All posts by Donostia

Donibaneko oinezkoentzako tarte baten egoera arriskutsuaz ohartarazi du Eguzkik

albisteak
Leave a comment
Tarte arriskutsua Pasai Donibanen

Tarte arriskutsua Pasai Donibanen

EGUZKI talde ekologistak publiko egin nahi du Pasaiako Udalean aurkeztutako salaketa, Pasai Donibaneko mendiaren hegaletik igarotzen den oinezkoentzako pasealekuaren zati baten egoera dela eta, Santa Ana ermitaren bidearen eta Larrabide auzorako igoeraren bidegurutzean. Bonanza auzoaren parean dagoen hormatxoaz ari gara (erreginaren eserlekua bezala ezagutzen dena). Ikus daitekeenez, erdi erorita dago, eta erortzeko arrisku handia du. Gogoratu nahi dugu urte honetako urtarrilean sastrakak kentzeko eta mozteko lanak egin zirela plazara ematen duten eraikinen atzealdeko berdegunean. Gure ustez, lan horiek bortitzegiak izan ziren, eta aipatutako hormatxoaren egoerari eta alboko pistari eragin ziezaioketen.

 

Inguru horretan, halaber, salatu dugu hormatxo horren ondoko hormigoizko pista 30 m baino gehiagoan dagoela irekita, eta, bertan, ustekabeko ondorioak izan ditzaketen balizko lur-jausiak gertatzeko zantzuak daudela, bai materialak (eraikinetan), bai pertsonalak (egoiliarrak eta paseatzaileak).

 

Era berean, adierazi nahi dugu Santa Ana baselizaren inguruan, erromesen aterpetxearen parean, barandaren zorurako finkapenak aske daudela, modu arriskutsuan kulunkatzen ari direla eta leku horretatik igarotzen den oinezkoen ibilbideko erabiltzaileentzat arrisku argia eragiten dutela.

 

Ez da gauetik goizera gertatu den egoera bat, baizik eta Udalaren mantentze faltaren eta utzikeriaren ondorioa da, eta berehala zuzendu behar da. Baikorrak izan nahi dugu eta sortu den Udalbatza berriari aukera bat eman nahi diogu. Lan horiei ekingo dietela espero dugu, baina arrazoizko epe batean jarrera-aldaketa hori antzematen ez badugu, salatzen jarraituko dugu.

 

Jarrera-aldaketa hori Donibaneko bizilagunentzat garrantzitsuak diren gaietan ere islatuko dela espero dugu: saneamendu osoa, oinarrizko zerbitzuen hornidura (gasa, internet), Donibaneko auzo honi bizi-kalitate handiagoa emanez.

Errekalde eta Galarreta bitartean proiektatutako bidegorria zabaltzeko eskatu du Eguzkik

albisteak
Leave a comment
El camino de Hernani visto desde Errekalde. Lo que se ve a mano izquierda de la carretera es Lore Toki.

Hernaniko bidea Errekaldetik ikusita. Bide ertzean, ezkerraldean, militarren esku dagoen Lore Toki etxaldea.

Foru Aldundia Errekalde eta Galarreta bitarteko bidegorri-proiektua jendaurrean erakusten ari dela eta, aurreikusitako zabalera handitu egin behar dela alegatu du Eguzkik.

Proiektatuak aurreikusi du 3 metro zabaleko bidegorri bat, txirrindulariek eta oinezkoek bi norabideetan partekatutakoa. Baina Gipuzkoako Bizikleta Bideen Planaren zein Gipuzkoako Bizikleta Bideen Eskuliburuaren arabera, txirrindulariek eta oinezkoek partekatutako bi norabideko bidegorriek 4 metro zabal behar dituzte.

Are gehiago, 3 metrokoa da Errekalde eta Galarreta bitartean proiektatu den bidegorriaren sekzio tipoa, baina sekzio tipo hori, zenbait puntutan, 1,8 metrora ere murrizten da. 1,8 metroko puntu horietan saihetsezinak izango dira txirrindularien eta oinezkoen arteko gatazkak.

