Auzitegi Nagusiaren azken epaiaren arabera, Donostiako Udala ez dago behartuta Illunbe alokatzera bertan zezenak hil ditzaten. Beraz, Udalari bukatu egin zaizkio Illunben zezenketak egiten jarrai ditzaten uzteko aitzakia guztiak.
Auzitegi Nagusiak dioenez, Udala guztiz burujabea da Illunberi egoki iruditzen zaion erabilera emateko.
Illunbe zezenketa-leku izan ez dadin, herritarron aldarria etengabea izan da:
– Udalak herritarron iritziak ezagutzeko irailean egin zuen inkestaren arabera, donostiarron % 71 udal instalazioetan zezenketak egitearen kontra gaude.
– 1993an egin zen inkesta ospetsu batean antzeko emaitza atera zen: % 72 Donostian zezenketak egitearen kontra zegoen.
– Garai hartako alkateari 13.000 sinadura aurkeztu zitzaizkion zezenplaza ez eraikitzeko esaktuz. Badakizue, donostiarroi “xentimo bat ere” kostatu behar ez omen zitzaigun zezenplaza hura, nahiz eta gero, Auzitegi Nagusiak 2002an hartutako erabaki baten ondorioz, Udalaren poltsikoan 20 milioi euroko zuloa egin zuen.
– Legegaldi honetan bertan, Donostia Antitaurina Orain! plataformak 10.000 sinadura bildu zituen, banan-banan egiaztatuak, Udalai gai honi buruzko galdeketa bat eskatzeko.
Eneko Goia alkateak, itxuraz, behintzat, proposamena onartu zuen, eta galdeketa 2017ko otsailaren 19an egingo zela iragarri zuen. Baina PPk Estatu-makineria martxan jarri zuen. Lehendabizi, bertan behera utzi zuen Galdeketen Udal Araudia, Udaletxean aho batez onartutakoa, baita PPeren zinegozien botoekin ere. Gero, berriz, Ministro Kontseiluak galdeketa bera debekatu egin zuen.
Estatuaren jarrera horrek udal autonomiari eta donostiarron erabakitzeko eskubideari kolpe latza jotzen ziela ikusita, Goiak hitz eman zuen herritarrek beren iritzia adierazteko beste bide batzuk aztertuko zituela.
Bada, Goia eta bere gobernua “aztertzen” ari ziren bitartean, joan den udan 50 zezen gehiago hil zituzten Illunben.
Gauzak horrela, bi eskaera udal gobernuari:
1- Bada konpromisoa betetzeko eta Illunberen erabilerari buruzko herri-galdeketa martxan jartzeko garaia. Eta galdeketa egitera ausartzen ez badira, partehartze-mekanismoak jar ditzatela. Aurten, adibidez, Urrezko Danborra partehartze-mekanismoen bidez eman dute. Bada, Illunberen auzia argitzeko ere antzeko mekanismoak erabil ditzaten; hori bai, berme osoko prozesu batean.
Baina, arren, donostiarroi behingoz galde diezagutela.
2- Hau egiten ez den bitartean, Illunben zezenak ez hiltzeko moratoria, luzamendu edo dena delakoa ezar dezaten.
Donostiarron artean gai honi buruzko iritzi nagusia zein den badaki Udalak, edo, behintzat, badu susmo sendoa. Orain arte legezko aitzakiak erabili ditu burladero moduan. Baina Auzitegi Naguisiaren epaiaren ondoren, erabaki ausart eta demokratikoa ez hartzeko aitzakia guztiak bukatu egin dira.
Donostiako EGUZKI
