jakinarazpena jaso du Espainiar Gobernuaren aldetik. Ingurumen Ministerioak bidalitako oharrean, Gobernuak honakoaz informatzen du: “CAMPAÑA SISMICA TERRESTRE 2D EN EL PERMISO DE INVESTIGACIÓN DE HIDROCARBUROS “GÉMINIS” proiektuaren ingurumen-inpaktuaren ebaluaketa egiten hasi direla. Aipatu proiektuaren bultzatzailea Frontera Energy Corp. S.L. da.

Espainiako Gobernuak honako kontsulta egiten dio Sopelako Udalari: “ea proiektuak ingurumenean eragin adierazgarriak sortuko dituen ala ez, kontuan hartuz sustatzaileak bere ingurumen-dokumentuan hartu dituen badaezpadazko neurriak”. Ingurumen Sailak bidalitako dokumentazioa honakoa da:

ESPAINIAR GOBERNUAREN ESKUTITZA:  http://issuu.com/sopelakoudala/docs/solicitud__12_ 

INGURUMEN-ERAGINARI BURUZKO DOKUMENTUA (1):  http://issuu.com/sopelakoudala/docs/g__minis-documento_ambiental/0 

INGURUMEN-ERAGINARI BURUZKO DOKUMENTUA (2):  http://issuu.com/sopelakoudala/docs/adenda_adenda-documento_ambiental__/0

Sopelako Udala dokumentazioa aztertzen ari da, eta fracking-aren kontrako mugimenduarekin harremanetan jarri da elkarlanean aritzeko. Sopelak 2013. urtean bere burua “fracking gabeko udalerri” izendatu zuen, eta Eusko Jaurlaritzari eta Espainiar Gobernuari praktika honekin harremana duten baimen guztiak etetea eskatu zien.

Herritarrei informatzeko asmoz, Udalak fracking-aren inguruko hitzaldia antolatu du abenduaren 16an, 19:00etan Kurtzio Kultur Etxean. Berbaldia Fracking Ez Bizkaia taldeko David Cobosek eskainiko du.

Era berean, abenduaren 20an, Sopelak beste behin ere “fracking gabeko udalerria” dela aldarrikatuko du, oraingoan kalejira baten bidez. 12:30ean irtengo da udaletxe plazatik., eta amaieran fracking-aren kontrako talde-argazkia aterako da.

Sopelako Udalak dei egiten die herritarrei frackingaren kontra antola daitezen, gure ingurumena eta osasuna jokoan dagoelako.

Iturria: Fracking Ez Araba.

2014ko abenduaren 4a.  Lehenbizi, gaur pozik gaudela aitortu beharrean gaude. Aurreko irailaren 13an legebiltzarrean utzitako 100.000tik gorako sinaduren indarraren bitartez alderdi politikoek aho batez Herri Ekimen Legegilea izapidetu dute. Ekimenak frackinga debekatu eta baliabide ez konbentzionalak bilatzeko saioak bertan behera uzteko asmoa du, ingurumenarekiko kalte handiengatik. Ekimena sinatu duten guztiei zorionak, beraz, bereziki sinadurak biltzen aritu den jende mordoari, herri mugimenduaren arrakasta hau beraiena bait da.

Hala ere, naiz eta orain arte izan ditugun zailtasun eta oztopoak gainditu baditugu ere, ez gara iritsi helmugara. Tramitera onartze honekin laister frackinga arautuko duen lege autonomiko bat izango dela espero dugu, baina lege horren behin betiko testua laister osatuko den batzorde txostengilearen eskutik etorriko da.

Orain hasiko den prozesuan, hiru aukera ezberdin aurrikusten ditugu:

Lehendabizikoa hau litzateke: legea aurkeztu dugun testu berdinarekin onartzea. Hau horrela balitz, Espainiako gobernuak, orain arteko bidea jarraitzen badu, auzitegi konstituzionalean errekurtsoa aurkeztuko duenaren susmoa dugu. Aurrekariak ikusita, auzitegiak lege berria bertan behera uztea posible da. Hau gertatuko balitz, bai Euskal Gobernuak zein Legebiltzar honek eragozpenak gainditzeko beharrezko mekanismoak martxan jarriko dituztela espero dugu. Auzitegi Konstituzionalak ipini ditzaken oztopoak ez dute zertan behin betikoak izan behar horretarako borondate politiko irmoa badago. Adibide desberdinak ikusten ari gara azken aldi honetan. Katalunian gertatutakoa kasu.