Eta berez eskasa den 3 metroko zabalera zergatik murrizten den zenbait puntutan 1,8 metrora? Erreka bat edo baso bat babesteko? Ez, proiektu hau egiteko oinarrizko irizpideetako bat militarrek Lore Tokin dituzten lursailak ez ukitzea izan delako. Proiektuaren memorian bertan halaxe aitortzen da: “Defentsa Ministerioaren jabetzako lursailetan inolako eraginik ez izatea”.

Hau da, batetik, GI-2132 errepidea; bestetik, ukitu nahi ez diren militarren lursailak; eta bien bitartean, bidegorria ahal bezala “enkajatu” da, zabalera zeharo desegokia bada ere. Ez zaigu onargarria iruditzen eta horregatik bidegorria zabaltzeko eskatu dugu.

Zabalerarena ez ezik naturarekin estu lotuta dauden beste alegazio batzuk ere aurkeztu ditugu. Izan ere, bidegorri berriak eragina izango du harizti batean. Alde horretatik, ahal den esku hartze zorrotz eta zehatzena nahi genuke, albo-kalterik gabekoa, nolabait esateko.

Atzerapen handia

Errekalde eta Galarreta bitartekoa da Gipuzkoako Bizikleta Bideen Planaren arabera dagoeneko eginda beharko luketen baina oraindik egin gabe jarraitzen duten bidegorri horietako bat. Zehatz-mehatz, 2021. urtetik zerbitzuan egon behar zuen.

Bazirudien Mugikortasun Departamentuak berak zeharo ahazturik zuela, planifikatutako beste hainbat bidegorri bezala, harik eta orain dela pare bat urte lehen lerrora pasatu zen arte, Chillida Lekuko zuzendari Mireia Massaguék espresuki errebindikatuta. Horrela, 2021eko urtarrilean Departamentutik iragarri zuten 2022ko udan bidegorria museoraino, behintzat, eginda egongo zela. Ez zen iragarpena bete, bistan da, eta proiektua bera orain arte ez dute izapidetzen hasi. Hasi egin dira, ordea, eta pozten gara, nahiz eta gutxienezko zabalera ez duen bidegorri bat onartzeko prest ez gauden.

Es verdad, no hay manera segura de acudir a Chillida Leku andando o en bici. Ahora bien, si este bidegorri es estratégico es porque permitirá conectar las redes del valle del Urumea con las del Oria y la costa.

Egia da, gaur egun ez dago Chillida Lekura oinez edo bizikletaz joateko modu segururik. Hala ere, Errekalde-Galarreta bidegorria garrantzitsua da, oroz gain, Gipuzoako ekitaldetik datozen bidegorriak kostakoekin lotzea ahalbidetuko duelako.

Bestalde, badirudi interes handia dagoela bidegorria Chillida Lekuraino egiteko. Hortik aurrera, berriz, interesa ez da hain esplizitua izan, orain arte, behintzat. Beraz, adi egon beharko da, Errekalde-Galarreta bidegorria ez baita soilik garrantzitsua Chillida Lekuri zerbitzua emango diolako, jakina, baizik eta Urumea bailarako eta, oro har, Gipuzkoako ekialdeko bidegorriak eta Oria bailarako zein kostaldeko bidegorriak lotzen ahalbidetuko duelako.

Diputazio berriak lan handia du bidegorri-kontuetan

Nolanahi ere, askotan esan dugun bezala, Gizpuzkoako Oinarrizko Bidegorri Sarea atzerapen asko metatzen ari da eta Errekalde-Galarreta atzeratutako bidegorrietako bat baino ez da. Kontuan izan sare horrek amaituta edo ia amaituta egon beharko lukeela, baina behin eta berriro salatu dugunez, barraskilo-abiaduran doa eta aspalditik dago zentzuzko edozein epetatik kanpo. Oraindik egin gabeko edo osatu gabeko bidegorrien zerrenda luze baino luzeagoa da… Errenteria-Irun, Lezo-Pasai Donibane, Usurbil-Santuene, Usurbil-Orio, Narrondo-Zestoa, Mutriku-Saturraran, Urnieta-Andoain, Andoain-Villabona, Ordizia-Zaldibia, Mendaro-Elgoibar, Bergara-Antzuola…

Hona hemen datu ofizial ezin adierazgarriago bat: Gipuzkoako Bizikleta Bideen Planak 2013 eta 2021 bitartean 207 kilometro bidegorri eraikitzea aurreikusi zuen; bada, 70 baino ez dira eraiki, % 33,8. Diputazio berriak baditu, bai, bidegorri-kontuetan egunean jartzeko lana eta premia.

