All posts by Donostia

Asensiok berriz ere ziri potoloa sartu nahi digu, oraingoan saneamenduaren alorrean

albisteak
Leave a comment
Dama Berdeko zubia, Tolosan, Oria gainean. Ezkerreko zubi-begia ez da, berez, zubi-begi bat, Zelai ibaiak Oriarekin bat egiten duen lekua baizik.

Dama Berdeko zubia, Tolosan, Oria gainean. Ezkerreko zubi-begia ez da, berez, zubi-begi bat, Zelai ibaiak Oriarekin bat egiten duen lekua baizik.

Uraren Munduko Eguna dela eta, Ingurumen diputatu José Ignacio Asensiok zera esan du: “Europako saneamenduko sistema onenetako bat dauka Gipuzkoak”. Badakigu politikoek, oro har, errealitatea beraien interesen arabera moldatzeko berebiziko gaitasuna dutela, baina zer premia, zer “nezesidade” zuen Asensiok horrelako ziri potoloa sartzen ibiltzeko? Ikus dezagun…

Azken hamarkadetan saneamendu-kontutan aurrera egin dela begi-bistakoa da (egia esan, besterik ez genuen behar), baina hori bezain begi-bistakoa da oraindik asko direla ibaietara araztu gabe isurtzen diren ur zikinak, nahiz eta Europar Zuzentarauak arazo horiek aspaldi konponduta egon behar zutela agindu. Horra hor, adibidez, Mutrikuko Mijoa erreka, zuzen-zuzenean Saturrarango hondartzan isurtzen duena; Pasai Donibaneko saneamendua, badia biziberritzeko planetan beti “ahaztua”; edo Zelai ibaian dauden eta Asensio tolosarrak bertatik bertara ezagutuko dituen gabeziak, Zelaik Oriarekin bat Tolosan bertan egiten baitu .

Isuri hauek eta beste batzuk (*) Eusko Jaurlaritzak Gipuzkoarekin saneamendu-alorrean duen zorraren ondorio dira. Zorra, bai, Jaurlaritzak ez duelako bete orain dela hamar urte hartutako konpromisoa. Gainera, ez du ematen kitatzen hasteko inolako asmorik duenik, eta horren lekuko da Urkulluren gobernu berriaren aurrekontu-zirriborroa.

 

Gauzak horrela, Asensiok zera esatea zuen: “Azken urteotan saneamendu-kontutan asko aurreratu dugu eta aurreratzen jarraitzeko asmo sendoa dugu”, edo horrelako zerbait. Izan ere, nekez espero dezakegu diputatuak Jaurlaritzari zorra erreklamatzea, are gutxiago Ingurumen kontseilari berria haren alderdikide Iñaki Arriola dela kontuan izanik. Baina, arestian esan bezala, zer “nezesidade” zuen Gipuzkoak Europako ur saneamenduko sistema onenetako bat daukala esaten ibiltzeko? Arrazoi bakarra bururatzen zaigu: ziri potoloak sartzen ibiltzea adiktiboa da, eta Asensiok jarduera horri gehiegizko gustua hartu dio. Erraustegia ofizialki “ingurumen gune” bataiatu zuenean, marka oso goian jarri zuen, eta, jakina, hortik aurrera, dena maldan behera.

 

EGUZKI, 2017ko martxoa

 

(*) Gipuzkoan Jaurlaritzak gauzatzeko dituen saneamendu-proiektuei buruzko informazio zehatzagoa:

http://eguzki.org/2017/01/11/gipuzkoako-ibaien-saneamendua-eta-jaurlaritzaren-zorrak/

Ibilaldi gidatu eta errebindikatiboa Jaizubiatik barrena

albisteak
Leave a comment

Captura de pantalla 2017-03-20 a las 12.37.50Eguzkik eta Bidasoaldeko Lagunek antoltatuta, datorren igandean, martxoak 26, ibilaldi gidatu eta errebindikatiboa egingo da Jaizubiako harizti eta paduratik barrena, Plaiaundiko parkeraino.