Bigarren eskenatoki batean gerta daiteke batzorde txostengileak, frackingaren aurkako zalantzarik gabeko jarrera argi batetik abiatuta, legearen idazketa hobetu bat lortzea, estatuko gobernuaren eta auzitegi konstituzionalaren eragozpenak gainditu ditzakeena. Lana zentzu horretan badoa, seguruenik ere elkar ulertze bat izango dugu. Horretarako EAEn frackingaren aurkako erizpide politiko argia erakutsi beharko dute alderdiek behingoz.

Asko kezkatzen gaituen hirugarren aukera bat ere badago. Gaur gertatu dena estalki hutsean gera daiteke alderdien benetako intentzioa etorriko diren emendakinekin frackinga ahalbidetzea bada. Aurkezturiko Ekimenak, bere xumetasunean, ez dio uzten lekurik horrelako interpretazioei. Batzordea matxan jartzen denean, ordea, aurkeztutako legea desitxuratu dezakete, zulatzaileei bidea erraztuz. Mugimendu guztiak arretaz jarraituko ditugu eta horrenbeste pertsonen babesa duen legearen indargabetze saioak salatuko ditugu.

Amaitzeko, frackingaren eztabaida irekia badago ere, bitartean lanak aurrera jarraitzen dutela gogora arazi nahi dugu. Bai finanatzaketa publikoa duen Hidrocarburos de Euskadi, bai beste enpresak ere, pausoak ematen ari dira. Bizkaiako kostalde inguruan dagoen Geminis baimenean, Frontera Energy konpainiaren eskutik laister iritsiko dira sismika lanak, frackinga egiteko kokaleku onenak bilatzeko helburuarekin.

Gaiak duen garrantzia ikusirik, legea ahal bezain laster erabakitzea eskatzen dugu. Baita frackinga egiteko egitasmoetatik diru publikoa erabiltzeari uztea. Gogorarazi nahi dugu badagoela Eusko Jaurlaritzak frackinga galerazteko hartu dezaken neurri azkar eta zehatz bat: Hidrocarburos de Euskadik dituen esplorazio baimenak bertan behera uztea. Erabaki hori eraginkorra litzateke eta erabaki horri kontra egiteko ez dago auzitegirik.

Gaur hemen eskatzen dugun determinazioa aspaldian hartu zuen bere gain frackingaren aurkako herri mugimenduak. Frackingaren erabilpena baztertzen ez den bitartean, mobilizazioak aurrera jarraituko du.

Iturria: Argia. Ukrainako agintariek jakinarazi dute istripua gertatu dela herrialdearen hego-ekialdean dagoen Zaporizhiako zentral nuklearrean. Energia ministroak esan duenez zentralaren 3. generadorean gertatu da matxura eta etzirako, abenduak 5, konponduta beharko luke. Zaporizhiako zentral atomikoa da Europako handiena eta Ukrainak kontsumitzen duen argindarraren %20 berak sortzen du, energia atomikoaren erdia. Agintariek ez dute istripuaren xehetasun gehiagorik eman. Ondoko orduetan saiatuko gara albistearen jarraipena egiten.

[16:13]
Huffington Post, Reutersen iturrietatik edanez: “Accident Occurred At Ukraine Nuclear Power Plant, But Poses No Danger: Govt“. Kronikaren azken aldean nabarmentzen du Ukrainako industria korporazio handienak argindar kontsumoa eten duela borondatez, herrialdearen sarea ez larregi zamatzeko. Bestalde, Ukrainak energia hein handi batean ikatzetik eskuratzen zuen duela gutxi arte, baina Donbasseko gerrak eten egin du produkzioa bertako meategi gehienetan.

[16:06]
Albistea Britainia Handiko The Telegraphen “Accident at Ukraine nuclear plant forces reactor shutdown“. Azken paragrafoan dio: “Ukrainiak bere argindar beharrak %50ean azken urteotan nuklearretatik asetzen ditu, baina Errusiak gas horniketa eten zionetik uste zen nuklearrek proportzioa handitu beharko zutela negu honetan”.