EGUZKI, 2023ko uztaila

Tolosako Zerkausian hegaztien talkak eragozteko konponbidea eskatu du Eguzkik

albisteak
Leave a comment

HegaztienTalkak_eusHamaika txorik, batez ere intsektujalek, jarraitzen dute Tolosako Zerkausiko kristalaren kontra talka egiten. Azken hamar urteotan dozenaka aurkitu ditugu hilik, hala nola, txinbo kaskabeltzak, txio arruntak, zozoak, enarak edota txorlarreak. Azkena, orain dela egun batzuk, honako aitz-enara hau izan zen:

aitz-enara_onaTxori espezie hauek eltxoen izurriteak eragozteko duten garrantzia eta kristalaren kontrako talkak saihesteko edota gutxitzeko moduak egon badaudela kontuan izanik, zera galdetzen dugu: zenbat txori gehiagok hil behar dute, Udalaren Ingurumen Sailak behingoz neurriak har ditzan?

EGUZKI, 2023ko uztaila

Zerkausiko kristala bene-benetako tranpa da Oriaren bueltan dabiltzan txori intsektujaleentzat. Azkena aitz-enara bat izan da, argazkian beheko eskuneko angeluan ikusten dena. Baina azken urteotan askoz gehiago topatu ditugu hilik. Hona hemen batzuk:

Zerkausiko kristala bene-benetako tranpa da Oriaren bueltan dabiltzan txori intsektujaleentzat. Azkena aitz-enara bat izan da, argazkian beheko eskuneko angeluan ikusten dena. Baina azken urteotan askoz gehiago topatu ditugu hilik. Hona hemen batzuk:

ona1 ona2 txio kaskabeltza txolarrea

Legez kanpoko hondakin-isurketak salatu ditu Eguzkik Zestoako Iraeta auzoan

albisteak
Leave a comment
Elizatik 100 metro eskasera egindako isurketa.

Elizatik 100 metro eskasera egindako isurketa.

Legez kanpoko hondakin-isurketak salatu ditu Eguzkik Zestoako Iraeta auzoan. Hona hemen bideo bat:

legez kanpoko isurkatak Iraeta auzoan Zestoan – YouTube

Isurketetako bat elizatik 100 bat metrora dago, Arroa Goia eta Ibañarrieta auzoetara doan errepidean, eskuinaldean. Eremu honetan isuritako hondakinen artean, obra-hondakinak, altzari-zatiak, fardelak lotzeko sokak, plastikoak, etxeko hondakinak (beirazko eta plastikozko poteak). Baita pneumatikoak, nekazaritzarako plastiko beltzak eta Big Bags paketatzeko zaku zuri batzuk ere. Azken hondakin horietako batzuk atzean dagoen errekatik jaso ditugu.

Eliza beretik abiatu eta Urola ibaiaren ondoko baratze eta negutegiak atzean utziz gero, 900 metrora dagoen hartxintxarrezko pista bati jarraituz Aizarnazabal aldera, beste isurketa bat atzeman dugu. Kasu honetan, hondakin gehienak nekazaritza-erabilerako plastiko beltzez eta auto- eta pneumatikoz osatuta daude. Auto baten bateria, garraiorako orgatxo baten gurpilak, ur kontagailu-kaxa bat, fardelak lotzeko sokak eta toldo bat ere bai.

Bigarren isurketa.

Bigarren isurketa.

Lurzorua kutsatuz hondakinak kontrolik gabe isurtzea gutxi ez balitz, gaineratu behar dugu kasu honetan, plastiko beltz gutxi batzuk, ur-kontagailuaren kaxa eta toldo zati bat kenduta, gainerako hondakinak lur azpian zeudela eta hori ere nahikoa iruditzen ez bazaigu, errekasto baten babes-eremuan. Izan ere, plastiko eta gurpil batzuk oraindik lurpean daude, ateratzeko ahaleginak egin ditugun arren.