Abiapuntua RENFEko Irungo Bentak tren-geltokia izango da, 09:15ean. (Bada Donostiatik 08:45ean atera eta geltokiz geltoki doan tren-zerbitzu bat.)

Ibilaldia, bataz beste 8 kilometrokoa eta aldaparik gabekoa, golf-zelaiko hariztian hasiko da. Hortik iritsiko da Jaizubiako padurara. Padura hori Txingudiko eremu babesturen barruan dago, hau da, Natura 2000 Sarearen barruan. Plaiaundiko parkean bukatuko da, 12.30ak aldera.

Ibilaldian, parajea ondo ezagutzen duten pertsonek bertako balioak agerian utziko dituzte. Halaber, eremu babestua arriskuan jartzen duten hainbat arazoren berri emango dute. Arazo horietako asko erakunde publikoen utzikeriaren ondorio dira. Horra hor Zubimuxu errekako egoera tamalgarria, Irun-Hondarribia bidegorri-proiektua edota Plaiaundiko kirol instalazioak. Instalazio horiek hor jarraitzen dute, nahiz eta okupatzen duten espazioa lehengoratu behar den, hau da, naturgune bihurtu behar den, 2019rako. Europako Batzordeak isun garrantzitsuak jarriko ditu, bestela.

 

Era guztietako talde sozial, alderdi eta sindikatu, larunbatean erraustegiaren kontra egingo den manifestazioarekin bat

albisteak
Leave a comment

Errausketak alternatiba mani aurkezpena 1Datorren larunbatean Donostian erraustegiaren kontra egingo den manifestazioarekin bat datozen era guztietako talde sozial, alderdi eta sindikatuen ordezkariek prentsaurreko bat eskaini dugu gaur eguerdian Anoetan. Izan ere, handik, Anoetatik, abiatuko da manifestazioa, 17:00etan, “Erraustegirik ez, alternatiba badagoelako” lemapean.

Hemen elkartu gara gaur, datorren larunbatean, martxoaren 25ean, Errausketarik Ez lemapean egingo dugun manifestazioari  atxikimendua agertzeko.

Era askotako erakunde, elkarte, talde eta herritarrok adierazi dugu, dagoeneko, gure babesa. Ez dugulako Errauskailurik nahi ez Zubietan eta ez inon.

Ez dugulako gure hondakinak tratatzeko azpiegitura garesti, kutsakor eta alferrikakorik nahi. Ez dugulako nahi gure eta gure ondorengoen osasuna kaltetzerik, ez dugulako nahi gure dirua xahutzerik ezta enpresa multinazionalek gure diruarekin negozioa egin dezaten, aldi berean herritarrontzako premiazko zerbitzu publikoak murriztuz.

Errausketak alternatiba mani 2

Gipuzkoan demostratzen ari gara, aspalditik eta egunero,  ez dugula hondakinak erre beharrik tratatzeko. Demostratu dugu gai garela, bilketa on bat eginda, hondakinen parte oso handi bat aprobetxatu eta errefus kiloak jaisteko, eta erretzea ez den beste alternatiba bat emateko azken errefusari.

Baina nahitaezkoa da udalerri askok egin duten bideari beste guztiek ere jarraitzea, ez baita onargarria  batzuek 50 kg errefus azpitik botatzea, pertsonako eta urteko, eta beste batzuek 250 kg edo 300 kg botatzen segitzea. Ez da onargarria eta ez da justua.

Eta administrazioak lagundu egin behar du bide horretan: hasteko, gaika ondo biltzeko sistema eraginkorrak ezartzen Gipuzkoa osoan,  eta era berean gaika ondo bildutako hondakinak ondo tratatzeko azpiegiturak prestatzen. Urgentziazkoa da Gipuzkoak dagoenekoz organikoarentzako dauzkan azpiegiturak hobetzea eta behar diren berriak sortzea.

Errausketak badauka alternatiba, demostratua dago alternatibak balio duela eta Gipuzkoan erraustegirik gabe ondo kudeatu ditzakegula gure hondakinak.

Zer dela eta gastatu behar ditugu 212 milioi erraustegia eraikitzen eta 700 edo 1.000 milioi, horiek kudeatzen?