[14:07]
Le Monde egunkariak dio agintariek aitortu dutela istripua duela bost egun gertatu zela. Horien arabera, istripua ez da erreaktorean gertatu kanpoko aldeko zirkuitu elektrikoan baizik. Bestalde, ARGIAn orain arte darabilgun Zaporizhia [hasieran Zapoizhye erabili dugu] frantsesez Le Mondek Zaporojie jartzen du. Ikusi albistea Le Monden:
“Le premier ministre ukrainien annonce un incident dans une centrale nucléaire au sud du pays“.

[13:45]
Albistea zenbait hedabidetan:
NBC “Accident Reported at Ukraine’s Zaporizhye Nuclear Power Plant, PM Says”
La Vanguardia “El primer ministro de Ucrania comunica un accidente en una planta nuclear”

Lurpetik gasa ateratzeko azterketak egin zituzten orube bat, Subilla Gasteizen. Artxiboko irudia. RAUL BOGAJO / ARGAZKI PRESS

Iturria: Berria.

Bizkaiko kostaldean, Gernika ingurutik Gorlizeraino, gasa baden ikertzen hasiko dira.

29 herri daude barruan.

‘Fracking’-a debekatzeko lege proposamena eztabaidatuko du bihar Eusko Legebiltzarrak.

Bizkaiko kostaldera iritsi dira lurpetik gasa ateratzeko proiektuak. Geminis proiektua ari da pausoak ematen. 29 herritako lurrak hartzen ditu, 48 hektarea, lauki baten eran: Gernika eta Mundaka aldetik mendebaldera, Leioa eta Gorlizeraino. Espainiako Gobernuak udalei jakinarazi die lanak hasteko prozedura martxan jarri dutela, eta alegazioak jartzeko epea zehaztu die. Natur balio handiko eremuak daude Geminis proiektuaren eremuan —Urdaibai, adibidez—, baina enpresa sustatzaileak dio «eragin minimoa» izango dutela probek ingurumenean.

Sopelako Udalak eman du abisua; herritarrei azaldu die jakinarazpen bat jaso duela Madrildik, Ingurumen Ministeriotik, eta dei egin du protestara: abenduaren 20an, kalejira bat egingo dute. Iaztik, «fracking-ik gabeko herria» da Sopela. Lurpetik gasa ateratzeko teknika bat da fracking-a; harri geruzak zartatu egiten dituzte, uraren eta konposatu kimikoen bidez, eta harkaitz artean dagoen gasa atera egiten dute horrela. Ingurumenarentzat arriskutsua delakoan, debekatua dute herrialde batzuetan; Frantzian, esaterako. Espainiako Gobernua aldekoa da.

Euskal Herrian, batez ere Araban eragin du zeresana fracking-ak, han egin baitituzte azterketa gehienak. Talde ekologisten arabera, Arabako lurren %88 hartzen dituzte gasa bilatzeko proiektuek. Bizkaian, lurren %73. Azterketak eginak dituzte Bizkaian lehen ere, Arratia inguruan, Saia proiektuarekin —Araba eta Bizkaia hartzen ditu plan horrek—. Geminis egitasmoak, ordea, baditu berezitasun batzuk: nagusia, kostaldea hartuko duela aldez alde. Lurpea ez ezik, itsasoa ere arakatuko dute.

Azterketak, kamioien bidez

Frontera Energy Corporation enpresak du Geminis egitasmoaren ardura 2011tik. Geldirik eduki du prozesua orain arte. Lehen pauso gisa, orain, lurpea aztertu nahi du bibrazio sistema baten bidez. Finean, hau da sistema: kamioi batzuk ekarriko lituzkete, bibrazioa sortzeko, eta, horiek neurtuta, jakingo dute lurpea nolakoa den. «Lurralde osoan ehunka metroko kableak joango dira. Kamioiek detonazio txiki batzuk egingo dituzte burdinazko xafla batzuekin, eta uhinen errebotearekin mapa bat osatuko dute». David Cobos Bizkaiko Fracking Ez taldeko kideak eman du azalpena. Zundaketen aurreko pausoa dela esan du.