Eguzkitik legez kanpoko ekintza horiek eta ingurumenaren aurkako erasoak salatzen ditugu. Aldi berean, jendea animatzen dugu horrelako gertaerak publikoki eta erakundeen aurrean sala ditzan. Era berean, gogorarazi behar da Hondakinei eta Lurzoru Kutsatuei buruzko Legeak berariaz debekatzen duela «edozein motatako hondakinak kontrolik gabe uztea, isurtzea edo ezabatzea», «2.001 eurotik 100.000 eurora bitarteko isunarekin, salbu eta hondakin arriskutsuak edo lurzoru kutsatuak badira; kasu horretan, isuna 20.001 eurotik 600.000 eurora bitartekoa izango da».

Eguzkik legez kanpoko isurketa horien berri eman die Udaleko Ingurumen Sailari eta Uraren Euskal Agentziari (Urari). Alde batetik, degradatutako eremuak ahalik eta azkarren lehengoratzeko eskatu die, hondakinek hondakinei deitzen dietelako, eta, bestetik, gune horiek kontrolatzeko. Hala ez bada, isurketak berriro gerta daitezkeela uste dugu.

Eguzki, 2023ko ekaina

Eguzkik ekarpenak egin dizkio Lezo-Donibane bidegorriaren 1. zatiaren proiektuari

albisteak
Leave a comment

bidegorriUrteetako atzerapenarekin, azkenik, Aldundiko Mugikortasuneko eta Garraio Publikoko Zuzendaritza Nagusiak maiatzaren 23ko 219/2023 Foru Agindua onartu du, Lezo-Donibane Bizikleta eta Oinezkoen Bidearen 1. zatiaren proiektu aldatua onartzeko izapideei hasiera ematen diena. Horrela amaitu da 2015ean hasi zen herrien arteko lotura-tarte hori.

Aipatutako atzerapena justifikaezina bada ere (lanek 300 metroko luzera dute), Aldundiak gure iritziz anbizio falta erakusten du aipatutako proiektuan, eta, horregatik, Eguzkik ekarpenak dituen idazki bat aurkeztu du, proiektua hobetzen dutela sinetsita. Ekarpenek honako hau planteatzen dute:

• Bidearen zabalera 4 metrora handitu. Argi dago oinezkoak eta bizikletak ibiltzeko tarte bat dela, batzuen zein besteen erabilera handia duena eta istripuak izateko arrisku handia duen bide baten paraleloan doana. Gainera, adierazi behar da proposatutako sekzioa Gipuzkoako Bizikleta Bideen Lurraldearen Arloko Planean jasota dagoela.
• Babesteko eta argiztapen elementuak bidearen zabalera erabilgarritik (4 m) kanpo ainguratu, sekzio hori murriztu ez dadin.
• Kutsadura akustikoa minimizatze aldera, eta kontsumo jasangarriaren eta aurrezpen energetikoaren ikuspegitik, pertsonen presentziarekin aktibatuko diren argi adimendunak instalatu.

Kezka Irungo Pierre Loti bidegorrian lizitatutako zatiaren inguruan

albisteak
Leave a comment
Mokozabalak, koartzatxoak eta koartzatxo txikiak (X. Garate)

Mokozabalak, koartzatxoak eta koartzatxo txikiak (X. Garate)

Berriro ere, harritu gabe, prentsaren bidez jakin dugu, “Txingudiko naturguneen konektibitatea” kontzeptupean, Bidasoako hiru hirien bizikleten eta oinezkoen arteko lotura deitzen duten bidegorriaren zati bat eraikitzeko lanak lizitatu berri dituela Eusko Jaurlaritzak. Behin eta berriz esango dugu, baina Txingudiko naturguneen benetako konektibitatea naturagune babestuaren habitaten egungo zatiketa konpontzearen ikuspegitik soilik har daiteke kontuan, haien arteko beharrezko elkarreragin ekologikoa lehengoratuz.