Gipuzkoa puntako herrialdea izan daiteke hondakinen kudeaketa burutsu eta iraunkorrean. Baina, baita ere, geratu gaitezke  azken muturrean, herrialde kutsakor eta morroi geldituz, gure agintariek erraustegiaren apustua egin dutelako.

Garaiz gaude oraindik gauzak ondo egiteko.

Gipuzkoako Foru Aldundia gobernatzen duten alderdiei berriro ere esan nahi diegu:  gelditu ezazue proiektua, hartu ezazue hondakinen kudeaketa onaren norabidea. Egin kasu herritarrok eskatzen dizuegunari.

Errausketarik Ez!

 

Martxoaren 25ean manifestazioa egingo dugu Donostiako kaleetan. Manifestazio handia izatea nahi genuke. Hor bilduko gara  ERRAUSTEGIRIK EZ esateko eta beste jendarte eredu bat aldarrikatzeko.

Honako zerrenda honetan ageri dira orain arte manifestazioarekin bat etorri diren taldeak. Zerrenda irekia da, beraz, behin-behinekoa. Seguruena une honetan bertan badira atxikimendua adierazi duten talde berriak.

  1. AHTrik ez
  2. Aizan feminista taldea
  3. Aiztondo klasika
  4. Aiztondo plataforma
  5. Aiztondo Txirrindulari Elkartea
  6. Alternatiba
  7. Altza XXI
  8. Amasako Martina Kultur elkartea
  9. Andoiango Gaztetxea
  10. Andoaingo Punttuka Bertso Eskola
  11. Anoetako Gazte Asanblada
  12. Anoetako neska gazte feministak
  13. Asteasuko Atzapar Pilota Kirol Elkartea
  14. Asteasuko EBIA elkartea
  15. Asteasuko Matxintxulo gaztetxea
  16. Asteasuko Pello Errota Eskolako Kukute Guraso Elkartea
  17. Asvinenea Kultur Elkartea (Antzezleak biltzen dituen elkartea)
  18. Belartza 2 Gelditu! plataforma
  19. Billabonako Aizkardi Mendi Elkartea
  20. Billabonako Erniobea BHIko guraso elkartea
  21. Billabonako Oinkari Dantza Taldea
  22. Biolur Gipuzkoa
  23. CCOO sindikatua
  24. CGT sindikatua
  25. CNT sindikatua
  26. Debagoiena Eredu, Zabortegirik Ez plataforma
  27. Donostia Bizirik
  28. Donostiako Hondakinen Bilgunea
  29. Duintasuna elkartea (Gipuzkoako jubilatuak eta pentsiodunak)
  30. Eguzki
  31. EH Bildu
  32. EHNE
  33. Ekologistak Martxan
  34. ELA sindikatua
  35. EQUO
  36. Ernai
  37. Errausketaren Aurkako Koordinadora
  38. ESK sindikatua
  39. Ezker Anitza – IU
  40. Fleming Ikastetxeko Guraso elkartea
  41. Gasteizko Zero Zabor
  42. Gipuzkoa Zutik
  43. Greenpeace
  44. Haritzalde Naturzaleen elkartea
  45. Hernaniko Berdintasun Kontseilua
  46. Hernaniko EH Bildu
  47. Hernaniko Kooperazio Taldea
  48. Hernanin Zero Zabor
  49. Herria Kultur Elkartea
  50. Ikasle Abertzaleak
  51. Ipar Haizea
  52. Jatorkin Atzerritarren aldeko elkartea (Tolosa)
  53. Karabeleko Baratza ekologikoak
  54. Komite Internazionalistak
  55. LAB sindikatua
  56. Lanbide Kaltetuak (Asociación de afectados por Lanbide)
  57. Lasarte-Orian Aire Garbia
  58. Lurreko Eko denda
  59. Nekane Libre
  60. OEIT /GEIS
  61. Onddo Gaztetxea
  62. Podemos Donostia
  63. Podemos Euskadi
  64. Sortu
  65. Steilas sindikatua
  66. Stop Kaleratzeak Hernani
  67. Tolosaldeko Osaun Publikoaren aldeko plataforma
  68. Usurbilgo Aralar
  69. Usurbilgo EH Bildu
  70. Usurbilgo Ernai
  71. Zero Zabor ingurumen babeserako elkartea
  72. Zizurkilgo Erraldoi eta Buruhandien Konpartsa