Ingurumenean ez du aparteko eraginik izango lehen urrats horrek, Cobosen iritzian. «Leherketa txikiak dira. Arazo handiagoa da kamioien mugimendua. Askotan, baimen barik sartzen dira lur partikularretara». Kontuan hartu behar da, hala ere, inguru berezia dela arakatu nahi dutena. Babestutako sei gune ditu barruan Geminis proiektuak: Astondoko dunak, Gaztelugatxe, Urdaibaiko ur bideak, Urdaibaiko marismak eta itsasertza, Urdaibaiko artadiak, eta Urdaibaiko itsasadarra. Enpresak hitzeman du ez duela kalterik eragingo horietan: «Espazio horietako bati ere ez diote zuzenean erasango ikerketa sismikoek». Proba eremutik babestutako lekuetara ehun metrotik gorako distantzia utziko lukete.

‘Fracking’-aren etorkizuna

Proiektuaren bideragarritasunaz zalantza handiak ditu Cobosek: «Urteetan egin dira ahaleginak, eta honezkero ikusi da zer aukera dagoen. Askotan ibili dira gasaren bila. Energiaren Euskal Erakundeak berak esana da atera beharreko gasa aterata dagoela jadanik». Enpresek ere zalantza handiak dituzte, haren ustez: adibide gisa, esan du zatika ari direla proiektua egiten. «Ez da serioa ingurumen eraginean proba sismikoak soilik aztertzea. Zergatik zatikatu? Pauso txikiak dira, enpresek ere ez dutelako sinesten».

Iraultza baten gisara iritsi zen fracking-a Euskal Herrira. Patxi Lopez Eusko Jaurlaritzako lehendakari zela, AEB Ameriketako Estatu Batuetatik adierazi zuen 60 urterako gas hornikuntza bermatuko zuela teknika horrek Arabarako, Bizkairako eta Gipuzkoarako. «Burbuila handi bat da guztia», ohartarazi du Cobosek. «Asko kiebran daude AEBetan ere, nahiz eta gas asko lortzen ari diren. Ez da sistema errentagarria».

Herrialde batetik bestera, alde handia dago. Europako Batasuna, ez alde, ez aurka; arretaz jokatzeko eskatu du. Frantziak bide bat hartu du: debekatzea. Espainiak, beste bat: bultzatzea. Aurkakoei, gainera, atea ixten ari da Madril. Nafarroan, adibidez, fracking-a debekatzeko legea onartu zuten, baina eten egin du Espainiako Auzitegi Konstituzionalak. Espainiako Gobernuak jo zuen auzitara, eskumena berak duela esanez.

Egoera horretan, fracking-a debekatzeko lege proposamen bat eztabaidatuko du bihar Eusko Legebiltzarrak. Herri ekinbide legegile gisa iritsi da gaia parlamentura, teknika horren aurkako taldeek sinadurak bilduta —103.000 baino gehiago batu dituzte—. Lehen ere aurkeztu zuten antzeko proiektu bat, baina legebiltzarrak ez zuen onartu. Oraingoan, aldiz, oso litekeena eskaria aintzat hartzea, eztabaidatzeko behintzat.

EAJk jarrera aldatu du. Proposamena aztertzearen aurka bozkatu zuen aurreko aldian, baina uste izatekoa da orain alde agertuko dela, Eusko Jaurlaritzak egokitzat jo baitu teknika horri buruz eztabaidatzea. Edonola ere, gobernuak ohartarazi du bide laburra daukala fracking-a debekatzeko eskariak, ikusita beste erkidego batzuek hori egin dutenean Madrilek salaketa jarri eta Konstituzionalak eten egin duela araua.

Cobosek nabarmendu du legea bera baino garrantzitsuagoa dela ildo politikoa: «Adierazpen politikoa izango da batez ere. Jaurlaritzak herri ekinbidea onartzea da garrantzitsuena». EAJ espresuki aipatu gabe, fracking-aren aurkako taldeko kideak ohartarazi du kontraesanak daudela jokabide batzuetan: «Ez du balio erakunde batzuetan fracking-aren aurka agertzea, eta gero Jaurlaritzatik milioiak jartzea horretan».

Euskal Herrian —Hegoaldean; Iparraldean debekatuta baitago— 25 proiektu daude lurpetik gasa ateratzeko; horietako hamaseik badute baimena. Proiektu horietatik kanpo, gainera, beste zundaketa eremu batzuk ere ageri dira Industria Ministerioaren agirietan; Araban daude gehienak, Gasteiz eta Trebiñu inguruan. Eusko Jaurlaritza parte hartzen ari da proiektu horietako batzuetan, SHESA enpresaren bitartez.