Beste behin ere, horrelako jarduketak “ekintza burututzat” aurkezten dizkigute, eremua, haren dinamika eta paduretako aberastasuna aspalditik ezagutzen ditugunok eta horietaz arduratzen garenok egin ditzakegun ekarpen baliotsuak mespretxatuz. Ekarpen horiek eskuzabalki egin ditugu beti, Natura 2000 Sareko eremu hori hobetzeko eta kontserbatzeko asmoz. Tamalgarria da gure administrazioek metatutako esperientzia hori baloratzen ez jakitea, eta, dirudienez, alde batera utzi nahi dituzten eragile deseroso gisa ikustea.

Bidasoaren ibilguaren inbasioarekin topo egingo dugu berriro, piloteen gainean finkatutako pasabide batekin, beste aldean (Hendaian) antzeko bat egin zutela argudiatuz. Ez dakigu, ezta ere, estuarioaren eremuan izan daitezkeen eragin negatiboen baloraziorik egin den, ez eta bi pasabideen eragin sinergiko eta metatzailea kontuan hartu den, ezta trazadurarekiko alternatiben azterketarik ere egin den. Izan ere, etengabe aipatzen den Plan Zuzentzaileak orain lizitatzen denaz bestelako trazadura bat aukeratu zuen.

Plan Zuzentzailea Txingudiko Plan Berezia bizkortzeko zela esan ziguten, eta duela 30 urte hasi zenetik, amaitu gabe eta baztertuta geratu zen. Plan Berezia sinatu zuten administrazio berberek (Eusko Jaurlaritzak, Foru Aldundiak eta Irungo eta Hondarribiko udalek eta Costasek) Plan Zuzentzaile bat (ez du arau-baliorik) aplikatuz azkartu nahi dute orain, Plan Berezian eta Natura 2000 Sareko kudeaketa-dokumentuan (biak nahitaez bete beharreko araudiak) jasotzen ez diren jarduketekin, baita tokian dauden eta Europako Zuzentarauetan jasotzen diren habitatak eta espezie naturalak kontserbatzeko helburuekin zerikusirik ez duten proiektuekin ere.

Berriz ere, Txingudin, milioietako inbertsioari buruz hitz egin dute, baina berriro ere ikusten dugu, 1993an, Plan Berezian eta 2013ko Natura 2000 sareko Kudeaketa Dokumentuan jasotako leheneratze-konpromisoak, premiazkoak eta beharrezkoak, oraindik ere “sine die” egiteke daudela, eta, aldiz, kontserbazio-helburuekin zerikusirik ez duten proiektuak, baita haren aurkakoak ere, bide azkarretik jorratzen direla. Nahiz eta errepikakorra izan, hor daude oraindik ere Plaiaundiko kirol-instalazioak, Irukanale uhartea bere habitat naturalera leheneratu gabe, Oxinbiribil ibaiertza lehengoratu gabe, Jaizubiako eremuak baratzez beteta, Kosta eremua Plan Berezitik bananduta eta Hondarribiko hirigintza-plangintzaren zain, etab.

Eguzkik, beste erakunde eta partikular batzuek bezala, publikoki salatzen jarraituko dugu gure badiaren balio naturalak aldatzen eta degradatzen dituzten egoera eta proiektu horiek, nahiz eta “hobekuntza polit” gisa publizitatu nahi izan.

Elkarri pilota ez pasatzeko eta Okendotegiko hondakinak kentzeko eskatu die Eguzkik Donostiako Udalari eta Aldundiari

albisteak
Leave a comment

IMG_20230513_172210Elkarri pilota ez pasatzeko, Martuteneko Okendotegi bideko hondakinak kentzeko eta, paraje hura zabortegi bihurtu baino lehen, neurriak hartzeko eskatu die Eguzkik Donostiako Udalari eta Gipuzkoako Foru Aldundiari.

Zergatik esaten dugu pilota pasatzeari uzteko? Bada, joan den maiatzaren 17an, Bigarren Ingurubideko zubibideen azpiko paraje hartan pilatzen ari diren legez kanpoko hondakin-depositoen kontrako neurriak hartzeko eskaera egin geniolako Donostiako Udalari, egoera islatzen duten hainbat argazki erantsita.