Martxoak 25, manifestazio handia: “Erraustegirik ez, alternatiba badagoelako”

albisteak
Leave a comment

Errausketaren aurkako mugimendua 25M kartelaErraustegiaren kontrako Mugimenduak manifestazio handia egingo du martxoaren 25ean. “Erraustegirik ez, alternatiba badagoelako” lemapean, manifestariek arratsaldeko 5etan abiatuko dira Anoetatik eta Donostiako kale nagusietan barrena ibiliko dira. Datorren larunbatean, hilak 18, Anoetan bertan prentsaurreko jendetsua egingo da, manifestaziorako deia zabaltzeko. Nahi duten elkarte eta pertsona guztiak parte hartzera gonbidatuta daude.

Alternatibaren lerro nagusiak ikusi nahi baduzu:

http://erraustuez.org/2017/03/10/errausketarik-gabeko-alternatiba-eskueran-daukagu/

Donostian, Mutiloako zaborteagiaren kontra

albisteak
Leave a comment

prentsaurreko+masiboaGoierri Birzirik! plataformak deituta, 200 lagun bildu gara Diputazioaren aurrean, euripean (*), Mutiloako zabortegiaren aurka eta birziklatzearen alde egiteko.   

Prentsaurreko masibo honetan salatu nahi izan dugu Diputazioa (Olano & Asensio) eramaten ari den inposaketa-politika eta errauskailuaren alde egiten ari den apustu itsua. Itsua eta bidegabea. Izan ere, Mutiloako zabortegiaren kasuak argiro erakusten duen bezala, ondo egiten dutenak zigortzen ari da. 

(*) Diputazioaren aurrean, eta ez arkupetan, euria gogotik ari zuen arren, Diputazioak arkupetan egitea espresuki debekatzen duelako. Gauza hauek beharbada txikikeriak dira, baina esan egin behar dira, “gobernantza berria” eta diru publikoarekin izugarri publizitatzen diren horrelako kontzeptu potoloen atzean zer dagoen ere agerian utzi egin behar baita.

prentsaurreko+detalle

“Legezko lapurreta” salatu dute Urdaibain

albisteak
Leave a comment

EBAKITAEAEko Auzitegi Nagusiak onartu egin du Eusko Jaurlaritzak Urdaibaiko Erreserba kudeatzeko onetsi zuen dekretuaren aurka jarritako helegitea. Urdaibaietz plataforma ekologistaren iritziz, Eusko Jaurlaritzak ausarkeriaz jokatu du, hainbat puntutan legezkotasuna urratuta.

Joan den urtarrilaren 30ean, Urdaibaietz plataforma ekologistaren legezko ordezkariek helegitea jarri zuten Eusko Jaurlaritzak 2016ko iraileko hauteskundeak eta bi egun geroago onartu zuen dekretuaren kontra, jarduneko zegoenean onartu ere, hau da, Eusko Legebiltzar berria oraindik eratu gabe. Urdaibaietzek eskaera egin dio Auzitegiari zuhurtasunezko zigorra ezar diezaion dekretuari, kontuan hartuta Urdaibairi dakarzkion ondorio txarrak -batzuk konponezinak- eta herritarren interes orokorrak ere kaltetzen dituela. Gogora dezagun biosfera erreserba hau Autonomia Erkidegoko interes handieneko natur gunea dela. UNESCOk 1984an Gizateriaren Ondare izendatzeaz gain, nazioartean oso garrantzitsuak diren hezeguneak ditu, Ramsar Hitzarmenean jasoak, bai eta Kontserbazio Bereziko lau Eremu (KBE) eta Hegaztientzako Babes Bereziko Eremu (BBE) bat ere Europako Batasuneko Natura 2000 sarean.