Maiatzaren 23an, paraje hartako mantenu-lanak Aldundiari dagozkiola erantzun zigun Udalak.

Gauzak horrela, maiatzaren 27an Aldundiari egin genion 17an Udalari eginiko eskaera bera.

Ekainaren 5ean, berriz, Aldundiaren partetik honako erantzun hau jaso dugu: “Udalean adierazi diotenaren aurka, Udalak berak bere gain hartu du zubibideen azpiko eremu hori garbitzea”. Horren froga edo, Aldundiaren erantzunarekin batera zenbait dokumentu jaso dugu. Horietako bat hauxe:

gutunaGure ustez, dokumentu horiek, oroz gain, arazoa ez dela inolaz ere berria uzten dute agerian.

Gu ez gara hemen hasiko arrazoia Udalak edo Aldundiak duen ebazten. Baina garbi dago Udalak horrelako arazoen aurrean baloiak kanpora botatzeko joera handia duela. Metroaren lanetatik Urumeara isurketak salatu genituenean, alkateak eta Ingurumen zinegotziak esan zuten, ebidentzia guztien aurka, Udalak ez zuela alor horretan eskumenik. Santa Katalina eta Maria Kristina zubien arteko hondakin piloaren kasuan ere erantzukizuna Ura agentziaren bizkar uzten saiatu zen. Lourdes Txikiko hariztia txikitu zutenean, beste horrenbeste. Alegia, esan bezala, baloiak kanpora.

Eguzkikooi eta seguruena herritarroi, oro har, gutxi axola zaigu arazoa Udalak edo Aldundiak konpontzen duen, betiere konpontzen bada, noski.

Hona hemen gaur egun Okendotegin pilatzen diren hainbat hondakin-depositoren argazkiak:

IMG_20230513_172655 IMG_20230513_172628 IMG_20230513_172525 IMG_20230513_172438 IMG_20230513_172343IMG_20230513_172021 IMG_20230513_171857 IMG_20230513_171620 IMG_20230513_171559 IMG_20230513_171535 IMG_20230513_171511EGUZKI, 2023ko ekainean

Arartekoarengana jo behar izan dugu berriro

albisteak
Leave a comment
Txatartegia

Txatartegia Jaitzubian

Hondarribiko udalerrian ingurumenarekin zerikusia duten bi gairi buruz Eguzki talde ekologistak beste behin ere Arartekoaren esku-hartzea eskatu behar izan du, Gipuzkoako Foru Aldundiak eta Eusko Jaurlaritzako Ingurumenaren Kalitatearen eta Ekonomia Zirkularraren Zuzendaritzak informazio eta parte-hartze publikoaren printzipioen aurka izan dezaketen jarrera dela eta.

Gogorarazi nahi dugu, Eusko Jaurlaritzari eragiten dion gaian, 2018. urteko gai bati buruz ari garela, eta, gaur egun, Zaldunbordako eremuan 4 ha haltzadi kantauriar (interes komunitarioko habitata) lehengoratzea ezartzen zuen ebazpena egin gabe dagoela. Horregatik, krisi klimatikoaren egoera honetan, onartezina da hartzen diren eta norabide ona adierazten duten erabakiek ere hainbeste denbora atzeratu behar izatea.

Gipuzkoako KBEen kudeaketaren arduraduna Gipuzkoako Foru Aldundia denez, ezin dugu ulertu administrazio honek erakutsi duen interes falta, Jaitzubiako KBEaren eta HBBEaren lurretan eraikin bat dagoelako, eta gainera, jarduera horrek “kutsa dezakeelako”. Argi dago bai kokapena bai jarduera ez datozela bat KBE eta HBBE horren kontserbazio-helburuekin, zeinak logikoa denez zaindu eta bultzatu behar baitira.

Administrazio horien jarrera tamalgarritzat jo besterik ezin dugu egin, eta espero dugu Arartekoari eskatu diogun jarduerak eta babesak jarrera-aldaketa eragingo duela bi administrazioetan, Natura 2000 Sareko gune horretan biodibertsitatearen kontserbazioa zaintzeko eta bultzatzeko.