Urdaibaietz plataformaren ustetan, Eusko Jaurlaritzak modu subertsiboan eta ausarkeriaz jokatu du hainbat puntutan legezkotasuna urratuta. Hain zuzen, Auzitegiak helegitean jasotako argudioen sendotasun juridikoa hartu du aintzat:

  • EJk ez du egin aldez aurreko eta nahitaezko Ingurumen Inpaktuaren Baterako Ebaluazioa.
  • Ez du egin nahitaezko Ingurumen Baliabideen Antolamendurako Plana.
  • Urdaibai Babesteko Legeak ezarritako Babes Eremuak babesik gabe utzi ditu. Orain, eremu horietan baimentzen diren erabilerek haien kontserbazioa edo birsortzea eragozten dute.
  • KBE eta BBE eremuei buruzko araudia indargabetu eta babes-maila txikiagoko beste batekin ordezkatu du.

Araudi horrek, indarrean zegoena ordezkatu eta eguneratu behar zuenak, Urdaibai Babesteko Legea garatzeko (gogora dezagun lege hori aho batez onartu zutela alderdi guztiek 1989an), helburu hau izan behar du: “Ekosistema guztien osotasuna babestea eta haien leheneratzea sustatzea, izadiaren, zientziaren, hezkuntzaren, kulturaren, aisialdiaren eta gizarte-ekonomiaren aldetik duten garrantziagatik” (Urdaibai Babesteko Legearen 1. art.). Horrez gain, oinarria izan behar du eskualdeari begira garapen iraunkorreko eredua bultzatzeko, zeinak kontserbazioa eta baliabideen erabilera bateragarri egingo dituen.

Alabaina, Eusko Jaurlaritzak onarturiko dekretuak “nahierara egindako” esparru juridikoa eskaintzen du, Urdaibai Babesteko Legearen jatorrizko espiritua eduki barik lagata. Araudi horrek ez du modu integralean bermatzen natur, paisaia, gizarte eta kultur balioen kontserbazioa, eta ez du sustatzen garapen iraunkorreko eredua Urdaibairako. Alderantziz, agiri iluna da, sarri ulergaitza, hirigintza-plan bat balitz bezala sortua, eta gehiago dirudi egina norbanakoen interes jakinak asetzeko herritarren interes orokorrei erantzuteko baino.

Horrenbestez, gure aburuz, dekretua baliogabetu egin behar da, eta beste testu bat sortu, logikoa denez eguneratzea ekarriko duena (indarrekoa 1983koa zen), baina ingurumen eta jendarte aldetik eredu iraunkor eta justua bultzatuko duena, baliabideen ustiapena eta kontserbazioa bateragarri eginda, lehentasunez autoardaztua eskualdeko baliabideen aprobetxamenduan, bertako herritarren beharren asebetetzean eta ekosistemen eta beren berezko balioen kontserbazioan. Prozesu horretan, euskal administrazioen babesa eta jarrera proaktiboa funtsezkoak dira, herritarren parte-hartzea bezala. Hain zuzen, hortxe gaude prest elkarlanean aritzeko.

Urdaibaietz herritar plataforma. 2017ko martxoak 1

Bardea Libreak fronte bateratuak tiro-poligonoari buruzko herri-galdeketa eskatzen du 2018an

albisteak
Leave a comment

bardenaslibresBardea Libreak fronte bateratua aurkeztu zen larunbatean Castejongo Pablo Sarasate Kultura Zentroan. Ekimen honek Nafarroako eta Aragoiko hainbat herri-kandidatura, alderdi, sindikatu eta talde sozial biltzen ditu, eta 2018ko abenduaren 31a baino lehen tiro-poligonoari buruzko galdeketa egitea du helburu.

Hona hemen ekitaldiaren bideoa. Ordu erdi dirau, gutxi gorabehera. Lehen 10 minutuek bikain laburbiltzen dute irudietan poligonoaren historia, Gladysen hilketa barne, jakina. Ondoren, beste interbentzio batzuen artean, Fermin Valencia eta Roberto Urraren kantak entzun daitezke.

https://www.youtube.com/watch?v=S9PMfYIkUqU

Bardeako Juntak eta Defentsa Ministerio espainolak izenpetutako azken kontratuaren iraupena 10 urtekoa da, eta epe hori datorren urtean bukatuko da. Kontratuaren arabera, bada epea beste 10 urtez luzatzeko aukera. Kasu horretan, Estatuak, orain arte urtero ordaindu dituen 7 milioi euroren ordez, urtero 20 milioi ordaindu beharko lituzke.