Omenaldia Gladys del Estali, irudietan

albisteak
Leave a comment

00Aurten ere Gladys del Estal omendu dugu Donostian, Gladys Enean, Eguzkik eta Gladys Gogoan kolektiboak antolatutako ekitaldi batean. 44 urte pasatu dira guardia zibil batek Tuteran tiro bat buruan jota hil zuenetik, energia nuklearraren eta Bardeako tiro poligonoaren kontrako mobilizazio baten jazarpenaren testuinguruan.

Aurresku, lore, kanta eta bizikleten artean, kuadrillakoek gogoratu dute lagun aktibo hura, umore berezi-berezia zuena. Gogoratu dute haren hilketa erabat zigorrik gabe geratu zela eta hainbeste urte pasatu eta gero oraindik aitzortza ofizialik gabe jarraitzen duela.

Baina Gladys gogoratzeko ez ezik ikuspegi ekologistatik gaur egungo egoeraren irakurketa bat egiteko tartea ere izan da. Izan ere, zorigaiztoko ekainaren 3 hartan Gladys Tuterara eraman zuten arrazoiek indarrean jarraitzen dute, inoiz baino gehiago, gainera, hori posible bada, behintzat.

Ez beti, baina batzuetan irudi batek mila hitzek baino gehiago balio du. Hona hemen, bada, irudi-entsalada bat, gaur eguerdian parkean bizi dugun giroaren isla. Iruditzen zaigu datozen orduetan, datozen egunetan, askoz irudi gehiago iritsiko zaizkigula. Beraz, beharbada albiste hau moldatu beharko dugu irudi gehiagori tartea egiteko. Baina, momentuz, hona hemen batzuk:

Txirrindulariak hemen dira. Has gaitezke.

Txirrindulariak hemen dira. Has gaitezke.

03

Prestakizunak.

Prestakizunak.

04

Kantujirako lagunak hasi dira:

Kantujirako lagunak hasi dira: “Eskerrak bizitzari”.

07

Erromeria abiatu da Gladysen oroitarrirantz.

Erromeria abiatu da Gladysen oroitarrirantz.

Aurreskua.

Aurreskua.

Yetik hitza hartu du Gladysen kuadrillakoen izenean.

Yetik hitza hartu du Gladysen kuadrillakoen izenean.

200

Mikel Carton. Oso gustura kantatu dugu harekin batera.

Mikel Carton. Oso gustura kantatu dugu harekin batera.

Gaur egungo egoera ekologikoaren irakurketa aurten Aitziber Sarobe Naturkoneko kideak egin du.

Gaur egungo egoera ekologikoaren irakurketa aurten Aitziber Sarobe Naturkoneko kideak egin du.

13

15

Begira zer apaina geratu den oroitarria.

Begira zer apaina geratu den oroitarria.

Ez, aurten ezin izan du etorri Esther Zabalegik eta, beraz, ezin izan dugu disfrutatu haren jotekin. Baina mezu bat bidali du telefonoz eta datorren urtean bertan egongo dela agindu du, huts egin gabe.

Bestalde, Donostian gaur egin dugu omenaldia. Tuteran, berriz, atzo egin zuten. Hona hemen Bardenas Libres kolektiboak antolatutako elkarretaratzean egindako argazki pare bat:

17 16Eta bihar, Asamblea Antipolígonok antolatu duen ohiko martxan ere seguru ez dutela Gladys anantziko:

18

Lemoiz gaur, Gladysen omenaldiaren atarian

albisteak
Leave a comment

RogeBlasco1Kuadrilla polita bildu gara bart Donostiako Koldo Mitxelena kulturunean Roge Blascok Lemoizi buruz egin dituen film dokumental laburrak ikusteko.

Hona hemen bart arratseko grabazioa oso-osorik, filmak barne:

Proiekzioak / Proyecciones: Lemoiz gaur – YouTube

Haurtzaroko oroitzapenetatik abiatu da Roge. Izan ere, bere familiak Basordan baserri bat zuen, Momatei izenekoa, eta saldu egin behar izan zuen, zentral nuklearra eraiki behar zutelako. Gero, hura guztia gaur egun nola dagoen azaldu du, hitzen bidez, baina batez ere semearekin batera egin dituen bi dokumental horien bidez.