Baina Bardea Libreak ekimenekoek ez dute ez luzamendurik ez dirurik nahi, «diru hori odolez zikinduta dagoelako eta poligonoak gerrak eta bortizkeria estrukturala sustatzen dituelako, industria militarrari mesede egiten diolako eta inguruko herrietan militarismoarekiko mendekotasuna sortzen duelako». Halaber, ekimenak ukatzen du Bardeako Juntak kontratua luzatzeko zilegitasuna duela. «Herritarrek soilik dute Bardea nola kudeatu behar den erabakitzeko zilegitasuna; beraz, Juntak ezin du bere kabuz kontratua luzatzeko erabakirik hartu». Horregatik, Bardea berreskuratzeko galdeketa eta herri-mobilizazioa aldarrikatzen dituzte.

Bardea Libreak ekimena sustatzen dutenen artean, honako hauek daude: Corella, Fustiñana, Cortes, Tutera, Castejón, Caparroso, Fitero eta Cintruénigoko herri-kandidaturak; EH Bildu, Geroa Bai, Ahal Dugu, Ernai, CHA eta Puyalón; LAB, ELA, CGT, EHNE, CNT eta STEE-EILAS; Bardenas Ya, Sustrai, Salhaketa, Lurra eta beste hainbat talde sozial. Guztira, 70 atxikimendu.

PPren Gobernuak zezenketei buruzko galdeketa debekatu eta ezpata barru-barruraino sartu dio donostiarron erabakitze-eskubideari

albisteak
Leave a comment

CapturaZezenketen inguruko herri-galdeketa eragozteko, PPren Gobernuak, lehendabizi, errekurritu egin zuen Donostiako Udalak aho batez onartutako partehartze-araudia. Gero, Udalak baimena eskatu zuenean, Ministro Kontseilua luzamendutan ibili zen, galdeketa egiteko ezarritako data alferrikaldu zuen arte. Azkenik, faena biribildu eta zuzen-zuzenean debekatu egin du galdeketa. Beraz, ezpata barru-barruraino sartu dio donostiarron erabakitze-eskubideari.

Bagenekien PP eta bere Estatu-aparatuak ez direla herri-galdeketen zaleak. Are gutxiago, jakina, baldin eta jendearen iritzia haien interesen kontrakoa bada, kasu honetan aurreikus zitekeen bezala. “Hemen nik agintzen dut” hori oso sartuta dago PPren genoma politikoan. Baina oso sartuta dago ere zezenak plaza batean hil arte torturatzea. Hain sartuta, ezen haren kultura ereduaren paradigma gorena bihurtu duen. Gauzak horrela, ez da harritzekoa paradigma hori zalantzan jar dezakeen herri-galdeketarik nahi ez izatea, ez Donostian, ez Ciempozuelosen.

Alkateak, baita Foru Aldundiak ere, berehala salatu dute Ministro Kontseiluak udal autonomia (eta, oro har, autonomia) urratu duela. Erabakia autoritariotzat jo eta aurreratu dute aukerak aztertuko dituztela herritarrek gai honi buruz beren iritzia nola edo hala eman dezaten. PSE, berriz, desmarkatu egin da. Desmarkeak agerian uzten du alderdi horren izaera zentralista, baita Donostian duen eledunaren, Ernesto Gascoren, zezenketazaletasun sutsua ere.

Eguzkikoon iritziz, alkateak arrazoi du PPren erabakia salatu eta autoritariotzat jo duenean. Eta ondo iruditzen zaigu aukerak bilatzen jarraitzea. Baina aurkitzen dituen bitartean, Udalak zerbait egin behar duela uste dugu. Bestela, PPren inposizioa de facto onartuko du, hau da, Donostian oso ordezkapen txikia duen alderdi baten inposizioa. Izan ere, azken hauteskundeetan PPk hirian lortu zuen bozka kopurua Donostia Antitaurina Orain plataformak galdeketa sustatzeko bildu zituen 10.000 sinaduren azpitik egon zen.