Dokumentalotan, funtsean, bi elkarrizketa daude. Bata, zentralak ondare gisa duen balioari buruzko tesina egin duen Valentin Elortegirekin; bestea, berriz, zentralaren ingurua babesteko beharra nabarmentzen duen Josu Alberdi mendizalearekin.

RogeBlasco2Apaltasunez eta apaltasunetik egindako lanak dira, Rogek ohi duen bezala. Lan xumeak dira, bai, baina bertute handi bat dutenak, mahai gainean jartzen dutelako aspalditik jira-biraka dabilen azaro bat: zer egin Lemoizko zentralarekin eta inguruan dagoen eremu guztiarekin.

Hain justu, horixe da, Eguzkiren iritziz, herri-erakundeetatik, Eusko Jaurlaritzatik batik-bat, ukatzen ari zaigun eztabaida soziala. Hor zor historiko handi bat dago, baina baita aukera bikaina ere (ingurumenaren aldetik, behintzat). Eztabaida hori mahaigaineratu egin behar da, eta horretarako oso lagungarriak dira, ezbairik gabe, Rogeren bi dokumental hauek.

Esan bezala, testu honen hasieran dagoen estekan klikatuta ikus dezakezue bart arratseko saio osoa, filmak barne (1:38 ordu), KMren kortesiari esker eta, jakina, Rogeren eskuzabaltasunari esker.

LEMOIZ GAUR ekitaldia izan da bihar Gladys del Estali eskainiko zaion omenaldiaren osagarri bat:

IMG-20230512-WA0007

Eguzkik fiskaltzaren esku-hartzea eskatu du

albisteak
Leave a comment

GamongoaEguzki talde ekologistak, Orereta-Errenteriako Udalak 2022ko irailean eskatutako informazioa guri emateko ezarritako epe guztiak igarota, gaia Gipuzkoako Probintzia Fiskaltzaren esku jarri behar izan du.

Adierazi den bezala, Eguzkik 2022ko irailean eskatu zion Udalari Gamongoa sektoreko Plan Orokorraren aldaketa puntualaren udal-onarpenaren aurka jarritako administrazioarekiko auziari buruzko dokumentazioa. Udalak behin eta berriz ukatu digu informazio hori, gure ustez lege-oinarri nahikorik gabe, eta horren ondorioz, 2023ko otsailean Informazio Publikoaren Sarbiderako Euskal Batzordearen babesa eskatu genuen.

Eusko Jaurlaritzaren menpeko administrazio honek 2023ko martxoaren 21eko 20/2023 Ebazpena eman zuen aho batez, eta, bertan, Udalari eskatu zion eskatutako dokumentazioa gehienez ere 10 eguneko epean emateko. Ebazpen horietan nahitaezkoa denez, bi hilabeteko epean ebazpen horren aurka jotzeko aukera zegoela jakinarazi zitzaion, administrazioarekiko auzi-errekurtsoa jarrita.

Aurreratu dugunez, Udalak ez ditu aintzat hartu ebazpenaren bi erabakiak, ez digu dokumentazioa eman, eta ez du administrazioarekiko auzi-errekurtsorik aurkeztu. Nagusikeriazko jarrera hori onartezina da administrazio publiko batean, eredugarria izan behar baitu administrazio publikoak oro har hartzen dituen eta nahitaez bete beharrekoak diren ebazpenak betetzeko orduan. Jarrera horrek ahuldu egiten du administrazioaren sinesgarritasuna, erakundeen arteko leialtasunaren printzipioa hausten baitu eta herritarrek informazio eta parte-hartze publikorako dituzten eskubideak mespretxatzen baititu.

Horregatik guztiagatik, herritar garen aldetik ditugun eskubideak bermatze aldera, 2023ko maiatzaren 29an Udalaren jarduera Gipuzkoako Fiskaltzaren esku utzi genuen, delitu izan daitekeeela ulertuta.