Gauzak horrela, zera proposatzen dugu, donostiarrok gai honetaz bozkatzeko aukera izan arte, Udalak Illunbe zezenketak egiteko ez uztea.

Orain arte, honako hau protaurino eta antitaurinoen arteko kontua izan da. Hemendik aurrera, berriz, dagozkigun arazoei buruz herritarrok iritzia emateko dugun (edo ez dugun) eskubide-kontua ere bada.

Galdeketa eskatzeko, Donostia Antitaurina Orain plataformak 10.000 sinadura dildu zituen, PPkk azken hauteskundeetan hirian lortutako bozkak baino gehiago.

Galdeketa eskatzeko, Donostia Antitaurina Orain plataformak 10.000 sinadura dildu zituen, PPkk azken hauteskundeetan hirian lortutako bozkak baino gehiago.

 

Zuhaitzak landatu, lurra berreskuratu! AHTrik ez!

albisteak
Leave a comment

C5v8LqgWMAIBwF7Martxoak 19, igandearekin, Bergarako Angiozarren AHTren aurkako zuhaitz landaketa egiteko hitzordu bat dago. Dakizuenez, bertan euskal Y-aren korapiloa egin asmo dute baina zailtasun tekniko eta ekonomikoak tarteko, lanak atzeratzen ari dira.

AHT Gelditu! Elkarlanak Lurraren zein beste eredu sozialaren alde borrokatzen ari diren talde nahiz gizabanako guztiei parte hartzera gonbidapena luzatu die.

Hitzorduak:

-10:00. Labegaraieta polikiroldegia (Bergara).

-10:30. Angiozarko pilotalekua.

Aitzurrak eta katiuskak edo botak ekarri!

Bitartean, umore pixka bat:

https://youtu.be/RA3k8_Q9M54

NATURA GURE ARDURA/ AHTrik EZ

Txillardegiri buruzko hitzaldia, bideoan

albisteak
Leave a comment

Harrera ona izan zuen “Txillardegi, ekologista eta animaliazalea” hitzaldiak, Txillardegi hil zeneko 5. urteurrenaren testuinguruan Eguzkik Txillardegi Liburutegia herri ekimenarekin batera otsailaren 10ean antolatutakoak.

Ezker-eskuin, Markos Zapiain eta Martin Anso.

Ezker-eskuin, Markos Zapiain eta Martin Anso.

Eguzki taldeko kide Martin Ansok Txillardegik Donostiako ekologistekin eta animaliazaleekin izan zuen harremanari buruzko zertzelada batzuk eman zituen (ikus bideoa: https://youtu.be/1M8Jf2BqYfY

Markos Zapian idazleak, berriz, azaldu zuen nolako ideia filosofikoetan nahiz pasarte biografikoetan sustraituta dagoen Txillardegik liburu askotan erakutsi zuen animaliekiko begirune edo elkartasuna: https://youtu.be/ayi_uAoxYas 

Orangutanen uhartea

Markos Zapianek nabarmendu zuenez, Txillardegik bere lehen ipuinean bertan, Orangutanen uhartea izenburukoan, azaldu zuen lehen aldiz (1957an!) ondoren haren idatzietan behin baino gehiagotan islatu zuen kezka bat: gizakia zein puntutaraino bereizten den ziminoengandik eta, oro har, gainerako animaliengandik. Kezka haren ondorioz, bere liburuetan beti erakutsi zuen sufritzen ari ziren animaliekiko erruki nabarmena.

Hain justu, Txillardegi Liburutegia herri ekimenak eta Eguzkik Orangutanen uhartearen berrargitalpen bat egin dute, ipuin hura lehen aldiz publikatu zela 60 urte betetzen diren honetan. Pdf-a lotura honetatik deskargatu daiteke:

http://eguzki.org/2017/02/04/orangutanen-uhartea/

orangutanen

 

.